Jehová nuchaʼ Josué

Moisés kʼïy jnaʼ xkʼwaj bʼey chwäch ri tinamït Israel, y komä, ya xa nkäm. Jehová xuʼij reʼ che rä: «Ma yït ta rït xkatekʼwan kichë ri israelitas chwäch ri ilew ri ntzjun chkë. Pero xtinkʼüt ri ilew chawäch». Rma riʼ, Moisés xuʼij che rä Jehová chë tchaʼ chik jun achï rchë nukʼwaj bʼey chwäch rtinamit. Jehová xuʼij: «Taʼij che rä Josué chë yë ryä xinchaʼ».

Moisés xuʼij chkë ri winäq chë ryä ya nkäm y chë Jehová yë Josué xchaʼ rchë yerksaj apü chwäch ri ilew ri rtzjun chkë. Chrij riʼ, Moisés xuʼij reʼ che rä Josué: «Ma taxiʼij ta awiʼ. Jehová xkaturtoʼ pä». Jbʼaʼ chrij riʼ, Moisés xjoteʼ pa rwiʼ ri jyuʼ Nebo. Chriʼ, Jehová xkʼüt ri ilew chwäch ri xtzüj che rä Abrahán, Isaac chqä Jacob. Moisés kʼo wä 120 rjnaʼ taq xkäm.

Jehová xuʼij reʼ che rä Josué: «Kaqʼax äl pa raqän yaʼ Jordán y katok apü Canaán. Rïn xkatintoʼ achiʼel xintoʼ Moisés. Ma tamestaj ta naskʼij rwäch nLey ronojel qʼij. Ma taxiʼij ta awiʼ, jät y tabʼanaʼ jontir ri xinbʼij chawä».

Josué xertäq kaʼiʼ achiʼaʼ rchë nkibʼetzʼetaʼ ri tinamït Jericó. Chpan ri jun chik historia, xtqatzʼët achkë más xbʼanatäj chriʼ. Taq ri achiʼaʼ xetzolin rkʼë Josué, xkibʼeʼij chë ütz yeʼok chwäch Canaán. Chkaʼn qʼij, Josué xuʼij chkë ri winäq chë tkimoloʼ ri achkë kʼo kikʼë. Naʼäy, xertäq äl ri sacerdotes ri kikʼwan wä ri arca del pacto pa raqän yaʼ Jordán. Ri raqän yaʼ kan nüm wä rbʼanon. Taq ri sacerdotes xkiyaʼ kaqän pa yaʼ, ri raqän yaʼ ma xbʼiyïn ta chik chqä xchaqiʼj qa. Taq xbʼanatäj riʼ, ri sacerdotes xeʼok apü kʼa pa rnikʼajal ri raqän yaʼ. Chriʼ xepaʼeʼ wä qa kʼa taq jontir ri winäq xeqʼax apü jkʼan chik. Taq xkitzʼët ri milagro riʼ, ¿naʼij rït chë xnatäj chkë ri xuʼän Jehová chpan ri mar Rojo?

Tapeʼ kʼïy jnaʼ xeqʼax, ri israelitas xeʼapon na chwäch ri jyuʼ ri rtzjun wä Jehová chkë. Komä ya ütz wä chik nkiyäk kachoch chqä yekiyäk tinamït. Ütz wä chik yekiʼän kitkoʼn chqä yekitïk uvas. Chwäch ri jyuʼ riʼ kan kʼo wä leche chqä miel.