Lucas

7 Xapon kʼa ri qʼij rchë ri Nmaqʼij kichë ri Kaxlanwäy ri Majun ta Chʼäm kikʼë chqä rchë nbʼan ri sacrificio rchë ri Pascua. 8 Rma riʼ Jesús xuʼij reʼ chkë Pedro y Juan: «Jäx y tibʼanaʼ ri nkʼatzin rchë nqaʼän ri Pascua». 9 Ryeʼ xkiʼij che rä: «¿Akuchï nawajoʼ nqaʼän wä?». 10 Ryä xuʼij chkë: «Taq xkixapon pa tinamït, xkixbʼerkʼluʼ jun achï ri rkʼwan jun bʼojoʼy yaʼ. Titzeqelbʼej äl chqä kixok chpan ri jay ri akuchï xttok wä. 11 Y tiʼij reʼ che rä rajaw ri jay: ‹Ri Maestro nuʼij: «¿Akuchï kʼo wä ri jay rchë ntäj ri Pascua kikʼë ntzeqelbʼëy?»›. 12 Y ri achï riʼ xtkʼüt jun mamaʼ cuarto chiwäch ri kʼo pa rwiʼ ri jay ri kʼo jontir chpan ri xtkʼatzin chqë. Chriʼ tibʼanaʼ wä ri nkʼatzin rchë nqaʼän ri Pascua». 13 Ryeʼ xebʼä äl y xbʼanatäj kan achiʼel xuʼij ryä chkë; rma riʼ xkiʼän ri nkʼatzin rchë nkiʼän ri Pascua. 14 Chrij riʼ, taq xapon ri hora, ryä xtzʼyeʼ chuchiʼ mesa kikʼë rapóstoles. 15 Y xuʼij reʼ chkë: «Kan nrayin pä ntäj re Pascua reʼ iwkʼë rïx loman majanä tyaʼöx poqonal pa nwiʼ...; 16 rma chöj nbʼij chiwä chë ma xtintäj ta chik kʼa taq Rqʼatbʼäl Tzij Dios xtqʼät tzij chqä xtbʼetzʼaqät ri ntel chë tzij re rkïl wäy reʼ». 17 Y, taq xyaʼöx jun copa che rä, xtyoxin che rä Dios y xuʼij reʼ chkë: «Tiqmuʼ y tiqʼaxaj chiwäch, 18 rma chöj nbʼij chiwä chë ma xtintäj ta chik vino kʼa taq xtpë Rqʼatbʼäl Tzij Dios». 19 Chrij riʼ, xkʼän apü jun kaxlanwäy, xtyoxin che rä Dios, xwächʼ, xyaʼ chkë chqä xuʼij: «Reʼ nukʼambʼej tzij nchʼakul, ri xtinyaʼ pan iwiʼ rïx. Ma tiyaʼ ta qa rbʼanik reʼ rchë yininataj». 20 Taq xkikʼïs waʼin, ke riʼ chqä xuʼän rkʼë ri copa. Ryä xuʼij chkë: «Re copa reʼ nukʼambʼej tzij ri kʼakʼakʼ chʼobʼoj (pacto), ri xtchapatäj taq xtbʼiyïn nkikʼel xa iwmä rïx. 21 Ye kʼa, tikʼoxaj reʼ, ri xtkʼayin wchë kʼo chrij mesa wkʼë. 22 Rma jontir ri tzʼibʼan qa chwij rïn, ri Ralkʼwal Winäq, kan xtbʼanatäj. Ye kʼa, ¡jyuʼ rwäch ri xtkʼayin wchë!». 23 Taq xkikʼoxaj riʼ, xkikʼutuj chkiwäch achkë chkë ryeʼ xtbʼanö riʼ. 24 Chqä xbʼanatäj jun mamaʼ chʼaʼoj chkiwäch chrij ri achkë chkë ryeʼ kʼo más rqʼij. 25 Ye kʼa ryä xuʼij chkë: «Ri qʼatöy taq tzij pa taq tinamït ye kʼo pa kiwiʼ ri winäq, y ri winäq yekiyaʼ ütz taq bʼiʼaj chkë ri yeqʼatö tzij pa kiwiʼ. 26 Ye kʼa rïx ma tiʼän ta riʼ. Pa rkʼexel riʼ, ri kʼo más rqʼij chikojöl rïx, ttok achiʼel ri más koʼöl, y ri nekʼwan bʼey, ttok achiʼel ri ntoʼon. 27 Rma, ¿achkë kʼo más rqʼij? ¿Ri winäq ri nwaʼ, o ri nqʼaxan pä rway? Yë ri winäq ri nwaʼ, ¿tapeʼ? Ye kʼa rïn yïn kʼo chikojöl rïx achiʼel jun winäq ri nsamäj. 28 Rkʼë jontir ri nqʼaxan pä, yïx rïx ri ronojel mul yïx kʼo wkʼë. 29 Rma riʼ, achiʼel Ntataʼ rbʼanon jun chʼobʼoj (pacto) wkʼë rïn rchë yinok qʼatöy tzij chpan jun qʼatbʼäl tzij, ke riʼ chqä nbʼän jun chʼobʼoj iwkʼë rïx, 30 rchë yixwaʼ chqä rchë niqüm iyaʼ chrij nmesa chpan Nqʼatbʼäl Tzij chqä rchë yixtzʼyeʼ chkipan tronos rchë niqʼät tzij pa kiwiʼ ri 12 rjatzul Israel. 31 Simón, Simón, takʼoxaj reʼ: Satanás nuchʼojij nuyaʼ kʼayewal pan iwiʼ, kan achiʼel nuʼän jun winäq taq nusloj ri trigo rchë nresaj rij. 32 Ye kʼa rïn ntjon nqʼij chrij Dios pan awiʼ rït, rchë ma nkʼis ta akʼuqbʼäl kʼuʼx. Y rït, taq xtatzolij awiʼ, takʼuqbʼaʼ kikʼuʼx awachʼalal». 33 Rma riʼ, Pedro xuʼij: «Ajaw, rïn xkibʼä awkʼë pacheʼ chqä xkikäm awkʼë si ya riʼ najowatäj». 34 Ye kʼa Jesús xuʼij: «Pedro, chöj nbʼij chawä chë rït oxiʼ mul xtaʼij chë ma ataman ta nwäch taq ri äkʼ majanä tskʼin». 35 Ryä chqä xuʼij: «Taq xixintäq y xinbʼij chiwä chë ma tikʼwaj ta irajil ni jun iyaʼl rchë nikʼwaj ri nkʼatzin chiwä nixta ixajabʼ, ¿tapeʼ chë xiwïl ri xkʼatzin chiwä?». Ryeʼ xkiʼij: «¡Jaʼ, ke riʼ!». 36 Rma riʼ, ryä xuʼij chkë: «Ye kʼa komä, ri kʼo rrajil, tkʼwaj äl, chqä tkʼwaj äl jun yaʼl rchë nukʼwaj ri nkʼatzin che rä; y ri majun ta respada, tkʼayij ri tzyäq ri nuyaʼ chrij y tloqoʼ jun. 37 Rma chöj nbʼij chiwä chë kʼo chë nbʼetzʼaqät chwij rïn ya reʼ ri tzʼibʼan qa: ‹Kan jun aleqʼon xtzʼet›. Ya reʼ kan najin chik ntzʼaqät chwij rïn». 38 Rma riʼ ryeʼ xkiʼij reʼ che rä: «Ajaw, tatzʼetaʼ, aweʼ kʼo kaʼiʼ espadas». Ryä xuʼij: «Xa rkʼë le kaʼiʼ laʼ». 39 Taq xel äl akuchï kʼo wä, xbʼä pa jyuʼ Olivos achiʼel wä rkʼulun che rä, y rtzeqelbʼëy xebʼä äl rkʼë. 40 Taq xeʼapon, ryä xuʼij reʼ chkë: «Kixkanaj qa aweʼ chqä kixchʼö rkʼë Dios rchë ma yixqä ta pa mak». 41 Chrij riʼ, xel äl kikʼë y xbʼä apü jbʼaʼ. Ryä xxkeʼ qa y xchʼö rkʼë Dios. 42 Ryä xuʼij: «Tat, si rït nawajoʼ, tawesaj äl re copa reʼ chi nwäch. Ye kʼa ma tbʼanatäj ta ri nwajoʼ rïn, xa kan tbʼanatäj ri nawajoʼ rït». 43 Ya riʼ taq xapon jun ángel rkʼë ri petenäq chkaj y xkʼuqbʼaʼ rkʼuʼx. 44 Tapeʼ ke riʼ, rma ri mamaʼ bʼis nunaʼ, xchʼö na rkʼë Dios rkʼë ronojel ran, y ri yaʼ xel chrij xeʼok kan achiʼel ta tzʼuj kïkʼ ri xeqä pan ilew. 45 Taq xchʼö yän rkʼë Dios, xkatäj y xbʼä akuchï ye kʼo wä rtzeqelbʼëy. Taq xebʼerwlaʼ, xa ye warnäq wä, rma majun ta wä kichqʼaʼ rma ri bʼis. 46 Rma riʼ xuʼij chkë: «¿Achkë rma xa najin yixwär? Kixkatäj y ronojel mul kixchʼö rkʼë Dios rchë ma yixqä ta pa mak». 47 Taq ryä kʼa najin na wä ntzjon, xeʼapon kʼïy winäq chrij. Judas, jun chkë ri Doce, rkʼwan wä bʼey chkiwäch; ryä xjelun rkʼë Jesús rchë xtzʼmaj rchiʼ. 48 Ye kʼa Jesús xuʼij reʼ che rä: «Judas, ¿ke reʼ rbʼanik yinakʼayij rïn, ri Ralkʼwal Winäq?». 49 Taq ri ye kʼo chunaqaj xkitzʼët achkë xtbʼanatäj, xkikʼutuj reʼ che rä: «Ajaw, ¿nqchʼeyon rkʼë espada?». 50 Jun chkë ryeʼ xbʼerkʼamaʼ pä ri espada y xresaj jun rxkïn rmos ri sumo sacerdote. 51 Rma riʼ, Jesús xuʼij: «¡Ma nkʼatzin ta naʼän laʼ!». Chrij riʼ, ryä xchäp rxkïn ri achï riʼ rchë xqʼomaj. 52 Ya riʼ taq Jesús xuʼij reʼ chkë ri sacerdotes ri kʼo más kiqʼij, chkë ri yechajin ri templo chqä chkë ri kʼamöl taq bʼey ri xeʼapon chrij rchë nkiyüt äl: «¿Xikʼäm pä espadas chqä cheʼ chwij kan achiʼel ta yïn jun aleqʼon? 53 Ronojel qʼij xijeʼ iwkʼë pa templo y majun ta xiʼän chwä. Ye kʼa ya reʼ ihora rïx chqä ri hora rchë nkiqʼät tzij ri ye kʼo pa qʼequʼn». 54 Chrij riʼ, xkiyüt rqʼaʼ, xkikʼwaj äl chqä xkiksaj apü pa rachoch ri sumo sacerdote. Y Pedro kʼa chrij yertzeqelbʼen wä äl. 55 Ryeʼ xkibʼöx qʼaqʼ chwäch ri jay chqä jnan xetzʼyeʼ. Pedro tzʼyül wä chkikojöl ryeʼ. 56 Chaq kʼateʼ, jun aj·ikʼ xtzʼët Pedro taq tzʼyül wä chuchiʼ ri qʼaqʼ y xuʼij: «Re achï reʼ bʼenäq wä chqä rkʼë Jesús». 57 Ye kʼa Pedro xuʼij chë ma tzij ta. Ryä xuʼij: «Rïn ma ntaman ta rwäch». 58 Jbʼaʼ chrij riʼ, jun achï xtzʼët y xuʼij reʼ che rä: «Rït chqä yït kichiʼil». Ye kʼa Pedro xuʼij: «Manä, ma yïn kichiʼil ta». 59 Jbʼaʼ ma jun hora chrij riʼ, jun chik achï kan kuw xuʼij reʼ: «¡Kan qʼalaj chë re achï reʼ bʼenäq wä chqä rkʼë! Kan nqʼalajin chë galileo». 60 Ye kʼa Pedro xuʼij: «Ma ntaman ta achkë najin naʼij». Chaq kʼateʼ, loman kʼa najin na ntzjon, xskʼin qʼanäj jun äkʼ. 61 Chqä ri Ajaw xtzuʼ qa Pedro, y Pedro xnatäj che rä taq ri Ajaw xuʼij reʼ che rä: «Rït oxiʼ mul xtaʼij chë ma ataman ta nwäch taq ri äkʼ majanä tskʼin». 62 Rma riʼ, xel äl y xkraj oqʼej. 63 Loman najin nbʼanatäj riʼ, ri achiʼaʼ ri najin wä nkichajij Jesús xetzeʼen chrij chqä xkichʼäy. 64 Y taq xkitzʼapij rpaläj, nkiʼij wä reʼ che rä: «¡Rït ri yït profeta! ¡Taʼij chqë achkë xachʼeyö!». 65 Y kan xkiqasaj rqʼij Dios taq itzel xetzjon chrij Jesús.