Gedeón nchʼakon chkij ri madianitas

Taq xqʼax ri tiempo, ri israelitas xkiyaʼ qa chik Jehová, y xa tyox chik xkiyaʼ kiqʼij. Chkipan siete jnaʼ, ri winäq aj Madián yekileqʼaj wä kichkop ri israelitas chqä nkitzʼlaʼ wä kitkoʼn. Rchë ma yekamsäx ta, ri israelitas nkewaj wä kiʼ pa taq jül chqä pa taq jyuʼ. Pa rkʼisbʼäl, xkikʼutuj kitoʼik che rä Jehová. Rma riʼ Jehová xtäq jun ángel rchë xbʼeruʼij reʼ che rä Gedeón, jun kʼajol israelita: «Jehová xaturchaʼ rït rchë yatok jun ajbʼanöy chʼaʼoj ri kowan rchqʼaʼ». Gedeón xuʼij: «¿Achkë rma naʼij rït chë rïn xtinköl Israel si rïn kan majun nqʼij ta?».

Gedeón xrajoʼ xtzʼët si kan yë wä ryä xchaʼöx rma Jehová. Rma riʼ, ¿achkë xuʼän? Xyaʼ rsmal jun karneʼl pan ilew y xuʼij reʼ che rä Jehová: «Si chwaʼq nmaqʼaʼ ri raxqʼabʼ xtxqʼebʼaʼ rsmal karneʼl pero ri ilew chaqiʼj rbʼanon, xtintamaj chë xinachaʼ rïn rchë nköl Israel». Chkaʼn qʼij, ri rsmal ri karneʼl kowan wä xeqʼäl, pero ri ilew chaqiʼj rbʼanon. Rma riʼ, Gedeón xuʼij che rä Jehová chë chkaʼn qʼij ri rsmal karneʼl chaqiʼj tbʼanaʼ, pero ri ilew txeqʼeʼ. Ri xkʼutuj Gedeón xbʼanatäj. Ya riʼ xkʼüt chwäch chë yë ryä xchaʼöx rma Jehová. Rma riʼ, xermöl rsoldados rchë nkibʼebʼanaʼ chʼaʼoj kikʼë ri madianitas.

Jehová xuʼij reʼ che rä Gedeón: «Xkentoʼ ri israelitas rchë xkechʼakon. Pero rma kowan ye kʼïy, rkʼë jbʼaʼ xtkiquʼ chë kiyonïl yechʼakon. Más ütz taʼij chkë ri nkixiʼij kiʼ chë ketzolin chkachoch». 22,000 achiʼaʼ xebʼä äl y 10,000 xekanaj qa. Chrij riʼ Jehová xuʼij: «Kʼa ye kʼïy na. Keʼakʼwaj äl chuchiʼ raqän yaʼ y xa xuʼ kekanaj qa ri achiʼaʼ ri taq nkiqüm kiyaʼ, nkitzuʼ apü si ma ye petenäq ta kikʼulel chkij». Xa xuʼ 300 achiʼaʼ xebʼanö riʼ. Jehová xuʼij chë ri 300 soldados riʼ xkechʼakon chkij ri 135,000 soldados aj Madián.

Ri aqʼaʼ riʼ, Jehová xuʼij che rä Gedeón: «Jäx chkij ri madianitas». Gedeón xyaʼ ukʼaʼ chkë ri soldados, jun qʼaqʼ y jun xar ri akuchï xkewaj wä äl kiqʼaqʼ, y xuʼij reʼ chkë: «Titzʼetaʼ ri xtinbʼän y tibʼanaʼ chqä rïx». Gedeón xxpuj ri ukʼaʼ, xpaxij ri xar, xsloj ri qʼaqʼ y kan kuw xuʼij: «¡Respada Jehová chqä Gedeón!». Ri 300 achiʼaʼ ke riʼ chqä xkiʼän. Ri madianitas kowan xkixiʼij kiʼ, rma riʼ xa bʼa akuchï xkikʼäq wä äl anin. Y rma xsach chkiwäch, xa yë ryeʼ xkikamsaj qa kiʼ chkiwäch. Jehová jmul chik xertoʼ ri israelitas rchë xechʼakon chkij kikʼulel.