Jun kʼamöl bʼey y kaʼiʼ ixoqiʼ ri ma nkixiʼij ta kiʼ

Josué kʼïy jnaʼ xkʼwaj bʼey chwäch Israel, y xkäm taq 110 rjnaʼ. Ri israelitas xkiyaʼ rqʼij Jehová taq Josué kʼa kʼäs na. Pero taq xkäm, xa tyox chik xkiyaʼ kiqʼij achiʼel nkiʼän aj Canaán. Rma riʼ Jehová xyaʼ qʼij chë Jabín, jun rey aj Canaán, xyaʼ poqonal pa kiwiʼ. Ya riʼ xuʼän chë ri israelitas xkikʼutuj kitoʼik che rä Jehová. Ryä xyaʼ chik jun kʼamöl bʼey pa kiwiʼ. Ri achï riʼ Barac rbʼiʼ. Ryä xkertoʼ ri winäq rchë jmul chik nkiyaʼ rqʼij Jehová.

Débora, jun profetisa, xuʼij che rä Barac chë tapon rkʼë rchë nuʼij ya reʼ che rä ri xuʼij pä Jehová: «Jät chuchiʼ ri raqän yaʼ ri kʼo Cisón. Keʼakʼwaj äl 10,000 achiʼaʼ rchë naʼän chʼaʼoj kikʼë rsoldados Jabín. Chriʼ xkachʼakon chrij Sísara, ri kʼwayon bʼey chkiwäch ri soldados riʼ». Barac xuʼij: «Rïn xkibʼä xa xuʼ si rït xkabʼä wkʼë». Débora xuʼij: «Xkibʼä awkʼë, pero tatamaj chë ma yït ta xkakamsan Sísara. Jehová xuʼij chë yë jun ixöq xtkamsan rchë».

Débora xjoteʼ rkʼë Barac chqä ri soldados pa rwiʼ ri jyuʼ Tabor rchë xkiʼän apü ri nkʼatzin rchë nkichäp chʼaʼoj. Taq Sísara xtamaj riʼ, xermöl rchʼichʼ chqä rsoldados chuxeʼ ri jyuʼ. Débora xuʼij reʼ che rä Barac: «Re qʼij reʼ Jehová xtuʼän chë xkachʼakon». Rma riʼ, Barac chqä ri 10,000 achiʼaʼ xexleʼ äl rchë xkibʼebʼanaʼ chʼaʼoj rkʼë Sísara chqä kikʼë rsoldados.

Chrij riʼ, Jehová xuʼän chë ri raqän yaʼ ri kʼo Cisón xnmär. Rma riʼ ri rchʼichʼ Sísara xeqʼateʼ pa chʼabʼäq. Sísara xqä äl chpan rchʼichʼ y xkʼäq äl anin. Barac chqä rsoldados xechʼakon chrij rsoldados Sísara, pero Sísara xanmäj äl y xrewaj riʼ pa rachoch jun ixöq ri Jael rbʼiʼ. Ryä xyaʼ jbʼaʼ leche che rä chqä xküch rkʼë jun tzyäq. Sísara xwär qa rma kowan wä kosnäq. Jael eqal xjelun apü rkʼë. Taq kʼo wä chik rkʼë, xbʼajij jun cheʼ ri chʼüt rtzaʼn chujolon Sísara, ke riʼ rbʼanik xkäm.

Jbʼaʼ chrij riʼ, xapon Barac chukanuxik Sísara. Jael xel pä pa rachoch y xuʼij reʼ che rä: «Katok pä, xtinkʼüt ri achï chawäch ri najin nakanuj». Taq Barac xok apü, xtzʼët chë Sísara ya kamnäq chik. Rma riʼ, Barac y Débora xebʼixan che rä Jehová rchë nkiyaʼ rqʼij rma xertoʼ rchë yechʼakon chkij kikʼulel. Chkipan 40 jnaʼ ri xepë chrij riʼ, ri israelitas majun xnaqö kichë.