1 Juan

4 Wachʼalal, ma tinmaj ta jontir ri nbʼix chiwä, xa kan titzʼetaʼ na we ri najin nbʼix chiwä kan rkʼë Dios petenäq wä, rma kan kʼïy ri ma tzij ta chë ye profetas xepë chwäch le Rwachʼlew. 4 Walkʼwal, rïx yïx petenäq rkʼë Dios chqä yïx chʼakonäq chkij ryeʼ, rma ri kan jnan rbʼanon rwäch iwkʼë rïx kʼo más rchqʼaʼ chwäch ri kan jnan rbʼanon rwäch kikʼë ri winäq. 6 Röj yoj petenäq rkʼë Dios. Ri rtaman chik rwäch Dios kan nqrkʼoxaj; ye kʼa ri ma rkʼë ta Dios petenäq wä ma nqrkʼoxaj ta. Ke riʼ rbʼanik nqatzʼët achkë tzij petenäq rkʼë ri kantzij y achkë tzij petenäq rkʼë ri ma tzij ta. 7 Qachʼalal, tqajowalaʼ qiʼ achiʼel wä qabʼanon pä, rma Dios kan najowan, y xa bʼa achkë ri najowan, nukʼüt chë rkʼë Dios petenäq wä chqä chë rtaman rwäch Dios. 8 Ri ma najowan ta ma rtaman ta rwäch Dios, rma Dios kan najowan. 9 Ke reʼ rbʼanik xkʼüt Dios chqawäch chë nqrajoʼ: Dios xtäq pä Rkʼajol chwäch Rwachʼlew rchë nqïl qakʼaslemal rma ryä. 10 Ya reʼ ntel chë tzij ri ajowabʼäl: ma yë ta röj ri xqjowan rchë Dios, xa kan yë ryä xqrajoʼ röj chqä xtäq pä Rkʼajol rchë xyaʼ rkʼaslemal pa kamïk rchë nutöj ri qamak. 11 Qachʼalal, we Dios ke riʼ rbʼanik xqrajoʼ, reʼ ntel chë tzij chë röj chqä kʼo chë nqajowalaʼ qiʼ chqawäch. 14 Chqä röj xqatzʼët chë ri Tataʼaj xtäq pa Rkʼajol rchë xerköl ri winäq chwäch ri mak y ya riʼ ri najin nqatzjoj. 16 Y röj xqatamaj chë Dios kowan nqrajoʼ chqä nqanmaj chë ryä ke riʼ nunaʼ chqij. Dios kan najowan, y ri winäq ri ronojel mul najowan kan jnan nuʼän rwäch rkʼë Dios, y Dios chqä kan jnan nuʼän rwäch rkʼë ryä. 19 Ye kʼa röj nqjowan rma ryä xqrajoʼ naʼäy. 20 We kʼo jun nbʼin «Rïn nwajoʼ Dios» ye kʼa xa itzel nunaʼ che rä rchʼalal, xa jun ajtzʼuküy tzij. Rma ri winäq ri ma nrajoʼ ta rchʼalal, ri kan nutzʼët, ma nkowin ta nrajoʼ Dios, ri ma nutzʼët ta. 21 Ryä chqä xyaʼ re pixaʼ re chqë: ri najowan Dios kʼo chë nrajoʼ rchʼalal chqä.