Moisés nuchaʼ nuyaʼ rqʼij Jehová

Taq rïy rmam Jacob ye kʼo na Egipto, xbʼix israelitas chkë. Taq Jacob chqä José xekäm, jun chik faraón xok rey. Re faraón reʼ kowan xxiʼij riʼ taq xtzʼët chë ri israelitas más wä najin yekʼiyär chkiwäch ri egipcios. Rma riʼ xerxïm pa samaj. Ryä xertäq rchë nkiʼän ladrillos chqä kowan samaj xyaʼ chkij pa taq jyuʼ. Tapeʼ ri egipcios más itzel kinaʼoj xkiʼän kikʼë, ri israelitas xa más xekʼiyär. Rma ri faraón ma xqä ta chwäch ya riʼ, xtäq kikamsaxik ri neʼy israelitas, xa xuʼ ri neʼy ri ye qʼopojiʼ ma xerkamsaj ta. ¡Xa xuʼ taquʼ ri xbʼïn·ïl xkinaʼ ri israelitas!

Jokébed, jun israelita, xjeʼ jun rneʼy ri kan jaʼäl ntzuʼun. Rchë ma nkamsäx ta, xyaʼ chpan jun chakäch y xrewaj chkikojöl ri aj ri ye kʼo pa raqän yaʼ Nilo. Míriam, ri ranaʼ ti neʼy, naqaj xjeʼ wä rchë nutzʼët achkë nbʼanatäj rkʼë.

Taq rmiʼal ri faraón xbʼä pa raqän yaʼ rchë nbʼetatin, xtzʼët ri chakäch. Taq xjäq rwiʼ, xtzʼët jun ti neʼy ri najin ntoqʼ, y kan xpoqonaj rwäch. Míriam xuʼij reʼ che rä: «¿Nawajoʼ nbʼekanuj jun ixöq rchë yë ryä nyaʼö rtzʼun ti neʼy?». Ryä xrajoʼ, rma riʼ Míriam xbʼerskʼij pä rteʼ. Ri rmiʼal ri faraón xuʼij reʼ che rä Jokébed: «Takʼwaj äl re akʼal reʼ. Tatzʼetaʼ jbʼaʼ y rïn xtintöj chawä».

Taq ri akʼal xkʼïy, Jokébed xkʼwaj äl che rä rmiʼal ri faraón. Ri rmiʼal ri faraón Moisés rbʼiʼ xyaʼ y kan ral xuʼän che rä. Rma riʼ, Moisés kan achiʼel ta rkʼajol ri faraón xok y, xa bʼa achkë wä nrajoʼ, nyaʼöx che rä. Pero majun bʼëy xmestaj ta Jehová. Moisés rtaman wä chë ryä israelita, ma egipcio ta. Rma riʼ xchaʼ nuyaʼ rqʼij Jehová.

Taq 40 rjnaʼ, Moisés xrajoʼ xertoʼ rwinaq. Kʼo jun qʼij, jun egipcio najin wä nuchʼäy jun israelita. Taq xtzʼët riʼ, Moisés xbʼä chrij y xkamsaj. Chrij riʼ xrewaj qa chpan ri sanayiʼ. Taq ri faraón xtamaj riʼ, xrajoʼ xkamsaj Moisés, pero ryä xanmäj äl Madián. Taq ryä kʼo wä chriʼ, Jehová xchajin rchë.