Nyaʼöx ri loqʼoläj uchqʼaʼ pa rwiʼ Cornelio

Chriʼ Cesarea kʼo wä Cornelio, jun ri nekʼwan bʼey chkiwäch ri soldados aj Roma. Tapeʼ ma judío ta, ri judíos kʼo wä rqʼij chkiwäch. Re achï reʼ kowan wä nspan chqä yertoʼ wä ri pobres. Cornelio ronojel wä mul nuʼän orar che rä Jehová. Kʼo jun qʼij, jun ángel xkʼüt pä riʼ chwäch chqä xuʼij reʼ che rä: «Dios xaturkʼoxaj. Keʼataqaʼ äl jojun achiʼaʼ rkʼë Pedro chlaʼ Jope rchë nkiʼij che rä chë tpë chë atzʼetik». Rma riʼ, Cornelio chanin xertäq äl oxiʼ achiʼaʼ pa tinamït riʼ, ri kʼo wä pa jun 50 kilómetros pa sur.

Loman najin nbʼanatäj riʼ, Pedro xertzʼët chköp chpan jun visión ri ma ütz ta nkitäj ri judíos. Chrij riʼ jun ángel xuʼij che rä chë twaʼ. Pedro xuʼij: «Majun bʼëy ntjon ta jun chköp ri ma chʼajchʼöj ta». Ri ángel xuʼij: «Ma taʼij ta chë re chköp reʼ ma ye chʼajchʼöj ta, komä Dios nuʼij chë ye chʼajchʼöj». Chrij riʼ xbʼix chqä ya reʼ che rä: «Ye kʼo oxiʼ achiʼaʼ chuchiʼ jay, jät äl kikʼë». Pedro xbʼä chuchiʼ ri jay y xkʼutuj chkë ri achiʼaʼ achkë nkajoʼ. Ryeʼ xkiʼij: «Xqrtäq pä Cornelio, jun ri nekʼwan bʼey chkiwäch ri soldados aj Roma. Ryä nrajoʼ chë rït yabʼä qkʼë chrachoch ri kʼo Cesarea». Pedro xuʼij chkë ri achiʼaʼ riʼ chë kekanaj qa chriʼ ri aqʼaʼ riʼ. Chkaʼn qʼij xebʼä äl Cesarea. Jojun cristianos aj Jope xebʼä chqä.

Taq Cornelio xtzʼët Pedro, xxkeʼ chwäch. Pero Pedro xuʼij: «Kakatäj, rïn xa yïn winäq achiʼel rït. Dios xirtäq pä awkʼë, tapeʼ röj, ri judíos, ma nq·ok ta chkachoch winäq ri ma ye judíos ta. Komä tabʼanaʼ utzil, taʼij chwä achkë rma xinaskʼij».

Cornelio xuʼij: «Pa jun kajiʼ qʼij qa najin wä nbʼän orar, y jun ángel xuʼij chwä chë katinskʼij. Tabʼanaʼ utzil, takʼutuʼ chqawäch ri nrajoʼ Jehová chë nqatamaj». Pedro xuʼij: «Komä nqʼax chi nwäch chë Dios ma yerchaʼ ta ri winäq; ryä yerajoʼ jontir ri nkajoʼ nkiyaʼ rqʼij». Pedro kʼïy xkʼüt chkiwäch chrij Jesús. Chrij riʼ Cornelio chqä ri ye kʼo rkʼë xyaʼöx pä ri loqʼoläj rchqʼaʼ Dios pa kiwiʼ chqä xkiʼän bautizar kiʼ.