Nyaʼöx ri loqʼoläj rchqʼaʼ Dios pa kiwiʼ

Chpan ri jnaʼ 33, taq qʼaxnäq chik 10 qʼij ttzolin Jesús chkaj, ri rtzeqelbʼëy xyaʼöx pä ri loqʼoläj rchqʼaʼ Dios pa kiwiʼ. Ri qʼij riʼ winäq ri jalajöj kitinamit xeʼapon Jerusalén rma nbʼan ri nmaqʼij rchë ri Pentecostés. Jun 120 rtzeqelbʼëy Jesús kimolon wä kiʼ. Ryeʼ ye kʼo wä chpan jun cuarto pa rwiʼ jun jay, taq chaq kʼateʼ, kʼo jun xbʼanatäj. Chkijujnal ri ye kʼo chriʼ, xbʼejeʼ jun ri achiʼel ta rxaq qʼaqʼ pa kijolon y jontir xetzjon qʼanäj pa jalajöj chʼaʼäl. Y chpan ri jay xqʼajan rchʼaʼäl jun mamaʼ kaqʼiqʼ.

Ri winäq xkikʼoxaj ri xqʼajan y chanin xebʼä akuchï kʼo wä ri jay rchë nkitzʼët achkë najin nbʼanatäj. Kan xel kikʼuʼx taq xkikʼoxaj chë rtzeqelbʼëy Jesús najin wä yetzjon chkipan jalajöj chʼaʼäl. Rma riʼ xkiʼij: «Si le winäq laʼ aj Galilea, ¿achkë rma yekowin yetzjon pa qachʼaʼäl?».

Pedro chqä ri nkʼaj chik apóstoles xepaʼeʼ chkiwäch jontir. Pedro xuʼij: «Rïx xikamsaj Jesús, pero Jehová xkʼasoj pä. Komä Jesús kʼo chkaj chuxkïn Dios. Y xyaʼ pä ri loqʼoläj rchqʼaʼ Dios pa qawiʼ achiʼel xuʼij qa chqë. Rma riʼ xitzʼët re milagros reʼ».

Ri winäq kan xel kikʼuʼx. Ri xuʼij Pedro xapon pa kan. Rma riʼ xkikʼutuj reʼ: «¿Achkë nkʼatzin nqaʼän?». Ryä xuʼij: «Titzolij iwiʼ che rä imak y tibʼanaʼ bautizar iwiʼ pa rbʼiʼ Jesús. Si xtiʼän riʼ, rïx chqä xtyaʼöx pä ri loqʼoläj rchqʼaʼ Dios pan iwiʼ». Ri qʼij riʼ jun 3,000 winäq xkiʼän bautizar kiʼ. Kan chpan qa ri qʼij riʼ, xekʼyär rtzeqelbʼëy Jesús chriʼ Jerusalén. Rkʼë rtoʼik ri loqʼoläj rchqʼaʼ Dios, ri apóstoles xekiʼän más congregaciones. Ke riʼ rbʼanik xkikʼüt chkiwäch ri winäq jontir ri xkʼüt qa Jesús chkiwäch.