Ma nkinmaj ta rtzij Jehová

Taq ri israelitas ye kʼo na pä desierto, Coré, Datán, Abiram chqä 250 achiʼaʼ xekatäj pä chrij Moisés. Ryeʼ xkiʼij: «¡Ya xikʼo qakʼuʼx chiwä! ¿Achkë rma kan nkʼatzin chë rït yatekʼwan bʼey chqawäch? ¿Y achkë rma yë Aarón ri sumo sacerdote? Jehová ma xa xuʼ ta awkʼë rït chqä rkʼë Aarón kʼo wä, kan kʼo chqä qkʼë röj». Jehová ma xqä ta chwäch ri xkiʼij, rma xnaʼ chë ma rkʼë ta Moisés najin nkiʼän wä chʼaʼoj, xa kan rkʼë ryä.

Moisés xuʼij reʼ che rä Coré chqä chkë ri achiʼaʼ ri ye kʼo rkʼë: «Kixampä pa tabernáculo chë chwaʼq y tinujsaj pä ri rkʼojlibʼäl ipon. Jehová xtkʼüt chqawäch achkë rchaʼon».

Chkaʼn qʼij, Coré chqä ri 250 achiʼaʼ xkibʼemoloʼ kiʼ rkʼë Moisés pa tabernáculo. Chriʼ xkiporoj pon kan ye achiʼel ta sacerdotes. Jehová xuʼij reʼ che rä Moisés chqä Aarón: «Kixel pä chriʼ rkʼë Coré chqä kikʼë rwinaq».

Coré xbʼä wä pa tabernáculo, pero Datán, Abiram chqä kifamilias ma xkajoʼ ta xebʼä. Jehová xuʼij reʼ chkë ri israelitas: «Ma kixjeʼ ta chunaqaj kachoch Coré, Datán y Abiram». Rma riʼ ri israelitas xeʼel äl chriʼ. Datán, Abiram chqä kifamilias xepaʼeʼ qa chuchiʼ kachoch. Chaq kʼateʼ, ri ilew xjaqatäj y xerkʼwaj äl ri winäq ri ma xenman ta tzij. Y pa tabernáculo, xqä pä jun qʼaqʼ chkaj y xerkamsaj Coré chqä ri 250 achiʼaʼ.

Chrij riʼ, Jehová xuʼij reʼ che rä Moisés: «Jontir ri yekʼwayon bʼey chpan kijatzul tkikʼamaʼ pä ri cheʼ ri nkikʼwaj pa kiqʼaʼ. Tatzʼibʼaj kibʼiʼ ri achiʼaʼ riʼ chrij kicheʼ. Pero chrij ri cheʼ rchë rjatzul Leví tatzʼibʼaj rbʼiʼ Aarón. Keʼayaʼ ri cheʼ riʼ chpan ri tabernáculo. Chrij rcheʼ ri achï ri xtinchaʼ xkeʼel kotzʼiʼj».

Chkaʼn qʼij, Moisés xeresaj pä ri cheʼ y xkʼüt chkiwäch ri yekʼwayon bʼey. Chrij rcheʼ Aarón najin wä yeʼel kotzʼiʼj chqä almendras. Ke riʼ rbʼanik xkʼüt Jehová chë yë Aarón rchaʼon rchë ntok sumo sacerdote.