Mateo

2 Taq xaläx Jesús pa Belén ri kʼo Judea, yë wä Herodes najin nqʼatö tzij. Chkipan ri qʼij riʼ, xeʼapon Jerusalén jojun achiʼaʼ ri yekitzʼët ri chʼumilaʼ rchë nkiʼij achkë xtbʼanatäj apü. 2 Ryeʼ xkichäp rkʼutxik reʼ: «¿Akuchï kʼo wä ri xttok qʼatöy tzij pa kiwiʼ ri judíos, ri kʼa majanäj ta taläx qa? Rma taq yoj kʼo wä ke laʼ akuchï ntel wä pä Qʼij, xqatzʼët jun chʼumil ri nqrkʼwaj rkʼë ryä, y xqpë rchë nqxkeʼ chwäch». 3 Taq ri qʼatöy tzij Herodes chqä jontir ri winäq ri ye kʼo Jerusalén xkikʼoxaj riʼ, xkichäp quʼuj. 4 Rma riʼ Herodes xermöl jontir ri sacerdotes ri kʼo más kiqʼij chqä ri winäq ri nkikʼüt Rpixaʼ Moisés rchë xkʼutuj chkë akuchï kʼo chë naläx wä ri Cristo. 5 Ryeʼ xkiʼij reʼ che rä: «Pa Belén ri kʼo Judea, rma ya reʼ xtzʼibʼaj qa jun chkë ri profetas: 6 ‹Y rït, Belén ri yït kʼo Judá, tapeʼ xa yït koʼöl, kan kowan aqʼij chkikojöl ri tinamït ri ye kʼo pa kiqʼaʼ ri qʼatöy taq tzij aj Judá. Rma awkʼë rït xttel wä jun qʼatöy tzij ri xtkʼwaj bʼey chwäch ntinamit Israel›». 7 Rma riʼ Herodes pa newäl xtäq kikʼamarik ri achiʼaʼ ri yekitzʼët wä ri chʼumilaʼ. Y xkʼutuj chkë ajän xbʼeqʼalajin pä ri chʼumil. 8 Chrij riʼ, xertäq äl Belén y xuʼij reʼ chkë: «Tibʼekanuj ri akʼal chpan jontir ri tinamït. Taq xtiwïl, tibʼeʼij chwä, rchë ke riʼ rïn chqä xkinexkeʼ chwäch». 9 Taq Herodes xuʼij äl ya riʼ chkë, ri achiʼaʼ ri yekitzʼët ri chʼumilaʼ xebʼä äl Belén. Ri chʼumil ri xkitzʼët taq ye kʼo akuchï ntel wä pä ri Qʼij rkʼwan wä äl kibʼey y xbʼepaʼeʼ pa rwiʼ ri jay ri akuchï kʼo wä ri akʼal. 10 Taq xbʼanatäj riʼ, kowan xel kikʼuʼx. 11 Taq xeʼok apü chpan ri jay, xkitzʼët ri neʼy ri kʼo rkʼë María, ri rteʼ. Y xexkeʼ qa chwäch rchë xkiyaʼ rqʼij. Chrij riʼ, xekijäq ri koköj taq kax ri kikʼwan y xkesaj pä oro, pon chqä rqʼolil cheʼ ri jubʼül rxlaʼ rchë xkispaj che rä. 12 Ye kʼa, rma Dios xuʼij chkë re achiʼaʼ reʼ chpan jun achïkʼ chë ma ketzolin ta chik rkʼë Herodes, xetzolin äl pa kitinamit chpan jun chik bʼey. 13 Taq re achiʼaʼ reʼ xebʼä äl, ri r·ángel Jehová xtzjon rkʼë José chpan jun achïkʼ, y xuʼij reʼ che rä: «Kakatäj, takʼwaj äl ri akʼal chqä rteʼ y kixanmäj äl Egipto. Chlaʼ kixkanaj wä kʼa taq xtinbʼij chawä chë kixtzolin pä, rma Herodes xtkanuj ri akʼal rchë nukamsaj». 14 Rma riʼ, José xkatäj ri aqʼaʼ riʼ y xkʼwaj äl ri akʼal chqä María chlaʼ Egipto. 15 Y chlaʼ xekanaj wä qa kʼa taq xkäm Herodes. Ya reʼ xbʼanatäj rchë nbʼetzʼaqät ri rbʼin qa chik Jehová. Ojer qa, ryä xuʼän chë jun chkë ri rprofeta xuʼij reʼ: «Xinskʼij nkʼajol rchë ttel pä Egipto». 16 Taq Herodes xtzʼët chë ri achiʼaʼ ri yekitzʼët ri chʼumilaʼ ma xetzolin ta chik rkʼë, kowan xkatäj ryowal. Rma riʼ, xertäq achiʼaʼ pa tinamït Belén chqä chkipan ri tinamït ri ye kʼo chunaqaj Belén rchë yekikamsaj jontir ri kʼojolaʼ ri kaʼiʼ kijnaʼ chqä ri majanä tuʼän kaʼiʼ kijnaʼ. Ryä xuʼij chë kekamsäx ri akʼalaʼ ri ya riʼ kijnaʼ rma ri xkitzjoj qa ri achiʼaʼ ri yetzʼetö ri chʼumilaʼ. 17 Ke riʼ rbʼanik xbʼetzʼaqät ri rbʼin qa chik Dios. Ryä xksaj ri profeta Jeremías rchë xuʼij reʼ: 18 «Pa tinamït Ramá xkʼaxatäj jun mamaʼ oqʼej. Yë Raquel ri kowan najin ntoqʼ chkij ral; ma nrajoʼ ta nbʼuchiʼïx, rma ral ma ye kʼo ta chik rkʼë». 19 Taq ya kamnäq chik Herodes, José chlaʼ Egipto kʼo wä. Ya riʼ taq r·ángel Jehová xtzjon rkʼë José chpan jun achïkʼ, 20 y xuʼij reʼ che rä: «Kakatäj, takʼwaj äl ri akʼal chqä rteʼ y kixtzolin pa tinamït Israel, rma xekäm yän ri xkajoʼ xkikamsaj ri akʼal». 21 Rma riʼ ryä xkatäj y xkʼwaj ri akʼal chqä María pa tinamït Israel. 22 Ye kʼa ma xtzolin ta Judea rma xxiʼij riʼ taq xkʼoxaj chë Arquelao xkanaj pa rkʼexel Herodes, ri rtataʼ, chpan ri qʼatbʼäl tzij. Chqä, rma Dios xuʼij pä che rä chpan jun chik achïkʼ chë ma ttzolin ta chriʼ, ryeʼ xebʼä äl Galilea. 23 Y xekanaj qa chpan jun tinamït ri Nazaret rbʼiʼ. Ke riʼ rbʼanik xbʼetzʼaqät ri kibʼin qa chik ri profetas, ryeʼ xkiʼij: «Nazareno xtbʼix che rä».