Ma yexkeʼ ta chwäch ri mamaʼ tyox

Taq Nabucodonosor xrachkʼaj yän ri estatua, xtäq rbʼanik jun mamaʼ tyox ri bʼanon rkʼë oro y xyaʼ chwäch ri jyuʼ Dura. Ryä xermöl jontir ri winäq ri kan kʼo kiqʼij chpan ri tinamït, yajün Sadrac, Mesac y Abednego, y xuʼij reʼ chkë: «Taq xkeqʼajan ri trompetas, ri flautas chqä ri arpas, kʼo chë yixxkeʼ chwäch ri tyox. Ri ma xtuʼän ta riʼ xtkʼaq chpan ri horno ri nbʼrö qʼaqʼ chpan». ¿Achkë naquʼ rït? ¿Xkexkeʼ komä ri oxiʼ kʼojolaʼ chwäch ri tyox? ¿O xuʼ Jehová xtkiyaʼ rqʼij?

Taq ri rey xuʼij chë tqʼajan ri música, jontir xexkeʼ chqä xkiyaʼ rqʼij ri tyox. Pero Sadrac, Mesac y Abednego ma xexkeʼ ta. Jojun achiʼaʼ xekitzʼët apü y xkibʼeʼij reʼ che rä ri rey: «Le oxiʼ kʼojolaʼ laʼ ma najin ta yexkeʼ chwäch atyox». Nabucodonosor xerskʼij ri kʼojolaʼ y xuʼij reʼ chkë: «Majun xtbʼanatäj iwkʼë si xkixxkeʼ chwäch ri tyox. Si ma xtiʼän ta, xkixinkʼäq pa qʼaqʼ. Majun ta jun dios xtkowin xkixurköl pa nqʼaʼ». Ryeʼ xkiʼij: «Ma xtqaʼän ta ri naʼij. Ri qaDios nkowin nqrköl. Y tapeʼ ma xtqrköl ta, ma xtqxkeʼ ta chwäch atyox».

Ri rey kan xkatäj rkʼë. Rma riʼ xuʼij reʼ: «¡Timeqʼaʼ ri horno siete mul más!». Chrij riʼ xuʼij reʼ chkë rsoldados: «Keʼixmaʼ re achiʼaʼ reʼ chqä keʼikʼaqaʼ chpan». Ri horno kowan kʼatän rbʼanon. Rma riʼ, ri soldados xekäm taq xejelun apü. Ri oxiʼ kʼojolaʼ xekʼaq pa qʼaqʼ. Chrij riʼ, Nabucodonosor xtzuʼun apü chpan ri horno y xtzʼët chë ye kajiʼ chik achiʼaʼ najin yebʼiyïn chpan. Ryä kowan xxiʼij riʼ, rma riʼ xuʼij reʼ chkë rmos: «Achiʼel ta xuʼ oxiʼ achiʼaʼ xeqakʼäq pa qʼaqʼ, pero komä yentzʼët ye kajiʼ, ¡y jun chkë ryeʼ achiʼel ta jun ángel!».

Ri rey xjelun apü rkʼë ri horno y xuʼij: «¡Kixel pä, rïx ri yïx rsamajelaʼ ri Nimaläj Dios!». Jontir kan ma nkinmaj ta wä taq xkitzʼët chë Sadrac, Mesac y Abednego majun xbʼanatäj kikʼë. Majun ta xkʼat chkë, ni kiwiʼ ni kitzyaq, nixta rxlaʼ sübʼ kʼo wä chkij.

Nabucodonosor xuʼij: «¡Ri rDios Sadrac, Mesac y Abednego kan nüm rqʼij! Xtäq pä r·ángel rchë xerköl. Majun ta chik jun dios achiʼel kiDios ryeʼ».

Ri oxiʼ kʼojolaʼ riʼ kiyaʼon wä chwäch kan chë, xa bʼa achkë xtbʼanatäj, ryeʼ xtkinmaj rtzij Jehová. ¿Nawajoʼ rït yatok achiʼel ryeʼ?