Jehoiadá nukʼüt chë ma nuxiʼij ta riʼ

Atalía, ri ral Jezabel, xkʼleʼ rkʼë ri rey rchë Judá, pero kan itzel chqä rnaʼoj. Taq ri rey xkäm, ri ral xbʼeʼok rey. Y taq ral xkäm, yë chik Atalía xqʼatö tzij pa rwiʼ Judá. Rchë ronojel mul ntok reina, xerkamsaj jontir ri ralkʼwal ri rey chqä xa bʼa achkë winäq ri rkʼë jbʼaʼ nkanaj qa pa rkʼexel. ¡Yajün rmam xerkamsaj! Rma riʼ jontir nkixiʼij wä kiʼ chwäch.

Ri sumo sacerdote Jehoiadá chqä Jehoseba, ri rxjayil, kitaman wä chë ri najin nuʼän Atalía kan itzel. Rma riʼ xkewaj ti neʼy Jehoás, jun chkë rmam Atalía, tapeʼ xxiʼin rij kikʼaslemal. Ti akʼal pa templo xkʼïy wä.

Taq Jehoás siete wä rjnaʼ, Jehoiadá xermöl ri yekʼwayon bʼey chkiwäch ri yechajin ri templo chqä ri levitas. Ryä xuʼij reʼ chkë: «Tichajij rchiʼ ri templo. Majun ta jun ttok pä». Chrij riʼ, Jehoiadá xyaʼ ri corona pa rjolon Jehoás rchë nbʼeʼok ri rey rchë Judá. Rma riʼ ri winäq aj Judá xkiʼij: «¡Yalöj tkʼaseʼ ri rey!».

Taq ri reina Atalía xerkʼoxaj ri winäq, kan chanin xbʼä pa templo. Taq xtzʼët chë kʼo chik jun rey, xuʼij: «¡Jontir rïx xa kaʼiʼ ipaläj!». Ri najin wä yechajin ri templo xkichäp Atalía, xkikʼwaj äl y xkikamsaj. Ryä majun ütz ta xkʼüt chkiwäch ri winäq. ¿Achkë xbʼanatäj chrij riʼ?

Rkʼë rtoʼik Jehoiadá, ri winäq xkitzüj che rä Jehová chë xa xuʼ ryä xtkiyaʼ rqʼij. Jehoiadá xuʼän chë xwuläx rtemplo Baal chqä xerwulaj ri tyox. Ryä xeryaʼ sacerdotes chqä levitas chpan ri templo rchë ri winäq jmul chik nkiyaʼ rqʼij Jehová. Chqä xeryaʼ achiʼaʼ chuchiʼ ri templo rchë ma nkiyaʼ ta qʼij chë jun winäq ri xa tzʼil chwäch Dios ntok apü. Chrij riʼ Jehoiadá chqä ri yekʼwayon bʼey xkikʼwaj äl Jehoás pa palacio y xkitzʼibʼaʼ chpan ri trono. Ri winäq aj Judá kowan xel kikʼuʼx. Ryeʼ majun ta wä chik nqʼatö kichë rchë nkiyaʼ rqʼij Jehová, ni Atalía ni Baal. ¿Naquʼ rït chë Jehoiadá xkʼüt chë ma nuxiʼij ta riʼ? ¿Nqʼax chawäch chë rma xuʼän riʼ kan ye kʼïy winäq xertoʼ?