3. Ma tiqasaj ta iqʼij chiwäch

¿ACHKË NTEL CHË TZIJ?

Ri kʼlan taq winäq ri ma nkiqasaj ta kiqʼij chkiwäch nkiquʼ rij ri kikʼlaj, yajün taq kʼo mul ma junan ta nkiquʼ chrij ri najin nkitzjoj. Ri libro Diez claves para transformar tu matrimonio nuʼij: «Re kʼlan ta winäq reʼ ma xa xuʼ ta ri nkiquʼ ryeʼ nkiyaʼ más ruqʼij, pa rukʼexel riʼ, yetzjon chrij ri ma junan ta nkiquʼ chrij, nkiyaʼ kixkïn chkë ri kikʼlaj y, pa rukʼisbʼäl, nkiʼän jun kichʼobʼoj ri kʼo utzil nukʼäm pä pa kiwiʼ che kaʼiʼ».

RI NAʼOJ NUYAʼ LE BIBLIA: «Ri winäq ri najowan [...] ma xa xuʼ ta ryä nuquʼ qa riʼ» (1 Corintios 13:4, 5).

«Chi nwäch rïn, ri ma nqasaj ta ruqʼij wixjayil ntel chë tzij nloqʼoqʼej, y ma nbʼän ta xa bʼa achkë jun ri xa nutzʼlaʼ ryä o nuʼän chë nchaʼ chiʼ ri qakʼlanen» (Micah).

¿ACHKË RMA KAN KOWAN RUQʼIJ RE NAʼOJ REʼ?

Taq ri kʼlan taq winäq xa nkiqasaj kiqʼij chkiwäch, rkʼë jbʼaʼ xa yejkan yetzjon, yetzjon itzel chrij ri kikʼlaj o yekisök rkʼë ri nkiʼij. Ri winäq ri kitaman chrij ri kʼlanen nkiʼij chë ya riʼ nbʼanö chë jun kʼlaj winäq nkichüp ruwäch kikʼlanen.

«Taq naʼij poqän taq tzij che rä awixjayil, nayöqʼ chqä yatzeʼen chrij, ryä xtnaʼ chë kan majun ta ruqʼij chqä ma xtkʼuqbʼaʼ ta chik rukʼuʼx chawij» (Brian).

¿ACHKË ÜTZ NAʼÄN?

TAQUʼ RIJ YA REʼ

Taquʼ rij achoq chrij yïx tzjonäq pä rkʼë akʼlaj re semana reʼ chqä achkë runaʼoj rubʼanon pä awkʼë. Chrij riʼ, tabʼanaʼ qa re kʼutunïk reʼ chawäch:

• ¿Jaruʼ mul xtzjon itzel chawij y jaruʼ mul xkʼüt chawäch chë yatrajoʼ?

• ¿Achkë rubʼanik xkʼüt chawäch chë nuyaʼ aqʼij?

RCHË YIXTZJON CHIWÄCH

• ¿Achkë yeqaʼij o achkë yeqaʼän nkikʼüt chë ma nqaqasaj ta qaqʼij chqawäch?

• ¿Achkë yeqaʼij o achkë yeqaʼän nkikʼüt chë xa nqaqasaj qaqʼij chqawäch?

RI ÜTZ NAʼÄN

• Chijujnal titzʼibʼaj achkë oxiʼ rubʼanik niwajoʼ chë ri ikʼlaj nukʼüt chiwäch chë nuyaʼ iqʼij. Tiyaʼ ri wuj riʼ che rä ri ikʼlaj y titjaʼ iqʼij rchë niʼän ri tzʼibʼatäl chwäch ri wuj riʼ.

• Tatzʼibʼaj achkë utziläj taq naʼoj ye kʼo rkʼë akʼlaj y taʼij che rä chë kowan yeʼaloqʼoqʼej.

«Chi nwäch rïn, nyaʼ ruqʼij wachiʼil taq nkʼüt chwäch rkʼë ri yenbʼän chë nloqʼoqʼej chqä chë nwajoʼ che kiʼ rukʼuʼx nuʼän. Ma nkʼatzin ta kan ta achkë naʼän rchë nakʼüt chwäch jun winäq chë nayaʼ ruqʼij. Kʼo mul, xa xuʼ nkʼatzin nayaʼ axkïn che rä, naʼän jun utzil che rä o xa bʼa achkë na chik jun» (Megan).

Ri kʼo más ruqʼij ma ya riʼ ta nanaʼ rït chë ma najin ta naqasaj ruqʼij akʼlaj, xa kan yë ri achkë nunaʼ ryä.

RI NAʼOJ NUYAʼ LE BIBLIA: «Tipoqonaj kiwäch ri nkʼaj chik, ütz inaʼoj tibʼanaʼ kikʼë, ma tinaʼ ta iwiʼ, ma chanin ta tmeqʼeʼ iwkʼë chqä titamaj yixyoʼen» (Colosenses 3:12).