1 Pedro

2 Kan achiʼel nuʼän jun neʼy ri kan chöj leche nurayij nutäj, rïx chqä kan titjaʼ iqʼij rchë kan nirayij ninukʼuj rwäch Rchʼaʼäl Dios, ke riʼ xtkʼuqeʼ pä ikʼuʼx chqä xtiwïl kolotajïk, 3 ye k’a naʼäy titzʼetaʼ na chë ri Ajaw kan ütz rnaʼoj. 9 Ye kʼa rïx yïx jun ijatzul ri chaʼon rma Dios, jun molaj sacerdotes ri ye qʼatöy tzij, jun loqʼoläj tinamït, jun tinamït ri rchë Dios ri kan kowan rqʼij chwäch, rchë xa bʼa akuchï yïx kʼo wä nitzjoj ri rnaʼoj Dios ri xixesan pä pa qʼequʼn rchë xixurkʼwaj pa nimaläj rsaqil. 10 Rma kʼo jun tiempo rïx ma yïx jun tinamït ta, ye kʼa komä yïx rtinamit Dios; kʼo jun tiempo ma xjyowäx ta iwäch, ye kʼa komä kan jyowan iwäch. 12 Ronojel mul ütz inaʼoj tibʼanaʼ kikʼë jontir winäq, rchë ke riʼ taq xtqʼabʼäx chiwij chë kʼo ma ütz ta najin niʼän, ryeʼ ütz xketzjon chrij ri utziläj ibʼanobʼal; y riʼ xtuʼän chë xtkiyaʼ rqʼij Dios chpan ri qʼij ri xtqʼät tzij pa qawiʼ. 13 Tinmaj kitzij ri ye kʼo chpan ri qʼatbʼäl tzij, achiʼel ri qʼatöy tzij, ri kʼo uchqʼaʼ pa rqʼaʼ. Tibʼanaʼ riʼ rma ri Ajaw. 14 Chqä tinmaj kitzij ri nkʼaj chik qʼatöy taq tzij, y ri yekitaqon ryeʼ rchë nkiyaʼ kʼayewal pa kiwiʼ ri ma ütz ta yekiʼän chqä rchë ütz yetzjon chkij ri yë ri ütz nkiʼän. 17 Ma tiqasaj ta kiqʼij jontir rwäch kijatzul winäq, keʼiwajoʼ jontir iwachʼalal ri ye kʼo chwäch le Rwachʼlew, tixiʼij iwiʼ chwäch Dios, tiyaʼ rqʼij ri qʼatöy tzij. 19 We jun winäq, rma ri rconciencia chwäch Dios, nuköchʼ kʼayewal chqä nutäj poqän tapeʼ majun itzelal ta rbʼanon, riʼ kan jaʼäl ntzʼetetäj. 21 Kantzij na wä chë xa rma reʼ rïx xixskʼïx, rma ri Cristo xtäj poqän iwmä rïx rchë xyaʼ qa jun tzʼetbʼäl chiwäch, rchë chë ke riʼ, rïx yixkowin niʼän kan achiʼel xuʼän ryä. 22 Ryä majun ta mak xuʼän chqä majun ta jun tzʼukün tzij xel pa rchiʼ. 23 Taq najin wä nkiyöqʼ, ryä ma xeryöqʼ ta. Taq najin wä nutäj poqän, ryä ma xuʼij ta chkë chë xttzolij rkʼexel chkë. Pa rkʼexel riʼ, ryä xa xyaʼ qa jontir riʼ pa rqʼaʼ ri kan pa rbʼeyal nqʼatö tzij. 24 Ryä xekʼwan äl ri qamak taq xtzeqebʼäx chwäch ri cheʼ, rchë xresaj ri mak chqij chqä rchë nqkowin nqakʼwaj jun jïk kʼaslemal. Y «rma ri sokotajïk xbʼan che rä rïx xixqʼomäx».