Efesios

2 kan tiqasaj iwiʼ, ma chanin ta tmeqʼeʼ iwkʼë chqä ma tikʼo ta ikʼuʼx kikʼë ri nkʼaj chik; kan rkʼë ajowabʼäl tikochʼolaʼ wä iwiʼ; 3 kan tibʼanaʼ jontir ri kʼo pan iqʼaʼ rchë chë ri loqʼoläj rchqʼaʼ Dios nuʼän chë jnan nuʼän iwäch chqä ma njeʼ ta chʼaʼoj chikojöl. 4 Rïx xa jun chʼakulaj ibʼanon chqä xa xuʼ ri loqʼoläj rchqʼaʼ Dios najin nsamäj iwkʼë, y ri utzil ri xtzjöx chiwä kan ya riʼ ri iyoʼen jontir. 5 Xa xuʼ jun Iwajaw kʼo, xa jnan ri inman chqä xa xuʼ jun bautismo kʼo. 6 Xa xuʼ jun iDios chqä Itataʼ jontir. Ryä yixurksaj y kʼo pan iwiʼ jontir, chqä chikojöl jontir nsamäj wä. 7 Chqajujnal röj xqjowäx rma Dios tapeʼ ma taqäl ta chqij. Ya riʼ kan nqʼalajin rkʼë rbʼanik xjach re spanïk reʼ chqawäch rma Cristo. 8 Rma ri Loqʼoläj taq Wuj nkiʼij ya reʼ: «Taq ryä xbʼä chkaj, xerkʼwaj äl jojun achiʼaʼ, y jojun chik achiʼaʼ achiʼel ta jun spanïk xeryaʼ qa». 11 Y xerchaʼ qa jojun rchë xeʼok apóstoles, jojun chik rchë xeʼok profetas, nkʼaj chik rchë xkitzjoj rchʼaʼäl Dios y jojun chik rchë xeʼok ukʼwäy taq bʼey rchë yojkichajij chqä nkikʼüt chrij Dios chqawäch. 12 Ryä xerchaʼ qa rchë yekiqʼïl ri qachʼalal ri nbʼix loqʼoläj chkë, rchë nbʼan ri samaj yaʼon qa pa qaqʼaʼ chqä rchë nkikʼuqbʼaʼ qakʼuʼx jontir röj, ri yoj rchʼakul Cristo. 13 Ryeʼ xtkiʼän riʼ kʼa taq jontir röj jnan ri xtqanmaj chrij Dios, xtqatamaj jontir chrij Rkʼajol Dios, xtqchʼobʼon achiʼel nuʼän jun winäq ri ma akʼal ta chik chqä xtqchʼobʼon achiʼel Cristo. 14 Rma riʼ ma tqaʼän ta chik achiʼel nkiʼän ri akʼalaʼ chqä ma chaq tqanmaj ta jontir ri nkikʼüt ri winäq rchë yekiqʼöl ri nkʼaj chik. Rma ri nqaʼän riʼ xa achiʼel ta nqayaʼ qʼij chë nqkʼwäx rma rwiʼ yaʼ chqä rma kaqʼiqʼ. 15 Rma riʼ, ma tqayaʼ ta qa ri kantzij, chqä rkʼë ri ajowabʼäl qkʼiyïr rkʼë ronojel ri petenäq rkʼë ri Cristo, ri jolomäj. 16 Rma ryä, jontir ri peraj rchë ri chʼakulaj kan ütz kikʼwan kiʼ chqä nkitolaʼ kiʼ chkiwäch, rma ri akuchï kitnun wä kiʼ ri peraj kan nkiyaʼ ri nkʼatzin che rä ri chʼakulaj. Taq jontir ri peraj ütz yesamäj, riʼ nuʼän chë ri chʼakulaj ütz nkʼïy qʼanäj, ke riʼ xtkowïr chpan ri ajowabʼäl. 18 Ryeʼ achiʼel ta pa qʼequʼn ye kʼo wä chqä ma kikʼwan ta ri kʼaslemal ri nqä chwäch Dios rma xa sachnäq chkiwäch y ma ntiʼon ta chik kan rma ri yekiʼän. 19 Rma ryeʼ majun ta chik xajan chkiwäch, ma yekʼïx ta chik nkiʼän ri ma ütz ta chqä kan nkikanuj rbʼanik rchë yekiʼän jontir rwäch tzʼil taq bʼanobʼäl. 22 Rïx xitamaj chë kʼo chë yeʼiyaʼ qa ri naʼoj ri xeʼikʼwaj ojer, ri kikʼwan kiʼ kikʼë ri bʼanobʼäl xeʼibʼanalaʼ ojer chqä ri xa más yetzelatäj rma ri itzel taq raynïk ri kikʼwan kiʼ kikʼë ri naʼoj riʼ. 23 Chaq taqïl titzʼetaʼ we najin njalatäj ri rbʼanik yixchʼobʼon, 24 y kʼo chë niwäq iwiʼ kikʼë ri kʼakʼakʼ taq naʼoj ri kikʼwan kiʼ rkʼë ri rraybʼal Dios, ri chojmilal chqä ri ma nayaʼ ta qa Dios. 25 Rma riʼ, rma komä ma yeʼiqʼöl ta chik ri winäq, chijujnal rïx kantzij kixtzjon kikʼë ri iwachʼalal, rma röj yoj achiʼel ri peraj rchë ri chʼakulaj ri kan jnan nqakʼwaj qiʼ. 26 Ma kixmakun ta taq xtpë iyowal; ma tiyaʼ ta qʼij chë kʼa kʼo na iyowal taq ya xqä qa Qʼij. 27 Ma tiyaʼ ta qʼij chë ri Diablo nuʼän ri nrajoʼ ryä iwkʼë. 28 Ri winäq ri nleqʼan ma tleqʼan ta chik, xa kan kuw tsamäj chqä tbʼanaʼ utziläj taq samaj rkʼë rqʼaʼ, ke riʼ kʼo nkowin nuyaʼ che rä ri nkʼatzin che rä. 29 Ma ttel ta pan ichiʼ tzij ri ye achiʼel tiʼaj ri chwirnäq. Pa rkʼexel riʼ, tibʼanaʼ chë ronojel ri niʼij kan ta xtkʼuqbʼaʼ kikʼuʼx ri nkʼaj chik we nkʼatzin chkë chqä kan ta kʼo utzil xtyaʼ qa pa kiwiʼ ri yekʼoxan iwchë. 30 Rma riʼ ma tiʼän ta chë nbʼison ri loqʼoläj rchqʼaʼ Dios, ri achoq rkʼë yaʼon wä iwetal rchë xtiwïl kolotajïk rma rkʼaslemal xyaʼ Jesús pa kamïk. 31 Keʼiwesaj ri kʼix kʼo pan iwan, ma tiyaʼ ta qʼij chë ri iyowal nchʼakon chiwij, ma chanin ta tmeqʼeʼ iwkʼë, ma tiʼän ta mamaʼ pan ichiʼ chrij jun chik, ma keʼiksaj ta tzij ri yesokon chqä ma tiʼän ta xa bʼa achkë itzelal. 32 Kan ütz inaʼoj tibʼanaʼ chiwäch, tijyowalaʼ iwäch chqä ma tikʼekʼej ta tikuyulaʼ iwiʼ achiʼel xuʼän Dios ri ma xkʼekʼej ta xixurküy rma ri Cristo.