Jonatán majun bʼëy xyaʼ ta qa David

Jonatán, ri naʼäy rkʼajol ri rey Saúl, kan ma nuxiʼij ta wä riʼ. David xuʼij chë Jonatán más chanin nbʼä chwäch jun águila y más rchqʼaʼ chwäch jun león. Kʼo jun qʼij, Jonatán xtzʼët chë pa rwiʼ jun jyuʼ ye kʼo soldados filisteos. Rma riʼ, xuʼij ya reʼ che rä ri kʼwayon äl rescudo: «Xtqaʼän chʼaʼoj kikʼë xa xuʼ si ri filisteos nkiʼij chqë chë qjoteʼ kikʼë, ya riʼ retal xtyaʼ pä Jehová». Ri filisteos xkiʼij: «¡Kixjoteʼ pä rchë nqaʼän chʼaʼoj!». Rma riʼ, Jonatán chqä rchiʼil xejoteʼ pa rwiʼ ri jyuʼ y xekichʼäk 20 soldados.

Jonatán kʼo wä chë ntok rey taq Saúl xtkäm. Pero ryä rtaman wä chë Jehová yë David xchaʼ rchë nbʼeʼok rey pa rwiʼ Israel. Tapeʼ ke riʼ, ma itzel ta xnaʼ che rä. Pa rkʼexel riʼ, Jonatán y David xeʼok ütz taq amigos. Ryeʼ xkiʼij chë xtkitoʼ kiʼ che kaʼiʼ. Rchë Jonatán xkʼüt chwäch David chë ramigo, xyaʼ respada, r·arco, rcincho chqä rtzyaq che rä.

Taq David najin wä nanmäj chwäch Saúl, Jonatán xbʼä chutzʼetik chqä xuʼij reʼ che rä: «Ma taxiʼij ta awiʼ chqä ma kabʼison ta. Jehová yaturchaʼon chik rït rchë yatok rey. Yajün ntat rtaman riʼ». ¿Nawajoʼ rït njeʼ jun awamigo ri kan jaʼäl rnaʼoj achiʼel Jonatán?

Jonatán kʼïy mul xxiʼin rij rkʼaslemal rma xtoʼ ramigo. Ryä rtaman chë Saúl, ri rtataʼ, nrajoʼ wä nukamsaj David. Rma riʼ xuʼij reʼ che rä: «Si xtakamsaj David, xtaʼän jun mamaʼ amak. Ryä majun ta jun itzelal rbʼanon». Saúl xkatäj ryowal chrij Jonatán. Jojun jnaʼ chrij riʼ, Saúl y Jonatán xekäm chpan jun chʼaʼoj.

Taq Jonatán xkäm, David xkanuj Mefibóset, ri rkʼajol Jonatán. Taq xrïl, xuʼij reʼ che rä: «Xkatinchajij jontir akʼaslemal, rma atataʼ wamigo rïn. Xkajeʼ wkʼë chpan npalacio chqä xkawaʼ wkʼë». David majun bʼëy xmestaj ta Jonatán, ri ramigo.