Zacarías

4 Ri ángel ri najin wä ntzjon wkʼë xtzolin pä chqä xirkʼasoj kan achiʼel nkʼasöx jun winäq ri warnäq. 2 Ya riʼ taq xkʼutuj chwä: «¿Achkë najin natzʼët?». Rïn xinbʼij: «Najin ntzʼët jun kantil ri bʼanon rkʼë oro, ri kʼo jun mamaʼ läq pa rwiʼ. Ri kantil kʼo 7 qʼaqʼ che rä, y ri qʼaqʼ, ri ye kʼo pa rwiʼ, kʼo 7 tubos chkë. 3 Y chuxkïn ri kantil kʼo kaʼiʼ rcheʼ olivo, jun pa rderecha ri mamaʼ läq y jun chik pa rizquierda». 4 Rma riʼ, xinkʼutuj che rä ri ángel ri najin wä ntzjon wkʼë: «Tat, ¿achkë yeʼel chë tzij reʼ?». 6 Rma riʼ ryä xuʼij chwä: «Ya reʼ ri nuʼij Jehová che rä Zorobabel: ‹«Ma rma ta ye kʼo ye kʼïy soldados awkʼë o ma rma ta kʼo awchqʼaʼ xkakowin xtaʼän riʼ, xa xuʼ rkʼë ri wchqʼaʼ rïn», nuʼij Jehová, ri ukʼwayon bʼey chkiwäch ri ángeles. 7 Nimaläj jyuʼ, ¿yït achkë rït? Chwäch Zorobabel xkatok jun liʼon ilew. Y ryä kan rkʼë kuw rchʼaʼäl xtuʼij «¡Kan janina ütz! ¡Kan janina ütz!» taq xtresaj äl ri rkʼisbʼäl abʼäj›». 8 Jehová xtzjon pä chik jmul wkʼë. Ryä xuʼij: 9 «Ri rqʼaʼ Zorobabel xyaʼö rxeʼel re jay reʼ, y rqʼaʼ ryä xtkʼisö ryakik. Y kʼo chë xtatamaj chë Jehová, ri ukʼwayon bʼey chkiwäch ri ángeles, xitaqö pä iwkʼë rïx. 10 Rma majun ta jun winäq itzel nutzʼët ri qʼij taq kʼo jun nchap rbʼanik, tapeʼ majun ta rqʼij nqʼalajin. Rma ryeʼ kan kiʼ kikʼuʼx xtkiʼän chqä xtkitzʼët ri plomo ri kʼo pa rqʼaʼ Zorobabel. Re 7 reʼ ya riʼ ri rnaqʼ rwäch Jehová, ri najin nkitzʼët jontir le Rwachʼlew». 11 Rma riʼ xinkʼutuj che rä: «¿Achkë nkikʼambʼej tzij re kaʼiʼ rcheʼ olivo reʼ ri kʼo pa rderecha chqä pa rizquierda ri kantil?». 12 Chqä xinbʼän re jun chik kʼutunïk reʼ che rä: «¿Achkë nkikʼambʼej tzij ri kaʼiʼ rxaq olivo ri akuchï ntel wä pä ri aceite ri nqä pä chkipan ri kaʼiʼ tubos ri yebʼanon rkʼë oro?». 13 Ryä xuʼij chwä: «¿Ma ataman ta achkë nkikʼambʼej tzij reʼ?». Rïn xinbʼij che rä: «Manä tat, ma ntaman ta». 14 Ryä xuʼij: «Ya reʼ ri kaʼiʼ achiʼaʼ yerchaʼon Dios ri ye paʼäl chuxkïn ri Ajaw pa rwiʼ jontir le Rwachʼlew».