Ri demonios nkiʼij chë ri kamnaqiʼ kʼa kʼäs na kespíritu

Le Biblia nuʼij chë Satanás «najin yeruqʼöl jontir winäq» (Apocalipsis 12:9). Satanás chqä rudemonios ma nkajoʼ ta chë nqanmaj ri nuʼij le Biblia, ri Ruchʼaʼäl Dios. Ryeʼ nkikanuj rubʼanik rchë chë ri winäq nkinmaj chë ri kamnaqiʼ kʼa kʼäs na kespíritu. Tqatzʼetaʼ achkë rubʼanik nkiʼän riʼ.

Ri religiones ri ma yeqä ta chwäch Dios

Kʼïy religiones nkikʼüt chë jontir winäq kʼo jun kespíritu ri ma nkäm ta tapeʼ ryeʼ yekäm. Ryeʼ nkiʼij chë taq jun winäq nkäm, ntel äl respíritu y nbʼä jukʼan chik.

Ye kʼa ri Ruchʼaʼäl Dios ma nukʼüt ta ya riʼ. Taq ntzjon chrij ri rubʼanik xbʼan Adán, le Biblia nuʼij reʼ: «Jehová Dios xuʼän ri achï rkʼë poqlaj y xxpuj pa rutzaʼn ri ruxlaʼ yaʼ ri nuyaʼ kʼaslemal. Ya riʼ xuʼän chë ri achï xjeʼ rukʼaslemal» (Génesis 2:7). Achiʼel nqatzʼët, Dios majun ta jun xyaʼ qa chpan ruchʼakul Adán ri ma ta nkäm.

Le Biblia nuʼij chë taq jun winäq nkäm, majun ta jun nkʼaseʼ qa che rä. Rma riʼ, ma nkowin ta yerutoʼ o yerutzʼlaʼ ri nkʼaj chik. Tatzʼetaʼ achkë nuʼij le Biblia:

• «Ri winäq ri nmakun xtkäm» (Ezequiel 18:4).

• «Ma taxiʼij ta awiʼ taq jun achï nbʼeyomär, taq más jaʼäl nuʼän che rä rachoch; rma taq nkäm, majun ta nkowin nukʼwaj äl; y tapeʼ kan kowan ruqʼij chkiwäch ri nkʼaj chik, ya riʼ xa nkʼis taq nkäm» (Salmo 49:16, 17).

• «Ntel äl ri ruxlaʼ y ri achï ntzolin pa poqlaj; kan yë kʼa ri qʼij riʼ nkʼis ri ruchʼobʼonik» (Salmo 146:4).

Nkʼaj chik textos nkikʼüt chë achiʼel nbʼanatäj rkʼë jun chköp taq nkäm, ke riʼ chqä nbʼanatäj rkʼë jun winäq (Eclesiastés 3:19, 20). Chqä ri kamnaqiʼ «majun chik kitaman ta» (Eclesiastés 9:5, 10). Achiʼel nqatzʼët, taq jun winäq nkäm, majun ta chik jun nkʼaseʼ qa che rä.

Tapeʼ xtaskʼij ruwäch jontir le Biblia, majun akuchï xtawïl wä chë ri kamnaqiʼ ye kʼäs jukʼan chik. Taq jun winäq nkäm, ma nbʼeʼok ta jun espíritu. Ri nbʼix chë taq jun winäq nkäm ntel äl ran, ma chpan ta le Biblia ntel wä. Ri naʼoj riʼ xa rkʼë Satanás chqä rudemonios npë wä. Jehová kan itzel yerutzʼët ri tzʼukün taq tzij ri yekikʼüt ri religiones (Proverbios 6:16-19; 1 Timoteo 4:1, 2).

Ri ajqʼijaʼ

Satanás chqä yeruksaj ri ajqʼijaʼ rchë yeruqʼöl ri winäq. Jun ajqʼij ya riʼ jun winäq ri ntzjon kikʼë ri espíritus. Ye kʼïy winäq, yajün ri ajqʼijaʼ, nkiquʼ chë kikʼë ri kamnaqiʼ najin yetzjon wä. Ye kʼa, achiʼel qatzʼeton pä chik chpan le Biblia, majun ta jun nkowin nbʼanö riʼ (Eclesiastés 9:5, 6, 10).

Rma riʼ, ¿achoq kikʼë yetzjon wä ri ajqʼijaʼ? ¡Kikʼë ri demonios! Ri demonios nkitzʼët achkë nuʼän jun winäq taq kʼa kʼäs na. Ryeʼ nkitzʼët achkë rubʼanik ntzjon, ri rachbʼäl, ri retaman chqä ri yeruʼän. Rma riʼ, chkiwäch ryeʼ kan ma kʼayewal ta nuʼän nkesaj rachbʼäl jun winäq ri kamnäq chik (1 Samuel 28:3-19).

Tzij ri yetzjöx ri xa tzʼukün tzij

Satanás chqä nuksaj ri tzʼukün tzij ri yetzjöx rchë ri winäq nkinmaj chë ri kamnaqiʼ kʼa ye kʼäs na. Kʼïy mul, ri tzij riʼ nkiʼän chë ri winäq ma nkajoʼ ta nkinmaj ri nukʼüt le Biblia (2 Timoteo 4:4).

Chlaʼ África, ye kʼïy winäq nkiʼij chë yekitzʼeton winäq ri ye kamnäq wä äl chik. Ryeʼ nkiʼij chë yekitzʼeton ri winäq riʼ kʼa näj che rä ri akuchï xjeʼ wä kachoch. Ye kʼa, taquʼ rij reʼ: xa ta jun kamnäq nkowin nkatäj pä, ¿ma más ta komä xtrajoʼ xtjeʼ chunaqaj rufamilia chqä rachiʼil?

Chqä rkʼë jbʼaʼ jun winäq xa xuʼ junan jbʼaʼ rkʼë ri xkäm äl. Ya riʼ xbʼanatäj kikʼë kaʼiʼ testigos de Jehová ri najin wä nkitzjoj le Biblia chpan jun tinamït ri kʼa näj kʼo wä. Ryeʼ xkitzʼët chë jun achï ri kʼo chik rujunaʼ kan yalöj yerutzeqelbʼen äl. Rma riʼ xkikʼutuj che rä achkë rma najin nuʼän riʼ. Ryeʼ xkitamaj chë chwäch ri achï riʼ, jun chkë ryeʼ ya riʼ jun runmal ri xkäm chkipan jojun junaʼ qa. Tapeʼ xkiʼij che rä chë ma ke riʼ ta, ri achï riʼ ma nunmaj ta wä chë xa sachnäq. We ri achiʼ riʼ kan ya riʼ wä ruyaʼon chwäch ran, ¿achkë komä xbʼeruʼij chkë ruchʼalal chqä ruvecinos?

Visiones, achïkʼ chqä chʼaʼäl ri yekʼoxäx

Rït rkʼë jbʼaʼ akʼoxan chë ye kʼo jojun winäq kitzʼeton, kikʼoxan o kichkʼan jun ri kan itzel. Kʼïy mul yë ri demonios yebʼanö chë jun winäq nbʼanatäj ya riʼ rkʼë. Rma riʼ, ri winäq riʼ kan nkixiʼij kiʼ. Ya Marein, ri kʼo wä África occidental, nukʼoxaj wä chë ratiʼt, ri kamnäq wä chik, nuskʼij chaqʼaʼ. Rma kan kowan wä nuxiʼij riʼ, ryä nuräq wä ruchiʼ chqä yerukʼasoj wä jontir rufamilia. Taq xqʼax ri tiempo, ryä xuʼän itzel rujolon.

Komä taquʼ rij reʼ: xa ta ri qachʼalal ri ye kamnäq äl kʼa ye kʼäs na, ryeʼ ma ta yojkixiʼij. Nqʼalajin kʼa chë ri yebʼanö jontir riʼ xa yë ri demonios.

Ye kʼa kʼo mul ri winäq nbʼix pä jun chkë ri yerutoʼ o nukʼuqbʼaʼ kikʼuʼx. Tqatzʼetaʼ achkë xbʼanatäj rkʼë ya Gbassay, ri aj Sierra Leona ri yawaʼ wä. Ryä xuʼän jun achïkʼ ri akuchï xtzʼët rutataʼ ri kamnäq wä chik. Ryä xuʼij che rä chë kʼo jun cheʼ ri nkʼatzin nukanuj; chrij riʼ, nkʼatzin nresaj jun ruxaq, nuyaʼ pa yaʼ y nuqüm ri yaʼ riʼ. Ryä kʼo wä chë majun achoq che rä nuʼij wä we majanä tuʼän ya riʼ. Taq xuʼän ri xbʼix che rä, ryä xkʼachöj.

Jun chik ixöq xuʼij chë kʼo jun aqʼaʼ ri rachjil ri kamnäq wä chik xkʼüt pä riʼ chwäch. Ryä xuʼij chë rachjil kan ütz wä ntzuʼun chqä kan jaʼäl wä ruweqon riʼ.

Ri xqatzjoj qa achiʼel ta ütz. Ye kʼa, ¿rkʼë komä Dios petenäq wä? Manä, ma rkʼë ta ryä. Le Biblia nuʼij chë rkʼë Jehová ntzʼuktäj wä pä ri kantzij (Salmo 31:5). Rma riʼ, majun bʼëy xtpë ta pa rujolon nqrqʼöl. Xa xuʼ ri demonios yebʼanö riʼ.

Ye kʼa, ¿ye kʼo komä ütz taq demonios? Majun ta. Tapeʼ kʼo mul ye kʼo jojun nkikʼüt chë achiʼel ta ye ütz, jontir xa ye itzel. Taq ri Diablo xtzjon rkʼë Eva, xkʼüt chë achiʼel ta ütz runaʼoj (Génesis 3:1). Ye kʼa, ¿achkë xbʼanatäj rkʼë Eva taq xyaʼ ruxkïn che rä chqä xuʼän ri xuʼij che rä? Ryä xkäm.

Rkʼë jbʼaʼ rït atzʼeton chë jun itzel winäq kʼïy mul ütz runaʼoj nuʼän kikʼë ri winäq ri nrajoʼ yeruqʼöl. Rma riʼ, kʼïy mul ri qawinaq nkiʼij re tzij reʼ: «Ütz wä laʼ runaʼoj nqʼalajin ye kʼa ma qataman ta achkë kʼo pa ran». Y Ruchʼaʼäl Dios nuʼij reʼ: «Yajün Satanás nuʼän chë achiʼel ta ryä jun utziläj ángel» (2 Corintios 11:14).

Dios ma nuksaj ta chik achïkʼ, visiones nixta chʼaʼäl rchë ntzjon pä kikʼë ri winäq. Ryä nuksaj le Biblia rchë nukʼüt chkiwäch ri winäq achkë bʼey kʼo chë nkikʼwaj. Ya riʼ nuʼän chë nqkowin nqaʼän «xa bʼa achkë ütz taq bʼanobʼäl» (2 Timoteo 3:17).

Achiʼel nqatzʼët, Jehová kowan nqrajoʼ, rma riʼ nuʼij chqë achkë nuksaj ri Diablo rchë nqrqʼöl. Ryä retaman chë ri demonios kan itzel kinaʼoj.