¿Yenatäj reʼ chawä?

¿Askʼin kiwäch ri wuj Ri Chajinel ri ye lenäq pä chpan re junaʼ reʼ? Tatzʼetaʼ we yakowin yeʼaqʼalajsaj re kʼutunïk reʼ:

¿Achkë ntel chë tzij najäl achʼobʼonik? (Rom. 12:2).

Ntel chë tzij chë ma xa xuʼ ta nkʼatzin yeqaʼän jojun ütz taq bʼanobʼäl, xa kan nkʼatzin chqä nqajäl ri naʼoj ri ma ütz ta ye kʼo qkʼë rchë nqakʼwaj jun kʼaslemal kan achiʼel nuʼij rupixaʼ Dios (w23.01, ruxaq 8 y 9).

¿Achkë ütz nqaʼän rchë kan pa rubʼeyal nqatzʼët jontir ri najin yebʼanatäj?

Röj nqajoʼ nqatamaj achkë rubʼanik ri najin yebʼanatäj chwäch le Ruwachʼlew najin nkiʼän chë yetzʼaqät ri profecías. Ye kʼa ma nqajoʼ ta chë xa xuʼ ri nqaquʼ röj nqaʼij apü, rma ya riʼ rkʼë jbʼaʼ nuʼän chë nujäch riʼ ri congregación. Pa rukʼexel riʼ, röj nqajoʼ nqatzjoj achkë rubʼin pä rutinamit Jehová chrij ri najin yebʼanatäj (1 Cor. 1:10) (w23.02, ruxaq 16).

¿Achkë rma xqasäx pa yaʼ Jesús ye kʼa achkë rma yeqasäx pa yaʼ rutzeqelbʼëy?

Jesús ma xkʼatzin ta xjäch riʼ pa ruqʼaʼ Jehová rma xaläx chpan jun tinamït ri jachon wä chik pa ruqʼaʼ Dios. Ryä majun ta wä mak chrij, rma riʼ ma xkʼatzin ta xtzolij riʼ che rä rumak (w23.03, ruxaq 5).

¿Achkë ütz nqaʼän rchë más ye kʼïy qachʼalal nkiyaʼ ki-comentarios?

Koköj taq comentarios keqayaʼ, rchë ke riʼ más qachʼalal xkekowin xtkiʼän comentar. Chqä, ma kʼïy ta naʼoj tqatzjoj chpan jun qa-comentario, rchë ke riʼ ri nkʼaj chik xtkïl achkë xtkiʼij (w23.04, ruxaq 23).

¿Achkë riʼ ri «Bʼey rchë ri Loqʼoläj» ri nuʼij chpan Isaías 35:8?

Chkiwäch ri judíos, ri bʼey riʼ xkʼambʼej tzij chrij ri bʼey ri xel pä Babilonia y xapon kʼa Israel. ¿Y chkiwäch rusamajelaʼ Dios pa qaqʼij komä? Taq nrajoʼ na kʼïy junaʼ rchë nbʼeqä ri junaʼ 1919, xchap pä rubʼanik re bʼey reʼ. Xbʼan pä imprimir le Biblia chqä xqʼaxäx pa nkʼaj chik chʼaʼäl. Ri «Bʼey rchë ri Loqʼoläj» nqrtoʼ rchë nqayaʼ ruqʼij Jehová komä kikʼë qachʼalal y chqawäch apü xtqrtoʼ rchë xtqïl ri utzil ri xtyaʼ Ruqʼatbʼäl Tzij Dios pa qawiʼ (w23.05, ruxaq 15 kʼa 19).

¿Achkë kaʼiʼ ixoqiʼ nutzjoj ri capítulo 9 rchë Proverbios?

Ri wuj Proverbios ntzjon chrij «ri ixöq ri majun ta runaʼoj» y nuʼij chë ri yeʼok apü rkʼë xa chpan «ri Jül» xkeʼapon wä. Ye kʼa nutzjoj chqä jun ixöq ri nukʼambʼej tzij chrij ri kan kʼo anaʼoj. Chqä nuʼij chë ri nkinmaj rutzij ri ixöq riʼ achiʼel ta yebʼiyïn chpan «ri bʼey» ri nuʼän chqë chë nqʼax chqawäch achkë nkʼatzin nqaʼän chqä ri nqrkʼwaj chpan ri kʼaslemal (Prov. 9:1, 6, 13, 18) (w23.06, ruxaq 22 kʼa 24).

¿Achkë rubʼanik xkʼüt Jehová chë ma xnaʼ ta riʼ chqä chë xquʼ rij Lot?

Jehová xuʼij che rä Lot chë tanmäj äl pa taq juyuʼ. Taq Lot xuʼij che rä Dios chë tyaʼ qʼij che rä rchë nbʼä chpan ri tinamït Zóar, ryä xyaʼ qʼij che rä (w23.07, ruxaq 21).

¿Achkë ütz nuʼän jun ixöq we rachjil nutzʼët pornografía?

Ryä kʼo chë nnatäj che rä chë ma yë ta ryä ajmak. Ri más ütz nuʼän ya riʼ nukowirsaj rachbʼilanïk rkʼë Jehová chqä nchʼobʼon chkij jojun ixoqiʼ ri yerutzjoj le Biblia ri xkʼuqbʼäx kikʼuʼx rma Jehová. Ryä nkowin nutoʼ rachjil rchë ma nuʼän ta jun ri xa xtuʼän chë xttzʼët chik jmul pornografía (w23.08, ruxaq 14 kʼa 17).

We röj kan kʼo qanaʼoj, ¿achkë rubʼanik nqrtoʼ riʼ rchë ma rkʼë ta oyowal nqtzjon rkʼë jun winäq ri itzel ntzjon chrij ri nqanmaj?

Jun ri xtqtoʼö ya riʼ nqaquʼ chë ri nuʼij ri winäq riʼ xtqrtoʼ rchë xtqatamaj achkë nuquʼ ryä. Ya riʼ xtqtoʼö rchë ma rkʼë ta oyowal xtqaqʼalajsaj ri nqanmaj (w23.09, ruxaq 17).

¿Achkë xuʼän María rchë xrïl rutoʼik?

Taq María xtamaj chë xttok ruteʼ ri Mesías, ryä xkʼutuj rutoʼik chkë ri nkʼaj chik. Gabriel chqä Elisabet xkikʼuqbʼaʼ rukʼuʼx kikʼë ri Loqʼoläj taq Wuj. Röj chqä nkʼuqbʼäx qakʼuʼx kimä qachʼalal (w23.10, ruxaq 15).

¿Achkë rubʼanik nuyaʼ pä Jehová ri nqakʼutuj che rä?

Ryä nuʼij chë nqrkʼoxaj taq nqchʼö rkʼë chqä nutzʼët na we ri nqakʼutuj che rä rukʼwan riʼ rkʼë ri ruchʼobʼon nuʼän (Jer. 29:12). Ryä jalajöj rubʼanik nuyaʼ pä ri nqakʼutuj che rä tapeʼ xa junan jbʼaʼ ri nqakʼutuj kikʼë nkʼaj chik. Ye kʼa ryä ronojel mul xtqrtoʼ pä (w23.11, ruxaq 21 y 22).

We Romanos 5:2 ntzjon chrij ri qayoʼen apü, ¿achkë rma nkamlüx rubʼixik chpan ri versículo 4?

Taq jun winäq nutamaj chrij ri nutzüj le Biblia, rkʼë jbʼaʼ nuyaʼ chwäch ran chë xtrïl rukʼaslemal chwäch ri Kotzʼijaläj Ilew. Ye kʼa taq ryä yeruköchʼ ri kʼayewal yeruqʼaxaj chqä nutamaj chë Jehová kiʼ rukʼuʼx rkʼë, ryä más nukʼuqbʼaʼ rukʼuʼx chrij ri kʼaslemal xtrïl (w23.12, ruxaq 12 y 13).