Jun koʼöl cheʼ ri nbʼrö pa qʼaqʼ

Chpan ri 40 jnaʼ xjeʼ Moisés chlaʼ Madián, xkʼleʼ chqä xejeʼ ralkʼwal. Jun qʼij ri najin wä yerchajij rkarneʼl chunaqaj ri jyuʼ Sinaí kʼo jun xtzʼët ri majun bʼëy rtzʼeton ta. Jun koʼöl cheʼ najin wä nbʼrö pa qʼaqʼ pero ma najin ta wä nkʼat. Taq Moisés xjelun apü, xkʼoxaj jun chʼaʼäl chpan ri cheʼ. Ri chʼaʼäl riʼ xuʼij: «¡Moisés! Ma kajelun ta pä chik. Tawesaj axajabʼ rma kan loqʼoläj akuchï yït kʼo wä». Yë wä Jehová ri xksan jun ángel rchë xtzjon pä rkʼë Moisés.

Moisés xküch rpaläj rma xxiʼij riʼ. Ri chʼaʼäl chqä xuʼij: «Rïn ntzʼeton chë ri israelitas kowan najin nkitäj poqän. Rma riʼ, xtinbʼän chë ma xtkitäj ta chik poqän pa kiqʼaʼ ri egipcios chqä xkenkʼwaj chwäch jun ütz ilew, y nwajoʼ chë rït yatesan pä ntinamit chriʼ Egipto». ¿Achkë xnaʼ Moisés naquʼ rït?

Moisés xuʼij: «¿Achkë xtinbʼij taq xtkikʼutuj chwä achkë xitaqö?». Dios xuʼij: «Taʼij chkë chë Jehová, ri rDios Abrahán, ri rDios Isaac chqä ri rDios Jacob xataqö». Moisés xuʼij: «¿Y si nwinaq ma yinkinmaj ta?». Rchë nukʼüt chwäch chë xttoʼ, Jehová xuʼij che rä Moisés chë tkʼaqaʼ pan ilew ri cheʼ ri rkʼwan pa rqʼaʼ. Taq Moisés xuʼän riʼ, ¡ri cheʼ xbʼeʼok jun kumätz! Chrij riʼ, Moisés xchäp rjey ri kumätz y xbʼeʼok chik jmul rcheʼ. Jehová xuʼij chik che rä: «Taq xtaʼän re milagro reʼ, xtqʼalajin chë rïn xitaqö awchë».

Pero Moisés xuʼij: «Ma kan ta yikowin yitzjon chkiwäch ri winäq». Jehová xuʼij: «Rïn xkibʼin achkë xtabʼeʼij chqä xtintäq äl Aarón ri anmal awkʼë rchë xkaturtoʼ». Moisés xqʼalajin chwäch chë Jehová xttoʼ pä. Rma riʼ xtzolin Egipto y xkʼwaj äl rfamilia.