Esdras

6 «Rma riʼ rïx, Tatenái —ri qʼatöy tzij pa kiwiʼ ri tinamït ri ye kʼo pa oeste rchë ri raqän yaʼ Éufrates—, Setar-Bozenái chqä ri rchiʼil —ri qʼatöy taq tzij ri ma kan ta más kiqʼij ri yeqʼatö tzij pa kiwiʼ ri tinamït ri ye kʼo pa oeste rchë ri raqän yaʼ Éufrates— ma kixjelun ta apü kikʼë. 7 Ma tiqʼät ta ri samaj najin nbʼan chrij ri rachoch Dios. Ri qʼatöy tzij pa kiwiʼ ri judíos chqä ri ye ukʼwayon bʼey chkiwäch ri judíos xtkiyäk chik jmul rachoch Dios kan akuchï kʼo wä rbʼanon qa. 8 Chqä, rchë yeʼitoʼ ri ukʼwäy taq bʼey riʼ rchë nkiyäk chik jmul rachoch Dios, nbʼij reʼ chiwä: rchë ma ntaneʼ ta ri samaj, rïx kʼo chë niyaʼ yän ri päq chkë ri xtkisäch chrij ri jay. Ri päq riʼ tiwesaj chpan kirajil ri qʼatöy taq tzij ri yeʼimöl chkipan ri tinamït ri ye kʼo pa oeste rchë ri raqän yaʼ Éufrates. 9 Y ronojel qʼij kʼo chë niyaʼ chkë ri sacerdotes rchë Israel ri xtkikʼutuj chiwä, xa bʼa achkë xtkʼatzin chkë: aläj taq wakx, achij taq karneʼl chqä aläj taq karneʼl rchë yeporöx chwäch ri Dios rchë ri kaj, chqä trigo, atzʼan, vino chqä aceite. 10 Ke riʼ ryeʼ ronojel mul xkekowin xtkiporoj spanïk chwäch ri Dios rchë ri kaj chqä xtkikʼutuj utzil pa rwiʼ ri qʼatöy tzij chqä pa kiwiʼ ri ralkʼwal. 11 Chqä nbʼij chiwä chë we kʼo jun ma nunmaj ta tzij chwäch re pixaʼ reʼ, kʼo chë nijöqʼ jun raqän cheʼ che rä rachoch chqä nitzeqebʼaʼ ri winäq riʼ chwäch. Y rachoch ttok jun akuchï yechlun wä ri winäq rma xqʼäj ri pixaʼ riʼ. 12 Y yë ta kʼa ri Dios ri xbʼanö chë ri rbʼiʼ njeʼ Jerusalén tchpü rwäch xa bʼa achkë qʼatöy tzij o tinamït ri ma xtnman ta tzij chwäch re pixaʼ reʼ chqä xtrajoʼ xtchüp rwäch ri rachoch Dios, ri kʼo Jerusalén. Rïn, Darío, yibʼin riʼ. Kan tbʼan yän ri xinbʼij». 22 Chqä kan rkʼë kiʼkʼuxlal xkiʼän ri Nmaqʼij kichë ri Kaxlanwäy ri Majun ta Chʼäm kikʼë. Ryeʼ 7 qʼij xkiʼän ri nmaqʼij riʼ, rma Jehová kan xuʼän chë ryeʼ xkinaʼ kiʼkʼuxlal chqä xuʼän chë ri qʼatöy tzij rchë Asiria xertoʼ chyakik ri rachoch ri kʼaslïk Dios, ri rDios Israel.