Ri cristianos yebʼä chkipan kʼïy tinamït

Ri apóstoles xkitzjoj Rchʼaʼäl Dios chwäch jontir le Rwachʼlew, achiʼel xuʼij qa Jesús chkë. Pa jnaʼ 47, ri cristianos aj Antioquía xkitäq äl Pablo chqä Bernabé chutzjoxik Rchʼaʼäl Dios. Ryeʼ kiʼ kikʼuʼx xkiʼän riʼ chkipan tinamït ri ye kʼo Asia Menor, achiʼel Derbe, Listra chqä Iconio.

Pablo y Bernabé xkitzjoj Rchʼaʼäl Dios chkë jalajöj winäq: bʼeyomaʼ o manä chqä ye riʼj chik o majanä. Ye kʼïy xkinmaj chrij Cristo. Ryeʼ chqä xkitzjoj Rchʼaʼäl Dios che rä Sergio Paulo, ri gobernador rchë Chipre. Pero jun ajqʼij xrajoʼ xerqʼät. Pablo xuʼij reʼ che rä ri ajqʼij: «Jehová ma ütz ta nutzʼët ri najin naʼän». Chaq kʼateʼ, ri ajqʼij ma xtzuʼun ta chik. Taq Sergio Paulo xtzʼët riʼ, xbʼeʼok rtzeqelbʼëy Jesús.

Pablo y Bernabé xkitzjoj Rchʼaʼäl Dios chuchiʼ taq jay, pa taq kʼaybʼäl, pa taq bʼey chqä chkipan sinagogas. Kʼo jmul, taq ye kʼo Listra, xkiʼän chë xbʼiyïn jun achï ri ma nbʼiyïn ta. Ri winäq xkajoʼ xkiyaʼ kiqʼij rma xkiquʼ chë ryeʼ ye dioses. Pablo y Bernabé xkiʼij reʼ chkë: «¡Xa xuʼ Dios kʼo chë nqayaʼ rqʼij! Röj xa yoj winäq». Jojun judíos xkiʼän chë ri winäq xpë kiyowal che rä Pablo. Rma riʼ xkikʼäq abʼäj chrij y xkiqererej äl kʼa chrij ri tinamït rma xkiquʼ chë xkäm. ¡Pero Pablo ma kamnäq ta wä! Rma riʼ jojun cristianos chanin xkitoʼ y xkikʼwaj äl chik jmul chpan ri tinamït. Chrij riʼ Pablo xtzolin Antioquía.

Pa jnaʼ 49, Pablo xtzolin chkitzʼetik ri cristianos ri ye kʼo Asia Menor. Chrij riʼ xbʼertzjoj ri ütz taq rtzjol chkipan tinamït ri ye kʼo Europa, achiʼel Atenas, Éfeso, Filipos, Tesalónica chqä nkʼaj chik tinamït. Rkʼë ryä xbʼä Silas, Lucas chqä jun kʼajol ri Timoteo rbʼiʼ. Ryeʼ xekiʼän congregaciones chqä xekitoʼ rchë kuw yejeʼ. Pablo chqä xbʼä Corinto, y jun jnaʼ rkʼë nkʼaj xjeʼ qa chriʼ rchë xertoʼ ri cristianos rchë kuw nuʼän kikʼuqbʼäl kʼuʼx. Ryä chqä xkʼüt Rchʼaʼäl Dios y xertzʼibʼaj cartas chkë kʼïy congregaciones. Y rsamaj ya riʼ wä yeruʼän jay ri yebʼanon rkʼë tzyäq. Jun tiempo chrij riʼ, Pablo xtzolin Antioquía.

Pa jnaʼ 52, Pablo xbʼä Asia Menor pa rox mul, chrij riʼ xbʼä kʼa Filipos, ri kʼo pa norte, y chrij riʼ xbʼä Corinto. Pablo chqä xjeʼ kʼïy jnaʼ Éfeso. Ryä xkʼüt Rchʼaʼäl Dios chriʼ, xerqʼomaj yawaʼiʼ chqä xtoʼ ri congregación. Ryä chqä ronojel qʼij xtzjoj Rchʼaʼäl Dios chkiwäch ye kʼïy winäq chpan jun escuela. Rma riʼ, ye kʼïy xkijäl kikʼaslemal. Taq xbʼertzjoj yän ri ütz taq rtzjol chkipan kʼïy tinamït, Pablo xbʼä Jerusalén.