Apocalipsis

19 Chrij riʼ xinkʼoxaj jun ri achiʼel ta kichʼaʼäl ye kʼïy winäq ri ye kʼo chkaj. Ryeʼ nkiʼij: «¡Tiyaʼ rqʼij Jah! Yë ryä ri qaDios ri nqkolö, ri kʼo rqʼij chqä kʼo rchqʼaʼ, 2 rma kan pa rbʼeyal nqʼatö tzij; rma xqʼät tzij pa rwiʼ ri ixöq ri tzʼil rkʼaslemal —ri xtzʼilbʼisaj le Rwachʼlew kikʼë tzʼil taq bʼanobʼäl— chqä xuʼän chë xtöj rmak rma xerkamsaj ri rsamajelaʼ Dios». 3 Y xkiʼij chik jmul: «¡Tiyaʼ rqʼij Jah! Ri rsbʼil re ixöq reʼ ronojel mul xtjoteʼ chkaj». 4 Ri 24 ukʼwäy taq bʼey chqä ri kajiʼ ri kʼo kikʼaslemal xexkeʼ chqä xkiyaʼ rqʼij Dios, ri tzʼyül pa rtrono, y xkiʼij: «¡Amén! ¡Tiyaʼ rqʼij Jah!». 5 Chqä rkʼë ri trono kʼo jun xtzjon pä ri xuʼij: «Tiyaʼ rqʼij qaDios, jontir rïx, ri rsamajelaʼ, ri nixiʼij iwiʼ chwäch, ri yïx koköj chqä ri yïx nmaʼq». 6 Y xinkʼoxaj jun ri achiʼel ta kichʼaʼäl ye kʼïy winäq, kan achiʼel ta kʼïy yaʼ xqʼajan chqä kan achiʼel ta mamaʼ taq qlojay xqʼajan. Ryeʼ xkiʼij: «¡Tiyaʼ rqʼij Jah! ¡Rma Jehová ri qaDios, ri kʼo ronojel uchqʼaʼ pa rqʼaʼ, ya najin chik nuqʼät tzij! 7 Kan kiʼ qakʼuʼx tqabʼanaʼ, y tqayaʼ rqʼij rma ya xbʼeqä ri qʼij rchë nkʼleʼ ri Aläj Karneʼl, y rxjayil ya rweqon chik riʼ. 8 Ryä xyaʼöx qʼij che rä rchë nuksaj tzyäq lino ri nüm rajäl, ri kan kowan jaʼäl chqä chʼajchʼöj, rma ri tzyäq lino ri nüm rajäl nukʼambʼej tzij ri ütz taq bʼanobʼäl ri xekiʼän ri winäq ri ye loqʼoläj». 9 Y ri ángel xuʼij chwä: «Tatzʼibʼaj reʼ: ‹Kiʼ kikʼuʼx ri xeskʼïx chpan ri waʼin ri nbʼan rma ri rkʼlanen ri Aläj Karneʼl›». Ryä chqä xuʼij: «Ya riʼ ri nuʼij Dios». 10 Taq ryä xuʼij ya riʼ chwä, rïn xixkeʼ chwäch rchë nyaʼ rqʼij. Ye kʼa ryä xuʼij chwä: «¡Kakatäj! ¡Ma taʼän ta ke laʼ! Rïn chqä xa yïn rsamajel Dios achiʼel rït chqä ri awachʼalal, ri bʼin qa chqë chë tqatzjoj chrij Jesús. ¡Yë Dios tayaʼ rqʼij! Rma ri ntzjöx chrij Jesús ya riʼ nbʼanö chë yebʼix profecías». 11 Xintzʼët chë jaqäl ri kaj; y xbʼeqʼalajin pä jun säq kej. Ri rbʼiʼ ri bʼenäq chrij ya riʼ Jïk chqä Kantzij, y kan pa rbʼeyal nuqʼät tzij chqä kan pa rbʼeyal ri chʼaʼoj yeruʼän. 12 Kan qʼaqʼ ri rnaqʼ rwäch, y pa rjolon kʼo kʼïy coronas. Tzʼibʼatäl jun bʼiʼaj chrij ri majun ta jun tamayon rchë, xa xuʼ ryä. 13 Ryä rkʼwan jun tzyäq ri kʼo kïkʼ chrij, y ya reʼ nbʼix che rä: Ri Rchʼaʼäl Dios. 14 Chqä ri ángeles ri ye kʼo chkaj kitzeqelbʼen pä, y ye petenäq chkij säq taq kej chqä kiksan tzyäq lino ri nüm kajäl, ri säq kicolor chqä ye chʼajchʼöj. 15 Y pa rchiʼ ri petenäq chrij ri säq kej ntel pä jun mamaʼ espada ri kowan rey rchë nbʼerbʼanaʼ chʼaʼoj kikʼë ri tinamït. Y xkeryuqʼuj ri winäq rkʼë jun vara ri bʼanon rkʼë chʼichʼ. Chqä yerpïtzʼ ri uvas rkʼë raqän chpan rkʼojlibʼäl ryowal Dios, ri kʼo ronojel uchqʼaʼ pa rqʼaʼ. 16 Y chrij rtzyaq, pa rwiʼ qʼanäj rchʼek, tzʼibʼatäl re bʼiʼaj reʼ: Qʼatöy Tzij pa kiwiʼ qʼatöy taq tzij chqä Ajaw pa kiwiʼ ri ajaw. 17 Chqä xintzʼët jun ángel ri paʼäl chwäch Qʼij. Ryä kan rkʼë kuw rchʼaʼäl xuʼij reʼ chkë jontir ri ajxikʼ taq chköp ri yexikʼan chkaj: «¡Kixampä ke reʼ! Timoloʼ iwiʼ chpan ri nüm waʼin ri nuʼän Dios. 18 Titjaʼ kichʼakul qʼatöy taq tzij, kichʼakul ri yekʼwayon bʼey chkiwäch ri soldados chqä kichʼakul achiʼaʼ ri kan kʼo kichqʼaʼ, titjaʼ kichʼakul ri kej chqä ri ye bʼenäq chkij; titjaʼ kichʼakul jontir: ri ye xmïl pa samaj chqä ri ma ye xmïl ta pa samaj, ri ye koköj chqä ri ye nmaʼq». 19 Y xintzʼët ri itzel chköp, ri qʼatöy taq tzij chqä kejércitos; jontir kimolon kiʼ rchë nkiʼän chʼaʼoj rkʼë ri bʼenäq chrij ri kej riʼ chqä rkʼë rejército. 20 Y xchap äl ri itzel chköp chqä xchap äl ri ma tzij ta chë profeta ri xbʼanö ri nimaläj taq bʼanobʼäl chwäch ri itzel chköp riʼ ri achoq rkʼë xerqʼöl wä ri xyaʼöx retal ri itzel chköp chkë chqä ri yeyaʼö rqʼij ri rachbʼäl ri itzel chköp. Loman kʼa ye kʼäs na, che kaʼiʼ xekʼaq pa qʼaqʼ ri nbʼrö rkʼë azufre. 21 Ye kʼa ri nkʼaj chik xekamsäx rkʼë ri mamaʼ espada ri xel pä pa rchiʼ ri bʼenäq chrij ri kej riʼ. Y jontir ri ajxikʼ taq chköp xnuj kipan kikʼë ri kamnaqiʼ.