1 Pedro

3 Ke riʼ chqä rïx ixoqiʼ, tinmaj rtzij iwachjil, rchë ke riʼ, we kʼo jojun chkë ryeʼ ma ye rsamajelaʼ ta Dios, ryeʼ xkeʼok qachʼalal rma jaʼäl inaʼoj niʼän kikʼë y ma rma ta ri niʼij chkë, 2 rma kitzʼeton pä chë ikʼwan jun chʼajchʼöj kʼaslemal chqä ma iqasan ta kiqʼij. 3 Ma yë ta ri achkë niksaj tbʼanö chë jaʼäl yixqʼalajin, achiʼel taq nipachʼuj iwiʼ, niksaj xa bʼa achkë jun ri bʼanon rkʼë oro o yeʼiksaj tzyäq ri kowan nüm kajäl, 4 xa yë ri inaʼoj tbʼanö chë jaʼäl yixqʼalajin, y más taq nikʼüt chë ma qʼaqʼ ta ijolon, rma ya riʼ kan kowan jaʼäl ntzʼetetäj rma Dios. 5 Rma kan ke riʼ rbʼanik xkiwäq kiʼ ri loqʼoläj taq ixoqiʼ ojer ri kan xkikʼuqbʼaʼ kikʼuʼx chrij Dios chqä xkinmaj kitzij kichjil, 6 kan achiʼel xuʼän Sara ri xnmaj rtzij Abrahán y xuʼij tat che rä. Rïx yïx ral ryä we ma niyaʼ ta qa rbʼanik ri ütz chqä ma niyaʼ ta qʼij chë ri xbʼïn·ïl nchʼakon chiwij. 7 Ke riʼ chqä rïx achiʼaʼ, ma ke’iya’ ta qa iwixjayil chqä tikʼutuʼ chë nqʼax chiwäch ri nkina’. Tiyaʼ kiqʼij ri ixoqiʼ rma ryeʼ ye achiʼel ta jun xar ri kan chanin npax. Tib’ana’ ri’ rma Dios xtspaj kik’aslemal rye’ achi’el xtu’än iwk’ë rïx. We xtiʼän riʼ, majun ta jun xtb’anö chë Dios ma ta xtya’ rxkïn chiwä taq xkixch’ö rk’ë. 8 Pa rkʼisbʼäl nwajoʼ nbʼij ya reʼ chiwä: jnan rbʼanik kixchʼobʼon jontir chqä tqʼax chiwäch ri nkinaʼ ri nkʼaj chik; tiwajoʼ iwiʼ kan achiʼel nkajoʼ kiʼ kaʼiʼ ri kan kichʼalal kiʼ, tikʼutuʼ chë nipoqonaj iwäch chqä tiqasaj iwiʼ. 9 Ma titzolij ta rkʼexel ri nkiʼän o ri nkiʼij ri nkʼaj chik chiwä. Pa rkʼexel riʼ, xa kan tikʼutuj utzil pa kiwiʼ, rma kan rchë ya reʼ xixskʼïx wä, rchë xtyaʼöx utzil pan iwiʼ. 10 Rma chë «ri winäq ri nuloqʼoqʼej ri rkʼaslemal chqä nrajoʼ nrïl utzil, kʼo chë nuqʼïl riʼ rkʼë ri nuʼij chqä ma kerqʼöl ta ri nkʼaj chik. 11 Chqä ma tuʼän ta ri itzelal y tbʼanaʼ ri ütz; ronojel mul ttoʼon rchë ma njeʼ ta chʼaʼoj chkikojöl ri winäq. 12 Rma Jehová kan ryaʼon rwäch chkij ri jïk kikʼaslemal chqä yerkʼoxaj taq yechʼö rkʼë, ye kʼa Jehová nuyaʼ qa rij chkiwäch ri nkiʼän ri ma ütz ta». 14 Ye kʼa, rïx kan kiʼ ikʼuʼx tapeʼ nitäj poqän xa rma ikʼwan jun chöj kʼaslemal. Tapeʼ ke riʼ, ma tixiʼij ta iwiʼ chwäch ri achoq chwäch nkixiʼij wä kiʼ ryeʼ chqä ma tchʼpü ta ikʼuʼx. 15 Pa rkʼexel riʼ, tikʼutuʼ chë chiwäch rïx kan kʼo rqʼij ri Cristo, ri Iwajaw, y ronojel mul tiquʼ achkë xtiʼij che rä xa bʼa achkë winäq ri xtkʼutun chiwä chrij ri iyoʼen apü, ye kʼa kan ütz inaʼoj tibʼanaʼ rkʼë y ma tiqasaj ta rqʼij. 18 Rma Cristo xa jmul xkäm rchë xtöj qamak, jun winäq chöj rkʼaslemal pa kikʼexel ri ma chöj ta kikʼaslemal, rchë ke riʼ yixurkʼwaj äl rkʼë Dios. Ryä jun winäq taq xkamsäx, ye kʼa xok jun espíritu taq xkʼasöx pä. 20 ri ma xkinmaj ta tzij ojer, taq Dios ma xikʼo ta rkʼuʼx xyoʼen pa rqʼij qa Noé, loman najin wä nbʼan ri arca ri xa ye 8 winäq xeʼok chpan rchë xekʼwäx pa rwiʼ yaʼ chqä xekolotäj qa. 21 Ri bautismo, ri njunmatäj rkʼë reʼ, komä chqä najin yixurköl rïx (ma rma ta nresaj ri tzʼil chrij ri ichʼakul, xa nuyaʼ qʼij chiwä rchë nikʼutuj jun chʼajchʼöj iwan chwäch Dios) rma rkʼasojixik Jesucristo.