Jesús yerqʼomaj ri yawaʼiʼ ri qʼij sábado

Ri fariseos nkajoʼ wä nkiyaʼ Jesús pa cárcel rma itzel nkinaʼ che rä. Ryeʼ nkiʼij wä chë Jesús ma ütz ta yerqʼomaj ri yawaʼiʼ ri qʼij sábado, rma ri qʼij riʼ ma rchë ta samaj. Kʼo jun sábado, Jesús xtzʼët chë jun achï ri ma ntzuʼun ta najin wä nukʼutuj päq. Rma riʼ xuʼij reʼ chkë rtzeqelbʼëy: «Titzʼetaʼ chë rchqʼaʼ Dios xttoʼ re achï reʼ». Jesús xxöl rkʼaxäj rkʼë ilew rchë xuʼän jbʼaʼ chʼabʼäq. Chrij riʼ xyaʼ che rä rwäch ri achï y xuʼij reʼ che rä: «Jät akuchï kʼo wä ri yaʼ rchë Siloam y tachʼajaʼ awäch chriʼ». Ri achï xuʼän ri xbʼix che rä y xkowin xtzuʼun.

Ri winäq kan xel kikʼuʼx y xkiʼij reʼ: «Yë ryä ri nkʼutun päq, ¿tapeʼ? ¿O xa jun chik ri ye jnan jbʼaʼ rkʼë?». Ri achï xuʼij: «Yïn riʼ ri ma yitzuʼun ta kan xa xuʼ xinaläx». Ri winäq xkikʼutuj reʼ che rä: «¿Y achkë rma komä yatzuʼun chik?». Ryä xtzjoj chkë ri xbʼanatäj. Rma riʼ, xkikʼwaj äl kikʼë ri fariseos.

Ri achï xuʼij reʼ chkë ri fariseos: «Jesús xyaʼ chʼabʼäq che rä nwäch y xuʼij chwä chë tinchʼajaʼ. Taq xinbʼän riʼ, xitzuʼun». Ri fariseos xkiʼij: «Si Jesús nuʼän riʼ ri qʼij sábado, ri rchqʼaʼ ma rkʼë ta Dios petenäq wä». Pero jojun winäq xkiʼij: «Si ma rkʼë ta Dios petenäq wä rchqʼaʼ, ¿achkë rma nkowin yerqʼomaj ri yawaʼiʼ?».

Ri fariseos xekiskʼij rteʼ rtataʼ ri achï y xkikʼutuj reʼ chkë: «¿Achkë rma iwalkʼwal komä nkowin chik ntzuʼun?». Ryeʼ kixiʼin wä kiʼ rma ri fariseos xkiʼij chë xtkesaj äl pa sinagoga xa bʼa achkë ri nukʼuqbʼaʼ rkʼuʼx chrij Jesús. Rma riʼ xkiʼij: «Ma qataman ta, tikʼutuj rïx che rä». Ri fariseos kʼo más xkikʼutuj che rä ri achï, rma riʼ ryä xuʼij reʼ chkë: «Xinbʼij yän chiwä jontir ri ntaman. ¿Achkë rma najin na nikʼutuj chwä?». Ri fariseos xpë kiyowal y xkesaj äl ri achï chkiwäch.

Chrij riʼ, Jesús xbʼä rkʼë ri achï y xkʼutuj reʼ che rä: «¿Akʼuqbʼan akʼuʼx chrij ri Mesías?». Ri achï xuʼij: «Xa ta ntaman achkë riʼ, nkʼuqbʼaʼ ta nkʼuʼx chrij». Jesús xuʼij: «Rïn yïn ri Mesías». ¿Tapeʼ chë Jesús kan ütz rnaʼoj xuʼän rkʼë ri achï riʼ? Ma xa xuʼ ta xqʼomaj, xa kan xtoʼ chqä rchë nukʼuqbʼaʼ rkʼuʼx chrij.