Juan

17 Taq Jesús xuʼij yän reʼ, xtzuʼun chkaj y xuʼij: «Tat, xapon ri hora. Tayaʼ rqʼij akʼajol rchë ke riʼ akʼajol xtyaʼ aqʼij rït, 2 rma rït ayaʼon uchqʼaʼ pa rqʼaʼ pa kiwiʼ jontir ri winäq, rchë ke riʼ, chkë ri winäq ri ye ayaʼon qa pa rqʼaʼ, ryä xtyaʼ kikʼaslemal ri majun bʼëy xtkʼis ta. 3 Ye k’a xtkïl ri kʼaslemal ri majun bʼëy xtkʼis ta ri xtkitamaj awäch rït, ri kʼaslïk Dios, chqä xtkitamaj nwäch rïn Jesucristo, ri xinatäq pä chwäch le Rwachʼlew. 4 Rïn nyaʼon aqʼij chwäch le Rwachʼlew; xinkʼïs ri samaj ri xachlaʼej chwä. 5 Rma riʼ Tat tayaʼ qʼij chwä rchë yijeʼ chaxkïn chqä chë njeʼ nqʼij kan achiʼel ri nqʼij xjeʼ taq yïn kʼo wä awkʼë taq majajün ta le Rwachʼlew. 6 Rïn nkʼutun abʼiʼ chkiwäch ri yeʼayaʼon chwä ri xeʼachaʼ chkikojöl ri winäq. Ye awchë wä riʼ rït y xeʼayaʼ chwä, y ryeʼ kismajin ri achʼaʼäl. 11 Rïn ma yïn kʼo ta chik chwäch le rwachʼlew, ye kʼa ryeʼ ye kʼo chwäch le rwachʼlew, y rïn xkitzolin awkʼë rït. Ntataʼ ri kan yït loqʼoläj, keʼachajij rma abʼiʼ, ri xayaʼ chwä rïn, rchë ryeʼ jnan nuʼän kiwäch achiʼel röj, ri jnan rbʼanon qawäch. 12 Taq yïn kʼo wä kikʼë ryeʼ, rïn xenchajij rma abʼiʼ rït, ri xayaʼ chwä rïn; rïn xenchajij, y majun ta jun chkë ryeʼ xsach ta, xa xuʼ ri xtchup rwäch, rchë ke riʼ ntzʼaqät ri nuʼij chpan ri Loqʼoläj taq Wuj. 14 Rïn xintzjoj yän chkë ri abʼin pä chwä, ye kʼa ri winäq kan yekitzelan, rma ryeʼ ma jnan ta chik rbʼanon kiwäch kikʼë, achiʼel rïn kan ma jnan ta rbʼanon nwäch kikʼë. 15 Ma nbʼij ta chawä chë keʼawesaj äl chkikojöl ri winäq, xa kan chë keʼachajij chwäch ri Itzel Winäq. 16 Ryeʼ ma jnan ta chik rbʼanon kiwäch kikʼë ri winäq, achiʼel rïn kan ma jnan ta rbʼanon nwäch kikʼë ri winäq. 17 Taksaj ri achʼaʼäl ri kantzij ntzjon rchë yeʼachʼajchʼobʼej. 18 Achiʼel xaʼän rït taq xinatäq pä chkikojöl ri winäq, rïn chqä xentäq äl ryeʼ chkikojöl ri winäq. 19 Y rïn nchʼajchʼobʼen wiʼ kimä ryeʼ, rchë chë ryeʼ chqä yechʼajchʼobʼëx rma ri kantzij. 20 Ma xa xuʼ ta nkʼutuj utzil pa kiwiʼ ryeʼ, xa kan nkʼutuj chqä utzil pa kiwiʼ ri xtkikʼuqbʼaʼ kikʼuʼx chwij rïn rma ri xtkiʼij ryeʼ chkë, 21 rchë ke riʼ jontir ryeʼ jnan xtuʼän kiwäch. Achiʼel rït chqä rïn kan jun rbʼanon qawäch, kan ke riʼ ta chqä xtkiʼän ryeʼ qkʼë röj, kan ta jnan xtuʼän kiwäch qkʼë; rchë ke riʼ jontir ri winäq xtkitamaj chë rït xataqö pä wchë. 26 Rïn nkʼutun abʼiʼ chkiwäch ryeʼ, y kan xtinkʼüt na, rchë ke riʼ xkeʼawajoʼ ryeʼ kan achiʼel yinawajoʼ rïn chqä ke riʼ jnan xtuʼän nwäch kikʼë».