Lucas

2 Chkipan ri qʼij riʼ, César Augusto xuʼij chë jontir winäq nkʼatzin nkitzʼibʼaj kibʼiʼ. 2 Ya reʼ ri naʼäy mul xbʼan reʼ taq Quirinio najin wä nuqʼät tzij pa rwiʼ Siria. 3 Rma riʼ jontir xkibʼetzʼibʼaj kibʼiʼ chpan ri tinamït ri akuchï xeʼaläx wä. 4 José chqä xuʼän riʼ. Ryä kʼo wä Nazaret, jun tinamït ri kʼo Galilea. Ye kʼa, rma pa rjatzul David petenäq wä, xjoteʼ pa rtinamit David ri Belén rbʼiʼ ri kʼo Judea. 5 Ryä xbʼä rkʼë María, ri ya rxjayil wä chik, rchë nkibʼetzʼibʼaj kibʼiʼ. Y María ya njeʼ wä ral. 6 Taq ye kʼo wä Belén, xbʼeqä ri qʼij rchë María njeʼ ral. 7 Y xaläx ri naʼäy ral, jun ti kʼajol. Y xpïs chkipan rkʼaj tzyäq chqä xyaʼ chpan jun ri akuchï yewaʼ wä ri chköp, rma ma xkïl ta chik akuchï yekanaj wä. 8 Chunaqaj ri akuchï ye kʼo wä ryeʼ ye kʼo wä ajyuqʼ pa jyuʼ ri najin wä yekichajij kikarneʼl chaqʼaʼ. 9 Chaq kʼateʼ r·ángel Jehová xkʼüt pä riʼ chkiwäch y jun saqïl ri petenäq rkʼë Jehová xsaqirsaj akuchï ye kʼo wä, y ryeʼ kowan xkixiʼij kiʼ. 10 Ye kʼa ri ángel xuʼij reʼ chkë: «Ma tixiʼij ta iwiʼ, rma nkʼamon pä ütz taq rtzjol ri xtuʼän chë jontir ri winäq kiʼ kikʼuʼx xtkiʼän. 11 Rma re qʼij reʼ, chpan rtinamit David, xaläx ri xtkolö iwchë, y ya riʼ Cristo, ri Ajaw. 12 Ya reʼ rbʼanik xtitamaj achkë riʼ: xtiwïl jun neʼy ri pison chpan rkʼaj tzyäq, ri yaʼon chpan jun ri akuchï yewaʼ wä ri chköp». 13 Chaq kʼateʼ xeqʼalajin pä rkʼë ri ángel riʼ ye kʼïy ángeles ri najin wä nkiyaʼ rqʼij Dios chqä nkiʼij: 14 «Tyaʼöx rqʼij Dios ri kʼo chkaj, y chwäch le Rwachʼlew, ri winäq ri ütz yetzʼet rma Dios jnan tbʼanaʼ kiwäch rkʼë». 15 Taq ri ángeles xetzolin äl chkaj, ri ajyuqʼ xkiʼij reʼ chkiwäch: «Kʼo chë nqbʼä Belén rchë nqatzʼët ri xbʼanatäj, ri xuʼij pä Jehová chqë». 16 Rma riʼ, xkinbʼej äl kiʼ pa bʼey, y xkïl María, José chqä ri akʼal, ri kʼo wä chpan ri akuchï yewaʼ wä ri chköp. 17 Taq xkitzʼët riʼ, ryeʼ xkiʼij ri xuʼij ri ángel chkë chrij ri akʼal. 18 Y jontir ri xekʼoxan kichë re achiʼaʼ reʼ kan xel kikʼuʼx rma ri xkitzjoj. 19 Ye kʼa María xerkʼöl jontir re tzij reʼ pa rjolon y xquʼ rij achkë ntel chë tzij jontir riʼ. 20 Ri ajyuqʼ xetzolin chkitzʼetik kikarneʼl, y taq ye bʼenäq äl, xetyoxin äl che rä Dios chqä xkiyaʼ äl rqʼij rma jontir ri xkitzʼët chqä xkikʼoxaj, rma xbʼanatäj kan achiʼel xbʼix chkë. 21 Taq 8 qʼij alaxnäq ri akʼal, taq xapon ri qʼij rchë nqpïx ri peraj rchʼakul ri akuchï nchlun wä, xkiyaʼ rbʼiʼ, Jesús xkiʼij che rä, ri bʼiʼaj ri xuʼij ri ángel taq María majanä wä tkanaj pa yabʼil. 22 Chqä taq ya nkʼatzin wä nkitzüj jun spanïk chwäch Dios rchë chʼajchʼöj yetzʼet rma ryä, achiʼel nuʼij Rpixaʼ Moisés, xejoteʼ Jerusalén rkʼë ri akʼal rchë xkikʼwaj chwäch Jehová. 23 Ryeʼ xkiʼän riʼ rchë nkismajij reʼ ri nuʼij chpan Rpixaʼ Jehová: «Jontir ri naʼäy taq kʼojolaʼ ri yeʼaläx kʼo chë yeʼok rchë Jehová». 24 Rma riʼ xkiʼän jun spanïk achiʼel nuʼij Rpixaʼ Jehová, ri nuʼij: «Rïx kʼo chë niyaʼ kaʼiʼ palomas o kaʼiʼ kal palomas». 25 Chkipan ri qʼij riʼ, chriʼ Jerusalén kʼo wä jun achï ri Simeón rbʼiʼ. Re achï reʼ rkʼwan wä jun jïk kʼaslemal chqä nuyaʼ wä rqʼij Dios, y ryoʼen wä ri qʼij taq Dios xttoʼ Israel. Chqä re achï reʼ kʼo wä ri loqʼoläj rchqʼaʼ Dios pa rwiʼ. 26 Dios xksaj ri loqʼoläj uchqʼaʼ riʼ rchë xuʼij pä che rä chë xttzʼët na ri rchaʼon Jehová kʼa riʼ xtkäm. 27 Rma riʼ ri loqʼoläj rchqʼaʼ Dios xuʼän chë Simeón xok apü pa templo. Taq José y María xkikʼwaj äl Jesús pa templo chqä xeʼok apü rchë nkiʼän ri nukʼutuj Rpixaʼ Moisés rma ri akʼal, 28 Simeón xchʼelej ri akʼal, xyaʼ rqʼij Dios chqä xuʼij: 29 «Nimaläj Qʼatöy Tzij, komä xintzʼët rwäch ri akʼal achiʼel xaʼij. Rma riʼ komä, tapeʼ xkikäm, kiʼ nkʼuʼx, 30 rma xintzʼët achkë xtkolö ri atinamit, 31 ri xatäq pä rchë ntzʼet kimä jontir ri tinamït. 32 Ryä achiʼel jun saqïl ri xtuʼän chë ri winäq ri ma ye judíos ta xketzuʼun, y xtuʼän chë ri atinamit Israel kan kʼo rqʼij xtjeʼ». 33 Ri rteʼ rtataʼ ri akʼal kan xel kikʼuʼx rma jontir ri xbʼix chrij. 34 Chqä Simeón xkʼutuj rtzil Dios pa kiwiʼ y xuʼij reʼ che rä María, ri rteʼ ri akʼal: «Takʼoxaj reʼ, re akʼal reʼ xtuʼän chë ye kʼïy xketzaq chqä ye kʼïy xkekatäj, y ye kʼïy itzel xketzjon chrij tapeʼ xtqʼalajin chë Dios kʼo rkʼë. 35 Ya reʼ xtbʼanatäj rchë xtbʼeqʼalajin achkë kʼo pa kan ye kʼïy winäq. Y rït xtatäj poqän kan achiʼel nutäj poqän jun winäq ri nsokotäj rkʼë jun mamaʼ espada». 36 Chqä chpan ri templo kʼo wä Ana, jun malkaʼn ri xa xuʼ 7 jnaʼ xjeʼ rkʼë rchjil. Ryä rmiʼal wä Fanuel chqä rjatzul Aser. Re ixöq reʼ nuqʼaxaj wä rtzij Dios chqä ya riʼj wä chik. 37 Chpan ri tiempo riʼ, 84 chik rjnaʼ. Ryä ronojel mul nbʼä wä pa templo rchë nuyaʼ rqʼij Dios paqʼij chë chaqʼaʼ. Taq ryä nuʼän riʼ, ma nwaʼ ta wä chqä nutäj wä rqʼij chrij Dios chë ttoʼ rtinamit. 38 Ryä xertzʼët apü José y María chqä xjelun apü kikʼë, y xtyoxin che rä Dios, chqä xchäp rtzjoxik ri akʼal chkë jontir ri kiyoʼen ri qʼij taq Jerusalén xtkolotäj. 39 Taq José y María xkiʼän yän jontir ri nukʼutuj Rpixaʼ Jehová, ryeʼ xetzolin pa kitinamit Nazaret, ri kʼo Galilea. 40 Ri akʼal ütz wä rwäch najin nkʼïy qʼanäj chqä najin wä njeʼ pä rnaʼoj. Y ronojel mul xqʼalajin chë kʼo Dios rkʼë. 41 Ri rteʼ rtataʼ ronojel jnaʼ rkʼulun wä chkë yebʼä Jerusalén rchë nkiʼän ri Pascua. 42 Taq ryä kʼo wä 12 rjnaʼ, xejoteʼ Jerusalén pa nmaqʼij kan achiʼel wä rkʼulun chkë nkiʼän. 43 Taq xkʼis ri nmaqʼij, ryeʼ xkichäp kibʼey rchë yetzolin chkachoch. Ye kʼa Jesús xkanaj qa Jerusalén, y rteʼ rtataʼ ma xkinaʼej ta. 44 Ryeʼ xkiquʼ chë Jesús kʼo äl chkikojöl jontir ri winäq ri najin yetzolin äl. Taq xebʼiyïn yän jun qʼij, xkichäp rkanuxik chkikojöl kichʼalal chqä ri kitaman kiwäch. 45 Ye kʼa rma ma xkïl ta, xetzolin Jerusalén chqä xkichäp rkanuxik. 46 Oxiʼ qʼij chrij riʼ, xkibʼewlaʼ pa templo. Ryä tzʼyül wä chkikojöl ri yekʼutü Rpixaʼ Moisés, najin wä yerkʼoxaj chqä najin wä nuʼän kʼutunïk chkë. 47 Y jontir ri xekʼoxan rchë kan xel kikʼuʼx, rma kan nqʼax pa rjolon ri nbʼix che rä chqä rma ri nuʼij apü taq kʼo nkikʼutuj che rä. 48 Taq rteʼ rtataʼ xkitzʼët, kowan xel kikʼuʼx. Y rteʼ xuʼij reʼ che rä: «Wal, ¿achkë rma xaʼän chë kowan xchʼpü qakʼuʼx? Atat chqä rïn kowan qatjon qaqʼij chakanuxik». 49 Ye kʼa ryä xuʼij reʼ chkë: «¿Achkë rma najin yinikanuj? Kʼo ta chë itaman chë nkʼatzin yijeʼ pa rachoch Ntataʼ». 50 Ye kʼa ryeʼ ma xqʼax ta pa kijolon ri xuʼij chkë. 51 Chrij riʼ, Jesús xtzolin äl kikʼë rteʼ rtataʼ pa tinamït Nazaret, y ronojel mul xnmaj kitzij. Y rteʼ kan xkʼöl qa jontir ri tzij riʼ pa rjolon. 52 Y loman Jesús najin nkʼïy qʼanäj, najin chqä njeʼ más rnaʼoj. Y kan ütz wä ntzʼetetäj rma Dios chqä kimä ri winäq.