Lucas

15 Taq najin wä yetzjon äl chrij reʼ, Jesús xjelun apü kikʼë chqä xbʼiyïn äl kikʼë, 16 ye kʼa achiʼel ta xtzʼapïx kiwäch rchë ma nkitamaj ta rwäch. 18 Y jun chkë ryeʼ, ri Cleopas rbʼiʼ, xuʼij che rä: «¿Ma ataman ta kʼa achkë xebʼanatäj Jerusalén chpan ri qʼij ri ye qʼaxnäq pä? ¿Ma yït aj aweʼ ta?». 19 Ryä xuʼij che rä: «¿Achkë xebʼanatäj kʼa?». Ryeʼ xkiʼij che rä: «Ri xbʼan che rä Jesús aj Nazaret, ri kan yë Dios chqä ri winäq xetzʼetö chë xok jun profeta ri kʼo uchqʼaʼ pa rqʼaʼ, rma kan kʼïy achkë xeruʼij chqä xeruʼän. 20 Ri sacerdotes ri kʼo más kiqʼij chqä ri yeqʼatö tzij pa qawiʼ, xkijäch Jesús pa rqʼaʼ Pilato rchë nkamsäx chqä xkibʼajij chwäch cheʼ. 21 Ye kʼa röj qayoʼen wä chë yë ryä xtkolö Israel. Y komä ya qʼaxnäq chik oxiʼ qʼij taq xbʼanatäj jontir reʼ. 22 Chqä, jojun ixoqiʼ ri ye kʼo qkʼë kʼo jun xkitzjoj chqë ri kan ma nqanmaj ta wä. Nqaʼij riʼ rma ryeʼ kan nmaqʼaʼ yän xebʼä akuchï xmuq wä Jesús 23 y, taq ma xkïl ta rchʼakul Jesús chriʼ, xepë qkʼë rchë xkibʼetzjoj chqë chë xkitzʼët jun visión, ri akuchï jojun ángeles xkiʼij chkë chë Jesús ya xkʼasöx yän chkikojöl ri kamnaqiʼ. 24 Rma riʼ, jojun chkë ri ye kʼo qkʼë xebʼä akuchï xmuq wä Jesús y xkibʼewlaʼ jontir kan achiʼel xkiʼij ri ixoqiʼ chqë. Ye kʼa Jesús ma xkitzʼët ta chriʼ». 25 Y ryä xuʼij chkë: «¡Rïx kan majun ta inaʼoj y ma niwajoʼ ta ninmaj jontir ri xkiʼij ri profetas! 26 ¿Ma xbʼix ta kʼa chë ri Cristo kʼo chë nuqʼaxaj jontir riʼ rchë nnmirsäx rqʼij?». 27 Y xkʼüt chkiwäch achkë nuʼij ri Loqʼoläj taq Wuj chrij ryä; xchäp pä rkʼë ri xtzʼibʼaj qa Moisés chqä ri xkitzʼibʼaj qa ri Profetas. 28 Y taq ryeʼ xeʼapon naqaj che rä ri tinamït akuchï nkajoʼ yebʼä wä, ryä xuʼän chë achiʼel ta kʼa kʼo na nrajoʼ chwäch rchë napon akuchï nrajoʼ wä ryä. 30 Taq najin wä yewaʼ, ryä xkʼän apü ri kaxlanwäy, xtyoxin che rä Dios, xwächʼ y xyaʼ apü chkë. 31 Ya riʼ taq ryeʼ achiʼel ta xjaqatäj kiwäch, rma riʼ xkitamaj rwäch; ye kʼa chaq kʼateʼ ma xkitzʼët ta chik. 32 Y xkiʼij reʼ chkiwäch: «¡Rma riʼ kan jaʼäl xnaʼ qan taq ryä najin wä ntzjon pä qkʼë pa bʼey, taq kan chöj xtzjoj pä ri Rchʼaʼäl Dios chqë!». 36 Taq najin wä nkitzjoj ya riʼ, Jesús chaq kʼateʼ xbʼeqʼalajin pä chkikojöl y xuʼij reʼ chkë: «Xok aqʼaʼ». 37 Ye kʼa ryeʼ kan kowan xkixiʼij kiʼ rma xkiquʼ chë najin wä nkitzʼët jun sbʼnel. 44 Chrij riʼ xuʼij chkë: «Ya reʼ ri tzij ri xinbʼij taq k’a yïn kʼo na wä iwkʼë: chë jontir ri xtzʼibʼäx qa chwij rïn chpan ri Rpixaʼ Moisés, ri xkiʼij qa ri Profetas chqä ri kʼo chpan ri Salmos kʼo wä chë yebʼetzʼaqät». 52 Ryeʼ xkiqasaj kiʼ pan ilew chwäch chqä kan kiʼ kikʼuʼx xetzolin äl Jerusalén. 53 Y kan ronojel mul nkiyaʼ wä rqʼij Dios pa templo.