Jun tinamït ri nujäch riʼ pa kaʼiʼ

Taq Salomón xyaʼ rqʼij Jehová, jontir israelitas jaʼäl xuʼän kikʼaslemal. Pero ryä xkʼleʼ kikʼë ye kʼïy ixoqiʼ ri jun chik kitinamit chqä xa tyox nkiyaʼ kiqʼij. Ya riʼ xuʼän chë Salomón eqal xjalatäj rnaʼoj chqä xa tyox chik xyaʼ kiqʼij. Jehová xpë ryowal chqä xuʼij reʼ che rä: «Xtinwesaj Israel pa rqʼaʼ afamilia y xtinjäch pa kaʼiʼ. Ri peraj más nüm xtinyaʼ qa pa rqʼaʼ jun amos, y afamilia rït xtqʼät tzij pa rwiʼ ri koʼöl peraj».

Jehová kʼo chik jun xuʼän rchë jontir nqʼax pa kijolon ri xuʼij. Jeroboán, jun rmos Salomón, bʼenäq wä pa bʼey taq xrïl ri profeta Ahíya. Ri profeta xresaj jun rtzyaq chrij, xrïchʼ pa 12 peraj y xuʼij reʼ che rä Jeroboán: «Jehová xtresaj ri tinamït Israel pa rqʼaʼ rfamilia Salomón y xtjäch pa kaʼiʼ. Takʼamaʼ 10 peraj rchë re tzyäq reʼ, rma xkatok rey pa kiwiʼ 10 ijatzul». Taq Salomón xkʼoxaj riʼ, xrajoʼ xkamsaj Jeroboán. Rma riʼ Jeroboán xanmäj äl Egipto. Taq Salomón xkäm, Rehoboam, ri rkʼajol, xok rey. Jeroboán xquʼ chë ma nxiʼin ta chik rij rkʼaslemal rma riʼ xtzolin Israel.

Chrij riʼ, ri yeyaʼö rnaʼoj ri rey ri ye riʼj chik xkiʼij reʼ che rä: «Si ütz anaʼoj naʼän, ri winäq ronojel mul xtkinmaj atzij». Pero ramigos ri ye kʼojolaʼ na xkiʼij reʼ che rä: «Nkʼatzin itzel anaʼoj naʼän. Tayaʼ más samaj chkij ri winäq». Rehoboam xnmaj kitzij ramigos, rma riʼ itzel rnaʼoj xuʼän kikʼë ri winäq. Ya riʼ xuʼän chë ri winäq xekatäj chrij y xkiʼän chë Jeroboán xok rey pa kiwiʼ 10 ijatzul. Chkë ri ijatzul riʼ xbʼix tinamït Israel. Y chkë ri 2 ijatzul chik xbʼix tinamït Judá, y kʼa xekanaj na pa rqʼaʼ Rehoboam. Ke riʼ rbʼanik xejachatäj ri 12 ijatzul rchë Israel.

Jeroboán ma xrajoʼ ta chë rwinaq yebʼä Jerusalén rchë nkiyaʼ rqʼij Jehová. ¿Ataman rït achkë rma? Rma Jerusalén pa rqʼaʼ Rehoboam kʼo wä, y ryä xquʼ chë rwinaq rkʼë jbʼaʼ xa Rehoboam chik xtkinmaj rtzij. Rma riʼ xeruʼän kaʼiʼ aläj wakx rkʼë oro y xuʼij reʼ chkë rwinaq: «Jerusalén kʼa näj kʼo wä. Más ütz kixkanaj aweʼ y tiyaʼ kiqʼij re tyox reʼ». Ri winäq xkinmaj rtzij y jmul chik xkimestaj Jehová.