Jehová ntzjon pä rkʼë Samuel

Ri sumo sacerdote Elí ye kʼo wä kaʼiʼ rkʼajol: Hofní y Finehás. Ryeʼ yë sacerdotes chpan ri tabernáculo. Pero ma nkismajij ta wä rleyes Jehová chqä itzel kinaʼoj nkiʼän kikʼë ri winäq. Taq ri israelitas yekikʼwaj wä sacrificios che rä Jehová, Hofní y Finehás nkikʼän qa ri tiʼäj ri más ütz rchë nkitäj. Elí rtaman wä chë ryeʼ ma ütz ta najin nkiʼän. Tapeʼ ke riʼ, majun nuʼij ta chkë. ¿Naquʼ rït chë Jehová chaq kiʼ che rä ri najin nbʼanatäj?

Tapeʼ Samuel más koʼöl chwäch Hofní chqä Finehás, ma jnan ta rnaʼoj kikʼë. Rma riʼ, Jehová kan kiʼ rkʼuʼx rkʼë. Kʼo jun aqʼaʼ, taq Samuel warnäq, xkʼoxaj chë kʼo jun nskʼin rchë. Ryä chanin xkatäj, xbʼä akuchï kʼo wä Elí y xuʼij: «¿Kʼo xinaskʼij?». Elí xuʼij: «Manä, majun ta xatinskʼij. Katewär». Samuel xbʼewär. Jmul chik, xkʼoxaj chë kʼo jun nskʼin rchë, y xbʼanatäj achiʼel xbʼanatäj pa naʼäy mul. Taq Samuel xkʼoxaj ri chʼaʼäl pa rox mul, Elí xqʼax chwäch chë yë Jehová nskʼin pä rchë. Rma riʼ, Elí xuʼij che rä Samuel chë si nskʼïx chik jmul, ryä nkʼatzin wä nuʼij reʼ: «Katzjon pä, Jehová. Rïn, ri asamajel, najin yatinkʼoxaj».

Samuel xtzolin pa rchʼat y taq xkʼoxaj reʼ: «Samuel, Samuel», ryä xuʼij: «Katzjon pä, Jehová. Rïn, ri asamajel, najin yatinkʼoxaj». Jehová xuʼij: «Taʼij che rä Elí chë kʼo poqonal xtinyaʼ pa rwiʼ ryä chqä pa rwiʼ rfamilia. Ryä rtaman chë rkʼajol ma ütz ta najin nkiʼän chpan ntabernáculo, pero majun ta nuʼij chkë». Chkaʼn qʼij, Samuel xjäq rpuertas ri tabernáculo, achiʼel nuʼän ronojel qʼij. Ryä nuxiʼij wä riʼ nuʼij che rä Elí ri xuʼij pä Jehová. Pero Elí xskʼij y xuʼij reʼ che rä: «Taʼ, ¿achkë xuʼij Jehová chawä?». Rma riʼ Samuel xuʼij jontir che rä.

Samuel xkʼïy qʼanäj, y Jehová ronojel mul xok ramigo. Jontir ri israelitas kitaman wä chë Jehová xchaʼ Samuel rchë ntok profeta chqä juez.