Rahab yerewaj kaʼiʼ israelitas

Ri kaʼiʼ achiʼaʼ ri xetaq äl rma Josué xebʼä Jericó y xekanaj qa pa rachoch jun ixöq ri Rahab rbʼiʼ. Taq ri rey rchë Jericó xtamaj riʼ, xertäq soldados chrachoch Rahab. Ryä xerewaj ri israelitas pa rwiʼ rachoch y xuʼij chkë ri soldados chë kekikanuj jkʼan chik. Chrij riʼ, Rahab xuʼij reʼ chkë ri israelitas: «Rïn xkixintoʼ rma ntaman chë Jehová kʼo iwkʼë chqä chë xkixchʼakon chrij re tinamït reʼ. Xa xuʼ tiyaʼ ichiʼ chwä chë xtiköl nfamilia».

Ri israelitas xkiʼij: «Si naxïm jun këq koloʼ pan aventana, nqayaʼ qachiʼ chawä chë ri xkejeʼ pan awachoch ma xkekäm ta».

Rahab xertoʼ ri israelitas rchë xeʼel äl Jericó. Ryeʼ xkiksaj jun koloʼ rchë xeqä äl pa rventana Rahab. Ri kaʼiʼ achiʼaʼ riʼ oxiʼ qʼij xkiwewaj kiʼ pa taq jyuʼ kʼa riʼ xetzolin rkʼë Josué. Chrij riʼ, ri israelitas xeqʼax chpan ri raqän yaʼ Jordán y xkiʼän ri nkʼatzin rchë yeʼok apü chwäch ri jyuʼ riʼ. Jericó ya riʼ wä ri naʼäy tinamït ri xkechʼakon chrij. Jehová xuʼij chkë chë tkistij rij ri tinamït jmul pa jun qʼij. Seis qʼij ke riʼ xkiʼän. Chpan ri séptimo qʼij, xkistij rij ri tinamït siete mul. Chrij riʼ, ri sacerdotes xkixpuj kitrompetas y ri soldados israelitas kan kuw xkiräq kichiʼ. ¡Ri muros ri ye kʼo chrij ri tinamït xetzaq! Tapeʼ rachoch Rahab pa rwiʼ ri muro kʼo wä, ma xtzaq ta. Rahab y rfamilia ma xekäm ta rma ryä xkʼuqbʼaʼ rkʼuʼx chrij Jehová.