Juan

3 Rma riʼ ri ranaʼ xkitäq rbʼixik che rä Jesús y xkiʼij: «Wajaw, ri awachiʼil Lázaro kʼo ryabʼil». 4 Ye kʼa taq Jesús xkʼoxaj riʼ, ryä xuʼij: «Re yabʼil reʼ ma xtuʼän ta chë ryä xtkʼäm, xa kan xtkʼatzin rchë xtyaʼöx rqʼij Dios chqä rchë Rkʼajol Dios kan nüm rqʼij xttzʼet rma riʼ». 5 Jesús kan kowan xerajoʼ Marta, María chqä Lázaro. 11 [...] «Lázaro, ri qachiʼil, najin nuxlan [...]». 21 Marta xuʼij che rä Jesús: «Wajaw, xa ta rït yït kʼo ta aweʼ ri nxbʼal ma ta xkäm. 22 Ye kʼa rïn ntaman chë jontir ri nakʼutuj che rä Dios, Dios kan xtyaʼ pä chawä». 23 Jesús xuʼij che rä: «Ri axbʼal xtkʼastäj na pä». 24 Y Marta xuʼij che rä Jesús: «Rïn ntaman chë ryä xtkʼastäj pä taq xkekʼasöx ri kamnaqiʼ chpan ri rkʼisbʼäl qʼij». 25 Jesús xuʼij che rä: «Rïn yïn ri kʼasojixïk chqä ri kʼaslemal. Ri nukʼüt kʼuqbʼäl kʼuʼx chwij rïn, tapeʼ xtkäm, xtbʼekʼaseʼ na pä; 26 chqä ri winäq ri kʼäs chqä nukʼuqbʼaʼ rkʼuʼx chwij rïn majun bʼëy xtkäm ta. ¿Nanmaj rït reʼ?». 27 Ryä xuʼij che rä: «Wajaw, rïn nnmaj chë rït yït ri Cristo ri Rkʼajol Dios, ri kʼo chë xpë chwäch le Rwachʼlew». 32 Chrij riʼ María xapon akuchï kʼo wä Jesús y, taq xtzʼët, xxkeʼ qa chraqän y xuʼij che rä: «Wajaw, xa ta rït yït kʼo ta aweʼ, ri nxbʼal ma ta xkäm». 33 Taq Jesús xtzʼët chë ryä chqä ri Judíos ri ye kʼo wä rkʼë najin yeʼoqʼ, kan poqän xnaʼ ran y kowan xbʼison. 34 Ryä xkʼutuj chkë: «¿Akuchï iyaʼon wä?». Ryeʼ xkiʼij che rä: «Katampä Ajaw y xtatzʼët». 35 Jesús xchäp oqʼej. 36 Taq xkitzʼët riʼ, ri judíos xkiʼij: «¡Kan kowan wä xrajoʼ!». 39 Jesús xuʼij: «Tiwesaj ri abʼäj». Ye kʼa Marta, ri ranaʼ Lázaro, xuʼij che rä: «Wajaw, rkʼë jbʼaʼ ya kʼo chik rxlaʼ, rma kajiʼ chik qʼij kamnäq». 40 Jesús xkʼutuj che rä: «¿Ma xinbʼij ta kʼa chawä chë we xtanmaj ri xinbʼij chawä xkakowin xtatzʼët rchqʼaʼ Dios?». 42 Rïn ntaman chë ronojel mul yinakʼoxaj, ye kʼa xinbʼij riʼ kimä ri winäq ye kʼo aweʼ, rchë nkinmaj chë rït xataqö pä wchë». 43 Y, taq xuʼij riʼ, kan rkʼë kuw rchʼaʼäl xuʼij: «¡Lázaro, katel pä!».