Jehová nutoʼ Jehosafat chkiwäch rkʼulel

Ri rey Jehosafat rchë Judá xwulaj raltares ri dios Baal chqä xchüp kiwäch ri tyox chpan rtinamit. Ryä nrajoʼ wä chë ri winäq aj Judá tkitamaj achkë nrajoʼ Jehová chë nkiʼän. Rma riʼ xertäq äl achiʼaʼ ri yesamäj rkʼë chqä levitas rchë nkikʼüt rleyes Jehová chkiwäch ri winäq.

Ri tinamït ri ye kʼo naqaj nkixiʼij wä kiʼ nkiʼän chʼaʼoj rkʼë Judá rma kitaman chë Jehová nutoʼ rtinamit. Rma riʼ kʼïy wä nkispaj che rä ri rey Jehosafat. Pero jun qʼij, ri winäq aj Ammón, Moab chqä nkʼaj chik tinamït ri ye kʼo Seír xkimöl kiʼ rchë nkiʼän chʼaʼoj rkʼë Judá. Jehosafat rtaman wä chë nkʼatzin rtoʼik Jehová che rä. Rma riʼ xermöl ri achiʼaʼ, ri ixoqiʼ chqä ri akʼalaʼ chpan Jerusalén. Ryä xuʼij reʼ che rä Jehová chkiwäch ryeʼ: «Jehová, röj xa xuʼ xtqachʼäk re chʼaʼoj reʼ si rït yojatoʼ pä. Tabʼanaʼ utzil, taʼij pä chqë achkë nkʼatzin nqaʼän».

Jehová xkʼoxaj Jehosafat y xuʼij reʼ che rä: «Ma tixiʼij ta iwiʼ, rïn xkixintoʼ. Jäx akuchï xtbʼan wä ri chʼaʼoj, kixjeʼ chriʼ y titzʼetaʼ achkë rbʼanik xkixinköl». ¿Achkë rbʼanik xerköl Jehová?

Chkaʼn qʼij, Jehosafat xerchaʼ achiʼaʼ ri yebʼixan y xuʼij chkë chë kenabʼyej chkiwäch ri soldados. Ryeʼ xeʼel äl Jerusalén rchë xebʼä Tecoa, ri akuchï xtbʼan wä chʼaʼoj.

Ri achiʼaʼ kan kiʼ wä kikʼuʼx najin yebʼixan che rä Jehová rkʼë kuw kichʼaʼäl. Jehová xertoʼ pä. Xuʼän chë ri ammonitas y ri moabitas xsach chkiwäch. Rma riʼ xa chkiwäch ryeʼ xkichäp wä chʼaʼoj. Jontir xekäm. Pero Jehová xerköl ri winäq aj Judá, ri soldados chqä ri sacerdotes. Jontir ri tinamït ri ye kʼo naqaj xkikʼoxaj ri xuʼän Jehová, y xkitzʼët chë Jehová kan nutoʼ rtinamit chkiwäch rkʼulel. ¿Achkë rbʼanik nuköl Jehová rtinamit? Kan kʼïy rbʼanik nuʼän riʼ. Ryä ma nkʼatzin ta kitoʼik ri winäq che rä.