Esdras

4 Ri winäq ri itzel wä nkinaʼ chkë ri winäq aj Judá chqä aj Benjamín xkikʼoxaj chë ri israelitas ri xetzolin pä chpan ri kitinamit najin wä nkiyäk jun templo che rä Jehová, ri rDios Israel. 2 Rma riʼ, kan chaninäq xepë rkʼë Zorobabel chqä kikʼë ri ye ukʼwayon bʼey chkiwäch ri tinamït y xkiʼij chkë: «Tiyaʼ qʼij chqë rchë nqsamäj iwkʼë. Röj chqä nqayaʼ rqʼij ri iDios rïx y kan qabʼanon pä sacrificios che rä kan xa xuʼ taq Esar-Hadón, ri xqʼatö tzij Asiria, xqrkʼäm pä chpan re tinamït reʼ». 3 Ye kʼa Zorobabel, Jesúa chqä ri nkʼaj chik ukʼwäy taq bʼey pa rwiʼ ri tinamït Israel, xkiʼij chkë: «Rïx ma xtiyäk ta ri jay qkʼë röj ri xtqaʼän che rä ri qaDios. Röj qayonïl xtqayäk ri rachoch Jehová, ri rDios Israel, achiʼel wä xuʼij pä Ciro chqë, ri qʼatöy tzij rchë Persia». 4 Rma riʼ, ri winäq ri ye kʼo wä pa taq tinamït chunaqaj Jerusalén xkiyüj kikʼuʼx ri judíos rchë ma nkiyäk ta chik ri jay. 5 Y xkitöj pa kiqʼaʼ ri ajnaʼoj taq winäq rchë nkiʼän chë ri israelitas ma nkiʼän ta ri kichʼobʼon wä nkiʼän. Xkiʼän riʼ chpan ronojel qʼij ri xqʼät tzij Ciro, ri qʼatöy tzij rchë Persia, kʼa taq xchapatäj rqʼatbʼäl tzij Darío, ri qʼatöy tzij rchë Persia. 6 Taq xchapatäj rqʼatbʼäl tzij Asuero, ri winäq riʼ xkitzʼibʼaj äl jun wuj ri akuchï xetzjun wä äl chkij ri winäq aj Judá chqä aj Jerusalén. 7 Y taq Artajerjes, ri qʼatöy tzij rchë Persia, najin wä nuqʼät tzij, Bislam, Mitrídates y Tabeel chqä ri nkʼaj chik kichiʼil xkitzʼibʼaj äl jun wuj che rä Artajerjes, ri qʼatöy tzij. Ryeʼ xkiqʼaxaj ri wuj riʼ pa chʼaʼäl arameo chqä xkitzʼibʼaj äl kikʼë letras arameas. 11 Re wuj reʼ nukʼüt achkë nuʼij chpan ri wuj ri xkitäq äl che rä). «Röj, ri asamajelaʼ ri yoj kʼo pa oeste che rä ri raqän yaʼ Éufrates, nqatäq äl re wuj reʼ chawä rït Artajerjes, ri qʼatöy tzij: 12 Nqaʼij äl chawä rït, ri qʼatöy tzij, chë ri judíos ri ye kʼo wä akuchï yït kʼo wä rït chqä xejoteʼ pä akuchï yoj kʼo wä röj, xeʼapon pa Jerusalén. Ryeʼ najin nkiyäk chik jmul ri itzel tinamït ri ma nkinmaj ta tzij ri rwinaq, chqä ya nkikʼïs ryakik ri tzʼaq ri kʼo chrij ri tinamït y najin chqä nkichojmij ri rxeʼel. 13 Chqä nqayaʼ äl rbʼixik chawä rït, ri qʼatöy tzij, chë we ryeʼ nkiyäk chik jmul ri tinamït chqä ri tzʼaq ri kʼo chrij, ryeʼ ma xtkitäq ta äl chik ri päq ri kʼo chë nkiyaʼ chawä. Y riʼ xtuʼän chë ma xtapon ta chik päq chpan ri kibʼeyomal ri qʼatöy taq tzij. 14 Röj yë ri qʼatbʼäl tzij ri ntojö rajäl qaqʼij, y nqatzʼët chë ma pa rbʼeyal ta we nqayaʼ qʼij chë nbʼan jun itzelal chawä rït, ri qʼatöy tzij. Rma riʼ, nqatäq äl re wuj reʼ rchë nqayaʼ äl rbʼixik chawä 15 chqä rchë nqaʼij äl chë tnukʼüx rwäch ri wuj ri tzʼibʼan qa kimä ri qʼatöy taq tzij ri xejeʼ naʼäy chawäch rït. Rkʼë ri xtatzʼët chpan ri wuj riʼ, xtanaʼej chë ri tinamït riʼ kan itzel, rma yertzʼlaʼ qʼatöy taq tzij chqä nkʼaj chik tinamït, chqä chë ri rwinaq kan ojer riʼ nqä chkiwäch yekatäj pä chkij ri qʼatöy taq tzij. Rma riʼ xchuptäj rwäch ri tinamït riʼ. 16 Chqä nqaʼij äl chawä rït, ri qʼatöy tzij, chë we ryeʼ nkiyäk chik jmul ri tinamït chqä ri tzʼaq ri kʼo chrij, rït ma xkakowin ta chik xtaqʼät tzij pa kiwiʼ ri tinamït ri ye kʼo pa oeste che rä ri raqän yaʼ Éufrates».