Jun ejército ri nbʼrö qʼaqʼ chrij

Ri rey Ben-Hadad rchë Siria kʼïy mul xkatäj pä chrij Israel. Pero ri profeta Eliseo ronojel mul xuʼij che rä ri rey rchë Israel akuchï kiyoʼen wä rchë ma nbʼä ta chriʼ. Rma riʼ, taq Ben-Hadad xtamaj chë Eliseo pa tinamït Dotán kʼo wä, xertäq äl rsoldados chrij.

Ri sirios chaqʼaʼ chik xeʼapon Dotán. Chkaʼn qʼij, ri rmos Eliseo xel chojay y xtzʼët chë ye kʼïy soldados kistin rij ri tinamït. Rma kowan xxiʼij riʼ, xuʼij: «Eliseo, ¿achkë xtqaʼän?». Eliseo xuʼij: «Ye kʼo más qachiʼil röj chwäch ri ye kʼo kikʼë ryeʼ». Ya riʼ taq Jehová xuʼän chë rmos Eliseo xtzʼët chë chkiwäch ri jyuʼ ye kʼo kʼïy kej chqä chʼichʼ ri yeksäx pa chʼaʼoj ri nbʼrö qʼaqʼ chkij.

Taq ri soldados sirios xebʼä chrij Eliseo, ryä xkʼutuj rtoʼik che rä Jehová. Rma riʼ Jehová xuʼän chë ri soldados xsach chkiwäch akuchï ye kʼo wä. Chrij riʼ Eliseo xuʼij chkë: «Rïx xa jkʼan chik tinamït xixpë wä. Kixampä wkʼë rchë yixinkʼwaj rkʼë ri achï ri najin nikanuj». Eliseo xerkʼwaj äl Samaria rkʼë ri rey rchë Israel.

Ya riʼ taq ri sirios xkinaʼej akuchï ye kʼo wä, pero ma yekowin ta wä chik yeʼanmäj äl. Ri rey rchë Israel xkʼutuj reʼ che rä Eliseo: «¿Ye nkamsaj?». Tnatäj chqë chë ri sirios xkajoʼ xkichäp äl Eliseo. Rma riʼ, ¿xttzolij komä rkʼexel Eliseo chkë? Manä. Ryä xuʼij reʼ che rä ri rey: «Ma keʼakamsaj ta. Tayaʼ kiway y tayaʼ qʼij chkë rchë yebʼä äl». Rma riʼ ri rey xuʼän kʼïy rkïl wäy chqä xyaʼ chkë. Chrij riʼ, xyaʼ qʼij chkë rchë xetzolin äl chkachoch.