¿Achkë komä rubʼanik xtuʼän qakʼaslemal chqawäch apü?

RI NUʼIJ LE BIBLIA

«Dios [...] xtsuʼ ruyiʼal ri runaqʼ kiwäch, y ma xtjeʼ ta chik kamïk, bʼis, oqʼej nixta tyowen. Jontir riʼ ma xkejeʼ ta chik» (Apocalipsis 21:3, 4, Traducción del Nuevo Mundo, 2019).

¿ACHKË UTZIL NUKʼÄM PÄ PA QAWIʼ RI NQATAMAJ RIʼ?

Jontir xtjeʼ qasamaj chqä kan kiʼ qakʼuʼx xtqaʼän rma kan ütz xttel ronojel chqawäch (Isaías 65:21-23).

Ma xtqatäj ta chik poqän chqä ma xtqyawäj ta chik (Isaías 25:8; 33:24).

Kiʼ qakʼuʼx xtqjeʼ kikʼë ri qachʼalal pa qachoch chqä kikʼë ri qachiʼil xtbʼä qʼij xtbʼä säq (Salmo 37:11, 29).

¿ACHKË RMA ÜTZ NQANMAJ RI NUʼIJ LE BIBLIA?

Rma re kaʼiʼ naʼoj reʼ:

• Dios kʼo ronojel uchqʼaʼ pa ruqʼaʼ rchë nuʼän ri rutzjun. Le Biblia nuʼij chë xa xuʼ Dios kʼo ronojel uchqʼaʼ pa ruqʼaʼ, reʼ ntel chë tzij chë ri ruchqʼaʼ Dios majun bʼëy nkʼis ta (Apocalipsis 15:3). Rma riʼ, ryä nkowin nuyaʼ jun utziläj qakʼaslemal chwäch le Ruwachʼulew. Achiʼel nuʼij le Biblia, Dios ronojel nkowin nuʼän y majun ta jun nqʼatö rchë (Mateo 19:26).

• Dios kan nurayij nuʼän ri rutzjun. Jun tzʼetbʼäl, le Biblia nuʼij chë Dios kan nurayij yerukʼasoj pä chik ri winäq ri ye kamnäq äl (Job 14:14, 15).

  Le Biblia chqä nuʼij chë Jesús, ri Rukʼajol Dios, xeruknaj ri yawaʼiʼ. ¿Achkë rma xuʼän riʼ? Rma kan ya riʼ wä ri xrayij ran xuʼän (Marcos 1:40, 41). Ri xuʼän Jesús nukʼüt chqawäch chë ri Rutataʼ kan nurayij chqä yerutoʼ ri winäq ri nkʼatzin kitoʼik (Juan 5:19).

  Rma riʼ, ütz nqayaʼ chwäch qan chë Jehová chqä Jesús kan nkirayij nkiyaʼ jun utziläj qakʼaslemal chqawäch apü (Salmo 72:12-14; 145:16; 2 Pedro 3:9).