Ri xtzüj Jefté

Ri israelitas xkiyaʼ qa chik Jehová, y xa tyox chik xkiyaʼ kiqʼij. Pero ri tyox riʼ ma yekitoʼ ta taq ri ammonitas nkiyaʼ poqonal pa kiwiʼ. Ri israelitas kʼïy jnaʼ xkitäj poqän. Pa rkʼisbʼäl, xkiʼij reʼ che rä Jehová: «Xqmakun chawäch. Tabʼanaʼ utzil, kojakoloʼ chkiwäch qakʼulel». Ri israelitas xkichüp kiwäch ri tyox, y xkiyaʼ chik jmul rqʼij Jehová. Ya riʼ taq Jehová ma xköchʼ ta chik xtzʼët chë nkitäj poqän.

Rma riʼ, ri israelitas xkichaʼ Jefté rchë nukʼwaj bʼey chkiwäch taq xtkiʼän chʼaʼoj kikʼë ri ammonitas. Jefté xuʼij reʼ che rä Jehová: «Si yojatoʼ rchë nqchʼakon, xtinyaʼ ri naʼäy winäq chawä ri xttel pä chwachoch chë nkʼulik». Jehová xkʼoxaj roración Jefté, rma riʼ xtoʼ rchë nchʼakon.

Taq Jefté xtzolin chrachoch, yë rmiʼal ri naʼäy xel pä chukʼulik. Ryä najin wä nxajö chqä najin wä nusloj ri pandereta. Jefté xa xuʼ wä jun rmiʼal kʼo. Rma riʼ, ¿achkë xtuʼän? Ryä xnatäj pä che rä ri xtzüj che rä Jehová, rma riʼ xuʼij: «¡Ay teʼ, kan ntiʼon wan! Rïn kʼo jun xintzüj che rä Jehová y, rchë nbʼän ri xintzüj, nkʼatzin yatintäq äl pa tabernáculo chlaʼ Siló». Ri rmiʼal xuʼij: «Papa, si xatzüj ya riʼ che rä Jehová, komä kʼo chë naʼän. Xa xuʼ tayaʼ qʼij chwä rchë yibʼä kikʼë wamigas pa taq jyuʼ kaʼiʼ ikʼ. Chrij riʼ, xkibʼä pa tabernáculo». Ri rmiʼal Jefté xnmaj tzij y xsamäj pa tabernáculo jontir rkʼaslemal. Ramigas ronojel wä jnaʼ yebʼä Siló rchë nkibʼetzʼetaʼ.