Ageo

2 «Ya reʼ nuʼij Jehová, ri ukʼwayon bʼey chkiwäch ri ángeles: ‹Ri winäq rchë re tinamït reʼ nkiʼij: «Majanä tbʼeqä ri qʼij rchë nqayäk chik jmul rachoch Jehová»›». 3 Jehová chqä xksaj ri profeta Ageo rchë xuʼij reʼ: 4 «¿Ya reʼ komä ri tiempo rchë chë rïx yixjeʼ chkipan jaʼäl taq jay ri bʼanon kikʼë tzʼalän, ye kʼa ri wachoch rïn xa wulan qa? 5 Tikʼoxaj kʼa achkë nuʼij Jehová, ri ukʼwayon bʼey chkiwäch ri ángeles: ‹Tiquʼ iwiʼ rkʼë ri najin niʼän. 6 Tapeʼ kan kʼïy itkoʼn ibʼanon qa, xa jbʼaʼ ok rwäch nimöl. Tapeʼ yixwaʼ, ma nnuj ta ipan. Tapeʼ niqüm yaʼ, ma nkʼïs ta ri chaqiʼj chiʼ chiwä. Niksaj itzyaq, ye kʼa ma yixmeqʼeʼ ta. Y ri oknäq rsamajel jun chik, achiʼel ta xa najin nukʼöl ri rajäl rqʼij chpan jun yaʼl ri ryon teqʼetïk kʼo che rä›». 7 «Ya reʼ nuʼij Jehová, ri ukʼwayon bʼey chkiwäch ri ángeles: ‹Tiquʼ iwiʼ rkʼë ri najin niʼän›. 8 Ya reʼ chqä nuʼij Jehová: ‹Kixjoteʼ pa rwiʼ njyuʼ, tikʼwaj äl cheʼ chqä tiyakaʼ wachoch, rchë ke riʼ kiʼ nkʼuʼx nbʼän chqä rchë nyaʼöx nqʼij chpan›». 9 «‹Kan kʼïy wä iyoʼen nikʼül, ye kʼa xa jbʼaʼ ok xikʼül. Y taq xikʼwaj äl chiwachoch, xinxpuj äl chiwäch. ¿Achkë rma? —nuʼij Jehová, ri ukʼwayon bʼey chkiwäch ri ángeles—. Rma ri wachoch rïn xa wulan qa, ye kʼa jontir rïx xa bʼenäq ikʼuʼx chrij ri kichajxik ri iwachoch. 10 Rma riʼ, ri kaj ri kʼo pan iwiʼ rïx ma xyaʼ ta pä chik ri raxqʼabʼ y le Rwachʼlew ma xyaʼ ta chik rwäch. 11 Y rïn xinbʼän chë xchaqiʼj rwäch le Rwachʼlew, kiwäch ri jyuʼ, kiwäch ri tkoʼn chqä rwäch jontir ri nkʼïy pä chwäch le Rwachʼlew. Xinbʼän chë xkʼis ri kʼakʼakʼ vino chqä ri aceite, y xinbʼän chë ma xpë ta chik jöbʼ pa kiwiʼ ri achiʼaʼ, ri chköp, y pa rwiʼ jontir ri xkiʼän ri achiʼaʼ rkʼë kiqʼaʼ›».