Génesis

49 Y Jacob xerskʼij rkʼajol chqä xuʼij chkë: «Timoloʼ iwiʼ rchë nbʼij chiwä achkë xtbʼanatäj iwkʼë chpan rkʼisbʼäl taq qʼij. 2 Ralkʼwal Jacob, timoloʼ iwiʼ chqä kinikʼoxaj. Tiyaʼ ixkïn che rä itat Israel. 3 Rubén, yït rït ri naʼäy nkʼajol, ri wchqʼaʼ chqä ri naʼäy chkë jontir walkʼwal. Yït rït ri más wä xjeʼ aqʼij chqä awchqʼaʼ. 4 Ye kʼa ma yït ta rït ri xtjeʼ más aqʼij, rma xatok achiʼel ri yaʼ ri nbʼolqotlaʼ riʼ y xajoteʼ pa rchʼat atat. Ri jun qa mul riʼ, rït xatzʼilbʼisaj nchʼat. ¡Kantzij nbʼij chë ryä xuʼän riʼ! 5 Simeón chqä Leví kichʼalal kiʼ. Ryeʼ kiksan kichpobʼal rchë nkiʼän chʼaʼoj xa xuʼ rchë nkiʼän kamïk. 6 Nkʼaslemal rïn, ma takʼwaj ta awiʼ kikʼë. Wan rïn, ma kajelun ta kikʼë, rma taq katajnäq kiyowal xekikamsaj achiʼaʼ chqä chaq tzij xkitzʼlaʼ kaqän achij taq wakx. 7 Kan itzel ri xkiʼän taq katajnäq kiyowal, rma taq meqʼernäq kikʼë ma xkipoqonaj ta xekikamsaj winäq. Rïn xkenjäch äl chpan rtinamit Jacob. Xkenjäch äl chpan rjyuʼ Israel. 8 Y rït, Judá, ri awachʼalal kan xtkiyaʼ aqʼij. Xtayaʼ aqʼaʼ chrij kiqül ri winäq ri itzel nkinaʼ chawä. Ri ralkʼwal atat kan xtkiqasaj kiʼ pan ilew chawäch. 9 Judá achiʼel jun aläj köj. Rït, nkʼajol, xkakatäj akuchï kʼo wä away y xkajoteʼ äl. Ryä xjeʼ qa pan ilew y xyüq rqʼaʼ raqän achiʼel nuʼän jun köj. ¿Y achkë komä nrajoʼ nkʼason jun köj? 10 Ri vara ri nukʼwaj jun qʼatöy tzij pa rqʼaʼ, ma xttel ta äl Judá, y ri chʼameʼy ri nukʼwaj jun kʼamöl bʼey, ma xttel ta äl rkʼë, kʼa taq xtpë Siló, y jontir ri tinamït xtkinmaj rtzij ryä. 13 Zabulón xtjeʼ chuchiʼ ri mar akuchï yexmïl wä ri barcos. Y rchiʼ rjyuʼ ri más näj xtkanaj wä, ya riʼ ri xtapon kʼa Sidón. 14 Isacar achiʼel jun bʼür ri ye kʼo kuw taq rbʼaqil chqä sotäl chukojöl kaʼiʼ ejqaʼn. 15 Y xttzʼët chë kan ütz akuchï xtuxlan wä chqä kan jaʼäl ri ilew. Ryä xtqasaj rteleʼn rchë xkerkʼwaj ejqaʼn chqä xtyaʼ riʼ pa kuw taq samaj. 17 Dan xttok achiʼel jun kumätz ri kʼo pa rxkïn bʼey, jun kumätz ri ye kʼo rkʼaʼ chqä kʼo pa rqʼaʼ bʼey, ri nuchʼöp pa rtxil ri kej chqä nuʼän chë ri chʼokäl chrij ntzaq äl chrij. 18 Nimaläj Jehová, rïn xtinyoʼej kʼa taq rït xkojaköl. 19 Gad xkepë jun molaj alqʼomaʼ chrij, ye kʼa ryä xttoʼ riʼ pa kiqʼaʼ chqä xkertzeqelbʼej äl. 20 Aser kan pa rkʼiyal rway xtjeʼ, y ri rkïl wäy xtyaʼ chkë nkʼaj chik kan achiʼel ri rkïl wäy ri nutäj jun qʼatöy tzij. 21 Neftalí achiʼel jun ixöq mazat ri kowan jaʼäl chqä yeruʼij jaʼäl taq tzij. 22 José ya riʼ rjotaʼy jun cheʼ ri kowan rwäch nuyaʼ, jun cheʼ ri kowan rwäch ri kʼo chuxkïn jun pons (poza) akuchï ntzʼuk wä pä yaʼ y rqʼaʼ yeqʼax pa rwiʼ ri tzʼaq. 23 Ye kʼa ri yekʼaqö flechas ma xetaneʼ ta chrij, xkikʼäq kiflechas chrij y ronojel mul itzel xkinaʼ che rä. 24 Tapeʼ ke riʼ, r·arco ma xslon ta pa rqʼaʼ y rqʼaʼ ma xebʼarbʼot ta chqä kan chanin xerkʼäq flechas. Ryä xkowin xuʼän riʼ rkʼë rtoʼik ri kʼo kowan rchqʼaʼ, ri ntoʼö rchë Jacob. Yë ryä ri ajyuqʼ chqä ri abʼäj rchë Israel. 26 Ri utzil ryaʼon rtat che rä, más ütz chwäch jontir ri ütz ri ye kʼo pa taq jyuʼ ri ronojel mul xkejeʼ y kʼo más kiqʼij chwäch jontir ri ütz ri ye kʼo pa taq jyuʼ ri yalöj tiempo yejeʼ. Re utzil reʼ ronojel mul xkejeʼ pa rwiʼ José, pa rwiʼ ri xchaʼöx chkikojöl rchʼalal. 27 Benjamín xttok achiʼel jun lobo ri nuxïl rway. Nmaqʼaʼ xttäj rway y taq xtqä qa Qʼij xtjäch ri xmäj qa chkë nkʼaj chik». 28 Jontir ryeʼ xeʼok ri 12 ijatzul rchë Israel, y ya riʼ xuʼij kitat chkë taq xyaʼ rqʼaʼ pa kiwiʼ. Kan chkijujnal xuʼij chkë achkë utzil xtkïl.