Jehová ma nikʼo ta rkʼuʼx rkʼë Jonás

Ri winäq aj Nínive, jun tinamït ri kʼo Asiria, kan itzel wä kinaʼoj. Jehová xuʼij che rä ri profeta Jonás chë tbʼä Nínive rchë nuʼij chkë ri winäq chë tkijalaʼ kinaʼoj. Pero Jonás, pa rkʼexel nbʼä Nínive, xa xjoteʼ äl chpan jun barco ri nbʼä pa tinamït Tarsis.

Taq ri barco bʼenäq wä pa rwiʼ mar, xpë jun mamaʼ jöbʼ. Ri ye kʼo pa barco kowan xkixiʼij kiʼ. Rma riʼ xkiʼän orar chkë kidioses, chqä xkiʼij reʼ: «¿Achkë rma najin nbʼanatäj ya reʼ?». Pa rkʼisbʼäl, Jonás xuʼij: «Nmak rïn. Najin yinanmäj äl rchë ma nbʼän ta ri xuʼij Jehová chwä. Kinikʼaqaʼ äl pa yaʼ rchë xttaneʼ ri jöbʼ». Ri achiʼaʼ ma nkajoʼ ta wä nkikʼäq äl Jonás pa yaʼ, pero ryä xtäj rqʼij chkij chë tkibʼanaʼ riʼ. Rma riʼ xkikʼäq äl pa mar y ri jöbʼ xtaneʼ.

Jonás xquʼ chë xtkäm. Taq más y más bʼenäq äl chuxeʼ yaʼ, ryä xuʼän orar che rä Jehová. Jehová xtäq äl jun mamaʼ kär ri xtäj äl Jonás pero ma xkäm ta. Taq kʼo chpan ri kär, Jonás xuʼän orar che rä Jehová. Ryä xuʼij: «Nyaʼ nchiʼ chawä chë ronojel mul xtinmaj atzij». Jehová xuʼän chë Jonás xjeʼ oxiʼ qʼij chpan ri kär. Chrij riʼ xuʼän chë ri kär xbʼeryaʼ qa chuchiʼ mar.

Jehová xköl Jonás. Pero, ¿xel chë tzij riʼ chë ma xkʼatzin ta chik xbʼä Nínive? Manä. Jehová xtäq äl chik jmul chpan ri tinamït riʼ. Pero re mul reʼ Jonás xnmaj tzij. Taq xapon Nínive, xuʼij reʼ chkë ri winäq: «Taq xtqʼax 40 qʼij, Jehová xtchüp rwäch re tinamït reʼ». Ya riʼ taq kʼo jun xbʼanatäj ri ma ryoʼen ta wä ryä: ri ninivitas xkijäl kinaʼoj. Ri rey rchë Nínive xuʼij reʼ chkë rwinaq: «Titjaʼ iqʼij chrij Dios chë tjyowaj qawäch chqä titzolij iwiʼ, rkʼë jbʼaʼ ke riʼ ma xtchüp ta qawäch». Taq Jehová xtzʼët chë ri winäq xkitzolij kiʼ, ma xchüp ta kiwäch.

Jonás xpë ryowal rma Jehová ma xchüp ta rwäch Nínive. Taquʼ rij reʼ: Jehová xpoqonaj rwäch Jonás, pero Jonás ma xpoqonaj ta kiwäch ri ninivitas. Pa rkʼexel riʼ, xel äl chpan ri tinamït y xbʼetzʼyeʼ chuxeʼ jun qʼayis ri nkʼïy achiʼel nkʼïy kʼix, y ryowal ntzuʼun. Chrij riʼ, ri qʼayis riʼ xchaqiʼj qa y Jonás xpë más ryowal. Rma riʼ Jehová xuʼij reʼ che rä: «Chawäch rït más rqʼij le qʼayis laʼ chkiwäch ri ninivitas. Rïn xinpoqonaj kiwäch, rma riʼ ma xinchüp ta kiwäch». ¿Achkë komä xrajoʼ xkʼüt Dios chwäch Jonás? Chë ri ninivitas más wä kiqʼij chwäch xa bʼa achkë qʼayis.