Jun rtemplo Jehová

Taq Salomón xok rey, Jehová xkʼutuj reʼ che rä: «¿Achkë nawajoʼ nyaʼ chawä?». Salomón xuʼij: «Rïn kʼa yïn kʼajol na, y kʼo ma ntaman ta nbʼän. Rma riʼ, tabʼanaʼ utzil, tayaʼ nnaʼoj rchë ütz nkʼwaj bʼey chwäch atinamit». Jehová xuʼij: «Rma anaʼoj xakʼutuj, rïn xtinyaʼ más anaʼoj chwäch xa bʼa achkë winäq. Chqä kʼïy abʼeyomal xtinyaʼ, y kʼïy jnaʼ xkakʼaseʼ si xtanmaj ntzij».

Salomón xchäp ryakik ri templo. Ryä xksaj oro, plata, cheʼ chqä abʼäj. Jontir ri xksaj kan yë ri más ütz. Kan pa mil chkë achiʼaʼ chqä ixoqiʼ xesamäj chyakik ri templo, y siete jnaʼ xkʼwaj rchë xyak. Ri qʼij taq xjach che rä Jehová, xeyaʼöx chköp pa rwiʼ ri altar. Salomón xxkeʼ chwäch ri altar y xuʼän jun oración. Ryä xuʼij: «Qatat Jehová, rït taqäl chawij nyaʼöx jun atemplo más nüm chqä más jaʼäl chwäch reʼ. Tapeʼ ke riʼ, tabʼanaʼ utzil, kiʼ akʼuʼx tabʼanaʼ rkʼë ri rbʼanik nqayaʼ aqʼij chqä kojakʼoxaj taq nqaʼän orar chawä». ¿Achkë naquʼ rït? ¿Xqä komä chwäch Jehová ri templo? ¿Xkʼoxaj komä roración Salomón? Taq Salomón xkʼis roración, xqä pa qʼaqʼ chlaʼ chkaj y xtäj ri kʼo pa rwiʼ ri altar. Ke riʼ rbʼanik xkʼüt Jehová chë xqä chwäch ri templo. Taq ri israelitas xkitzʼët riʼ, kan xel kikʼuʼx.

Salomón xtamatäj rwäch pa tinamït Israel chqä chkipan tinamït ri näj ye kʼo wä rma kowan rnaʼoj. Ri winäq yeʼapon wä rkʼë rchë nkikʼutuj kitoʼik che rä. Yajün ri reina aj Saba xapon rkʼë rchë nutzʼët si kantzij rkʼoxan chrij o manä. Rma riʼ kʼo kʼïy ri xkʼutuj che rä. Taq xkʼoxaj ri xuʼij Salomón, ryä xuʼij: «Rïn kan ma nnmaj ta wä ri kibʼin chawij rït, pero komä ntzʼët chë kowan anaʼoj, más chwäch ri kibʼin chwä. Jehová ri aDios kan kʼïy ütz ryaʼon pä pan awiʼ». Ri winäq pa tinamït Israel kan jaʼäl wä rbʼanon kikʼaslemal. Pero jontir riʼ, xa xjalatäj.