Lucas
5 Chrij riʼ, ri Diablo xkʼwaj pa rwiʼ jun jyuʼ y xkʼüt jontir ri qʼatbʼäl taq tzij chwäch ri ye kʼo chwäch le Rwachʼlew. 6 Ya riʼ taq ri Diablo xuʼij reʼ che rä: «Xtinyaʼ jontir re qʼatbʼäl taq tzij reʼ chawä chqä xtaqʼät tzij pa kiwiʼ, rma jontir re qʼatbʼäl taq tzij reʼ wchë rïn, y rïn yitzʼetö achoq che rä nyaʼ wä. 7 Rma riʼ, xa rkʼë jmul xkaxkeʼ chi nwäch rchë xtayaʼ nqʼij, jontir reʼ xttok awchë». 8 Jesús xuʼij che rä: «Tzʼibʼatäl qa: ‹Tayaʼ rqʼij Jehová ri aDios y xa xuʼ ryä tanmaj rtzij›». 16 Chrij riʼ xbʼä Nazaret, akuchï xkʼïy wä, y, achiʼel wä nuʼän ronojel sábados, xok pa sinagoga y xpaʼeʼ qʼanäj rchë nuskʼij rwäch Rchʼaʼäl Dios. 17 Rma riʼ, xkiqʼaxaj pä ri rollo rchë ri profeta Isaías che rä. Ryä xjäq y xrïl ri peraj ri akuchï tzʼibʼatäl wä reʼ: 18 «Jehová ryaʼon pä ri loqʼoläj rchqʼaʼ pa nwiʼ, rma xirchaʼ rchë ntzjoj ri ütz taq rtzjol chkë ri pobres. Ryä xirtäq rchë nbʼeʼij chkë ri ye xmïl pa samaj chë xkekol chqä chë xtjaq kiwäch ri moyiʼ, rchë nkʼuqbʼaʼ kikʼuʼx ri najin nkitäj poqän, 19 rchë ntzjoj ri tiempo taq Jehová ütz xkertzʼët ri winäq». 20 Chrij riʼ xbʼör ri rollo, xtzolij che rä jun chkë ri ntoʼon pa sinagoga y xtzʼyeʼ qa. Jontir ri ye kʼo wä chriʼ najin wä nkitzuʼ. 21 Ryä xuʼij reʼ chkë: «Komä najin ntzʼaqät re peraj reʼ che rä ri Loqʼoläj taq Wuj ri kʼa riʼ xikʼoxaj qa». 22 Jontir kan ütz xetzjon chrij y kan xel kikʼuʼx che rä rma ri jaʼäl taq tzij ri yeruʼij. Ryeʼ nkiʼij wä reʼ: «Ryä rkʼajol José, ¿tapeʼ?». 23 Rma riʼ, xuʼij reʼ chkë: «Rïn ntaman chë rïx xtiksaj re tzij reʼ chwij: ‹Doctor, tak’achojsaj qa awiʼ rït›. Y xtiʼij: ‹Tabʼanaʼ chqä aweʼ jontir ri xqakʼoxaj chë xaʼän Capernaúm›». 24 Ryä chqä xuʼij: «Majun ta jun profeta ri ütz ntzʼet chpan rtinamit. 25 Achiʼel pa rqʼij qa Elías, kan ye kʼïy wä malkaʼn taq ixoqiʼ ye kʼo Israel taq ma xqä ta jöbʼ oxiʼ jnaʼ rkʼë nkʼaj, y xpë jun mamaʼ wayjal chwäch jontir ri tinamït riʼ. 26 Ye kʼa Elías ma xtaq ta rkʼë jun chkë ri ixoqiʼ riʼ, xa kan xtaq rkʼë jun malkaʼn ixöq aj Sarepta ri kʼo pa tinamït Sidón. 27 Y pa rqʼij qa ri profeta Eliseo, kan ye kʼïy wä winäq ri ye kʼo Israel kʼo lepra chkij. Ye kʼa ryä ma xk’achojsaj ta jun chkë ryeʼ. Xa xuʼ xk’achojsaj Naamán, ri sirio». 28 Taq ri ye kʼo pa sinagoga xkikʼoxaj riʼ, kowan xkatäj kiyowal. 29 Rma riʼ, xekatäj, xkesaj äl pa tinamït y xkikʼwaj äl kʼa pa rwiʼ ri jyuʼ ri achoq pa rwiʼ yakon wä kitinamit rchë nkikʼäq äl chriʼ. 30 Ye kʼa ryä xqʼax äl chkikojöl ryeʼ y xbʼä äl. 43 Ye kʼa ryä xuʼij chkë: «Rïn chqä kʼo chë ntzjoj ri ütz taq rtzjol chrij Rqʼatbʼäl Tzij Dios chpan nkʼaj chik tinamït, rma kan rchë ya riʼ xitaq pä».