Esdras

3 Taq xapon ri séptimo ikʼ y ri israelitas ye kʼo wä chik pa kitinamit, jontir xkimöl kiʼ pa Jerusalén rma kan xkiyaʼ chkiwäch nkiʼän riʼ. 2 Jesúa —ri rkʼajol Jehozadac— chqä ri nkʼaj chik sacerdotes ri ye rchiʼil, chqä Zorobabel —ri rkʼajol Sealtiel— chqä ri rchʼalal, xkichäp ryakik ri altar rchë ri Dios rchë Israel rchë xekiporoj sacrificios pa rwiʼ, kan achiʼel wä tzʼibʼatäl qa chpan ri Rpixaʼ Moisés, ri rsamajel ri kʼaslïk Dios. 3 Y tapeʼ nkixiʼij wä kiʼ chkiwäch ri tinamït ri ye kʼo naqäj, ryeʼ xkiyäk ri altar kan akuchï kʼo wä rbʼanon qa. Y xekiporoj sacrificios pa rwiʼ che rä Jehová: ri sacrificios rchë nmaqʼaʼ chqä rchë tqaqʼij. 4 Kʼa riʼ xkiʼän ri nmaqʼij kichë ri jay ri ye bʼanon rkʼë rqʼaʼ cheʼ, achiʼel wä tzʼibʼatäl qa, y ronojel qʼij xekiporoj ri sacrificios ri kʼo wä chë yeporöx jojun qʼij. 5 Chrij riʼ xeporöx ri sacrificios ri chaq taqïl kʼo wä chë yebʼan, ri sacrificios ri yebʼan taq naläx ri ikʼ y ri sacrificios ri yebʼan chkipan ronojel ri nmaqʼij ri loqʼoläj chwäch Jehová, chqä ronojel ri spanïk ri xa bʼa achkë najowan nyaʼö che rä Jehová. 6 Y kan chpan ri naʼäy qʼij rchë ri séptimo ikʼ xkichäp pä ryaʼik sacrificios che rä Jehová, tapeʼ majanä wä tyaʼöx ri rxeʼel ri rtemplo Jehová. 10 Taq ri samajelaʼ xkiyaʼ rxeʼel ri rtemplo Jehová, ri sacerdotes kiksan wä ri tzyäq ri kʼo wä chë nkiksaj ri sacerdotes chqä kikʼwan wä ri trompetas, y ri levitas, ri ye rkʼajol Asaf, kikʼwan wä ri címbalos. Jontir ryeʼ xepaʼeʼ qʼanäj rchë xkiyaʼ rqʼij Jehová kan achiʼel wä rbʼin qa David, ri qʼatöy tzij rchë Israel. 11 Y xkichäp ryaʼik rqʼij Jehová chqä xetyoxin che rä. Ryeʼ nkijalalaʼ wä kiʼ rchë xkibʼixaj re bʼix reʼ: «Ryä kan ütz rnaʼoj; ri nimaläj rajowabʼäl chrij Israel majun bʼëy xtkʼis ta». Chrij riʼ, ronojel ri tinamït kan rkʼë kuw kichʼaʼäl xkiyaʼ rqʼij Jehová rma xyaʼöx rxeʼel ri rachoch Jehová. 12 Kan ye kʼïy chkë ri sacerdotes, ri levitas chqä ri ye ukʼwayon bʼey chkiwäch ri tinamït —ri kʼo wä chik kijnaʼ chqä xkitzʼët ri naʼäy templo— kan xkiräq kichiʼ chë oqʼej taq xkitzʼët chë najin wä nyaʼöx rxeʼel ri jay. Ye kʼa nkʼaj chik kan rkʼë ronojel kichqʼaʼ xkiräq kichiʼ rma ri kiʼkʼuxlal xkinaʼ. 13 Ronojel riʼ xuʼän chë ma kan ta xkʼaxatäj we najin nkiräq kichiʼ rma oqʼej o rma kiʼkʼuxlal. Ri winäq kan kowan wä kuw xkiräq kichiʼ y rma riʼ kan kʼa näj xkʼaxatäj wä.