¿Achkë rma ri testigos de Jehová ma nkiksaj ta ri cruz?

Ye kʼïy winäq nkiʼij chë ri cruz ya riʼ nkʼutü chë jun winäq jun cristiano. Ye kʼa tapeʼ röj, ri testigos de Jehová, yoj cristianos, ma nqaksaj ta ri cruz chqä ma nqayaʼ ta ruqʼij. ¿Achkë rma?

Jun rma, ya riʼ chë le Biblia ma nuʼij ta chë Jesús xkäm chwäch jun cruz, pa rukʼexel riʼ, le Biblia nuʼij chë xkäm chwäch jun cheʼ. Chqä nuʼij chkë ri cristianos chë tkibʼanaʼ ya reʼ: «Ma tiyaʼ ta kiqʼij tyox». Reʼ ntel chë tzij chë we nqaksaj ri cruz rchë nqayaʼ ruqʼij Dios, xa najin nqayaʼ ruqʼij jun tyox (1 Corintios 10:14; 1 Juan 5:21).

Chqä, Jesús xuʼij achkë xtkʼutü chë jun winäq jun cristiano. Ryä xuʼij: «Ke riʼ xtqʼalajin chkiwäch jontir chë rïx yïx nutzeqelbʼëy, we xtiwajowalaʼ iwiʼ chiwäch» (Juan 13:34, 35). Rkʼë ya reʼ nqatzʼët chë ri nkʼutü chë jun winäq jun cristiano, ya riʼ ri najowan y ma yë ta ri cruz.