Jun itzel reina nutöj rmak

Ri rey Acab kʼo wä rpalacio pa tinamït Jezreel. Ryä nutzuʼ wä apü pa rventana rjyuʼ jun achï ri Nabot rbʼiʼ. Acab nrajoʼ wä ri jyuʼ riʼ chqä xrajoʼ xlöqʼ qa. Pero Nabot ma nrajoʼ ta wä nukʼayij, rma rLey Jehová nuʼij chë ri jyuʼ ri nkiyaʼ qa ri teʼej tataʼaj chkë kalkʼwal ma ütz ta nkʼayïx qa. Nabot yë ri ütz xuʼän. ¿Naquʼ rït chë Acab ütz xkʼoxaj ri xuʼij Nabot che rä? Manä. Acab xkatäj ryowal. Rma riʼ xtzʼapij riʼ pa rcuarto chqä ma xrajoʼ ta chik xwaʼ.

Ri rxjayil Acab ya riʼ Jezabel, jun itzel reina. Jezabel xuʼij reʼ che rä Acab: «¡Rït yït ri rey rchë Israel! Xa bʼa achkë nawajoʼ, yakowin njeʼ awkʼë. Rïn xtinbʼän chë ri jyuʼ riʼ xttok awchë rït». Rma riʼ, xtzʼibʼan äl chkë ri kʼamöl taq bʼey ri ye kʼo chpan ri tinamït. Chriʼ xuʼij äl chë tkiqʼabʼaj chrij Nabot chë xyöqʼ Dios chqä chë tkikamsaj rkʼë abʼäj. Ri kʼamöl taq bʼey xkiʼän ri xuʼij Jezabel chkë. Chrij riʼ, ryä xuʼij reʼ che rä Acab: «Nabot xkäm yän. Ütz chik yakanaj qa rkʼë rjyuʼ».

Jezabel kan ye kʼïy winäq ri nkajoʼ Jehová xerkamsaj. Ryä chqä xyaʼ kiqʼij tyox y xuʼän kʼïy ma ütz ta. Jehová xtzʼët pä jontir riʼ. Rma riʼ, ¿achkë xuʼän?

Taq qʼaxnäq chik jun tiempo kamnäq Acab, Jehoram, ri rkʼajol, xbʼeʼok rey. Chpan ri tiempo riʼ, Jehová xtäq Jehú rchë xuʼän chë Jezabel chqä rfamilia xkitöj kimak.

Jehú xjoteʼ äl chpan rchʼichʼ chqä xbʼä Jezreel, ri akuchï kʼo wä Jezabel. Jehoram chqä xjoteʼ äl chpan rchʼichʼ rchë nbʼerkʼuluʼ Jehú. Taq xtzʼët apü, Jehoram xkʼutuj reʼ che rä: «¿Ütz rbʼanon jontir?». Jehú xuʼij: «Majun ütz ta xtuʼän si ateʼ ma xtyaʼ ta qa rbʼanik ri itzelal». Taq Jehoram xkʼoxaj riʼ, xrajoʼ xtzolin rchë nanmäj äl pero Jehú xkamsaj rkʼë jun flecha.

Chrij riʼ, Jehú xbʼä pa rpalacio Jezabel. Taq Jezabel xkʼoxaj riʼ, xqʼomaj riʼ, xuʼän rbʼanik rwiʼ y xyoʼej apü chkaj che rä rpalacio chuxkïn jun ventana. Taq Jehú xapon, Jezabel kan itzel rbʼanik xchʼaʼej apü. Jehú xuʼij reʼ chkë ri winäq ri ye kʼo chuxkïn Jezabel: «¡Tikʼaqaʼ pä!». Ryeʼ xkikʼäq äl pa ventana. Taq xqä pan ilew, xkäm.

Chrij riʼ, Jehú xerkamsaj ri 70 ralkʼwal Acab y xuʼän chë ri winäq ma xkiyaʼ ta chik rqʼij Baal. ¿Achkë nqatamaj qa chrij reʼ? Chë Jehová nutzʼët jontir. Y ryä rtaman ajän nuʼän chë ri winäq nkitöj jontir ri ma ütz ta nkiʼän.