Génesis

8 Ye kʼa Dios ma xmestaj ta Noé nixta ri chköp ri ye rchë pa qʼayis nixta ri chköp ri ma ye rchë ta kʼechelaj ri ye kʼo wä rkʼë Noé chpan ri arca. Rma riʼ Dios xuʼän chë xpë jun kaqʼiqʼ chwäch le Rwachʼlew; ya riʼ xuʼän chë ri yaʼ eqal xqä qa. 2 Ri yaʼ ri kʼo chkaj ma xqä ta pä chik chqä xtzʼapïx ri kaj, ya riʼ xuʼän chë xtaneʼ ri jöbʼ. 3 Ri yaʼ eqal xkʼis qa chwäch le Rwachʼlew. Y taq qʼaxnäq chik 150 qʼij, ya qajnäq wä chik kowan ri yaʼ. 4 Ri qʼij 17 rchë ri séptimo ikʼ, ri arca xpaʼeʼ qa pa rwiʼ ri jyuʼ rbʼiniʼan Ararat. 5 Chpan ri ikʼ riʼ kʼa pa décimo ikʼ, ri yaʼ kan más na chik xqä. Ri naʼäy qʼij rchë ri décimo ikʼ eqal xeqʼalajin pä ri kiwiʼ ri jyuʼ. 6 Taq xqʼax 40 qʼij, Noé xjäq ri ventana ri rbʼanon qa chpan ri arca 7 y xresaj äl jun chʼök, ri xel äl chqä xok apü kʼa taq ri ilew xchaqiʼj. 8 Chrij riʼ, Noé chqä xresaj äl jun paloma rchë nutzʼët we ya xqä qa ri yaʼ chwäch le Rwachʼlew. 9 Ye kʼa ri paloma majun akuchï xpaʼeʼ wä rma ri yaʼ kʼa rmïl na chwäch le Rwachʼlew, rma riʼ xtzolin chpan ri arca. Ya riʼ taq Noé xresaj apü rqʼaʼ rchë xjuʼ apü chik jmul ri paloma chpan ri arca. 10 Ryä xyoʼej chik jun 7 qʼij, kʼa riʼ xresaj äl chik jmul ri paloma chpan ri arca. 11 Ri paloma xtzolin taq xqä qa qʼij. ¡Y Noé xtzʼët chë ri paloma rkʼwan jun rxaq olivo pa rchiʼ ri kʼa räx na rbʼanon! Ya riʼ xkʼüt chwäch Noé chë le Rwachʼlew ya najin wä chik nchaqiʼj. 12 Ryä xyoʼej chik jun 7 qʼij, kʼa riʼ xresaj äl chik jmul ri paloma, ye kʼa ri qʼij riʼ, ri paloma ma xtzolin ta chik. 13 Taq Noé 601 wä rjnaʼ, chpan ri naʼäy qʼij rchë ri naʼäy ikʼ, ri yaʼ xkʼis qa chwäch le Rwachʼlew. Noé xresaj rwiʼ ri arca chqä xtzʼët chë le Rwachʼlew najin wä nchaqiʼj. 14 Y, chpan ri qʼij 27 rchë ri rkaʼn ikʼ, ri ilew chöj xchaqiʼj rwäch. 15 Rma riʼ, Dios xuʼij che rä Noé: 16 «Kixel äl chpan ri arca rït chqä ri awixjayil, ri oxiʼ akʼajol chqä ri kixjayil. 17 Chqä keʼawesaj äl jontir ri kʼo kikʼaslemal: ri chköp ri yexikʼan, ri nkiqererej kiʼ chqä ri nkʼaj chik chköp. Ke riʼ xtjeʼ kal chqä xkekʼiyär chwäch le Rwachʼlew». 18 Rma riʼ Noé chqä rxjayil, ri oxiʼ rkʼajol chqä ri kixjayil xeʼel äl chpan ri arca. 19 Y jontir ri kʼo kikʼaslemal, jontir ri chköp ri nkiqererej kiʼ chqä jontir ri chköp ri yexikʼan —jontir ri yeslon chwäch le Rwachʼlew— kan kikʼwan kiʼ xeʼel äl chpan ri arca. 20 Chrij riʼ, Noé xuʼän jun altar rchë xyaʼ rqʼij Jehová, y pa rwiʼ ri altar riʼ xerporoj jojun chköp ri ye chʼajchʼöj chqä jojun chköp ri yexikʼan ri ye chʼajchʼöj rchë xtzüj apü chwäch Dios. 21 Y rxlaʼ ri spanïk riʼ kan xqä chwäch Jehová. Rma riʼ Jehová xuʼij pa ran: «Majun bʼëy chik xtintäq itzel chrij le Rwachʼlew xa kimak ri winäq, rma ri winäq, tapeʼ kʼa ye akʼalaʼ na, ya kʼo chik itzel pa kan. Majun bʼëy chik ke reʼ rbʼanik xtinchüp kiwäch ronojel ri kʼo kikʼaslemal. 22 Kan chpan re qʼij reʼ, le Rwachʼlew ronojel mul xtyaʼ rwäch taq kʼo xttik chwäch, xtjeʼ tiw chqä kʼatän, saqʼij chqä jöbʼ, qʼij chqä aqʼaʼ».