Esdras nukʼüt rLey Dios

Taq qʼaxnäq chik jun 70 jnaʼ ketzolin ri israelitas Jerusalén, kʼa ye kʼo na wä jojun chkë ryeʼ chkipan tinamït ri ye kʼo pa rqʼaʼ Persia. Ri sacerdote Esdras, jun chkë ri israelitas riʼ, xkʼoxaj chë ri ye kʼo Jerusalén ma najin ta nkismajij ri Ley. Ryä nukʼüt wä rLey Jehová, rma riʼ nrajoʼ wä nbʼä kikʼë rchë yertoʼ. Artajerjes, ri rey rchë Persia, xuʼij reʼ che rä: «Dios ryaʼon anaʼoj rchë nakʼüt rLey. Rma riʼ, jät y keʼakʼwaj äl ri nkajoʼ yebʼä awkʼë». Esdras xermöl ri nkajoʼ yetzolin Jerusalén. Xkiʼij che rä Jehová chë kerchajij pa bʼey y xkichäp äl ri mamaʼ bʼey.

Kajiʼ ikʼ chrij riʼ, xeʼapon Jerusalén. Ri yekʼwayon bʼey chpan ri tinamït xkiʼij reʼ che rä Esdras: «Ri israelitas ma kinman ta rtzij Jehová y ye kʼlan kikʼë ixoqiʼ ri xa tyox nkiyaʼ kiqʼij». ¿Achkë xuʼän Esdras? Xxkeʼ chkiwäch jontir winäq y xuʼän orar. Ryä xuʼij: «Jehová, rït kʼïy ütz abʼanon pa qawiʼ, pero röj xa najin nqmakun chawäch». Ri winäq xkitzolij kiʼ, pero kʼa xkʼatzin na kitoʼik rchë nkiʼän ri ütz. Rma riʼ Esdras xerchaʼ achiʼaʼ ri yekʼwan bʼey chqä jueces rchë xekitoʼ ri winäq. Chkipan oxiʼ ikʼ, xekesaj äl jontir ri ma nkajoʼ ta nkiyaʼ rqʼij Jehová.

Xeqʼax 12 jnaʼ. Chpan ri tiempo riʼ, ri rmuros Jerusalén xeyak chik jmul. Esdras xermöl ri winäq pa kʼaybʼäl rchë xskʼij rLey Dios chkiwäch. Taq xjäq ri Ley, ri winäq xepaʼeʼ qʼanäj. Esdras xyaʼ rqʼij Jehová, y ri israelitas xkijtobʼaʼ kiqʼaʼ rchë xkikʼüt chë ütz xkikʼoxaj ri xbʼix. Chrij riʼ, Esdras xskʼij ri Ley chqä xuʼij achkë ntel chë tzij. Ri winäq xkiyaʼ kixkïn, y xkichäp oqʼej rma xkitzʼët chë xa kiyaʼon qa Jehová. Chkaʼn qʼij, Esdras xskʼij chik jmul ri Ley chkiwäch. Ri israelitas xkitzʼët chë nkʼatzin wä nkiʼän ri Nmaqʼij kichë ri cabañas o ramá. Rma riʼ xkikanuj ri nkʼatzin chkë rchë ri nmaqʼij riʼ.

Ri israelitas kan kiʼ kikʼuʼx xkiʼän chkipan ri siete qʼij ri xyalöj ri nmaqʼij. Ryeʼ xetyoxin che rä Jehová rma ütz xel kitkoʼn. Xa xuʼ wä bʼanon jun mamaʼ Nmaqʼij kichë ri ramá achiʼel riʼ pa rqʼij qa Josué. Taq ri nmaqʼij xkʼis, xkimöl kiʼ chqä xkiʼän orar. Ryeʼ xkiʼij: «Jehová, rït xojaköl pa kiqʼaʼ ri xojkixïm pa samaj, xayaʼ qaway pa desierto chqä xayaʼ re jaʼäl ilew reʼ chqë. Pero röj kïy mul ma xqanmaj ta atzij. Y tapeʼ kʼïy profetas xatäq pä, röj ma xqaʼän ta ri xkiʼij. Pero rït ma xikʼo ta akʼuʼx qkʼë. Ma xamestaj ta ri xatzüj che rä Abrahán. Komä, nqayaʼ qachiʼ chawä chë xtqanmaj atzij». Ri winäq xkitzʼibʼaj ri xkiʼij, y ri yekʼwayon bʼey, ri levitas chqä ri sacerdotes xkiyaʼ jun sello chwäch ri wuj.