Ri nchajin ri cárcel ntok cristiano

Chriʼ Filipos, kʼo wä jun qʼopoj ri nuʼij wä chkë ri winäq achkë xtbʼanatäj chpan kikʼaslemal. Yë wä jun demonio nbʼanö chë ryä nkowin nuʼän riʼ. Rma riʼ, ri ye rajaw kʼïy päq nkichʼäk qa chrij. Taq Pablo y Silas xeʼapon Filipos, ryä kan kʼïy qʼij xertzeqelbʼej. Ri demonio nuʼän wä chë ryä kan kuw nuʼij: «Re achiʼaʼ reʼ ye rsamajelaʼ Dios». Pa rkʼisbʼäl, Pablo xuʼij reʼ che rä ri demonio: «Pa rbʼiʼ Jesús nbʼij chawä chë tayaʼ qa le qʼopoj laʼ». Chrij riʼ, ri demonio xyaʼ qa ri qʼopoj.

Taq ri rajaw ri qʼopoj xkitzʼët chë ma xkekowin ta chik xtkichʼäk päq chrij, xkatäj kiyowal. Rma riʼ xekichirirej äl Pablo chqä Silas chwäch ri qʼatbʼäl tzij, y xkiʼij reʼ: «Re achiʼaʼ reʼ ma nkismajij ta ri ley, y najin nkitïk kiyowal ri winäq». Ri qʼatbʼäl tzij xuʼij chë kechʼay Pablo chqä Silas chqä keyaʼöx pa cárcel. Ri achï ri nchajin ri cárcel xerkʼwaj kʼa akuchï más qʼequʼn rbʼanon. Ryä chqä xjuʼ kaqän chukojöl jojun tzʼalän.

Chrij riʼ, Pablo y Silas xebʼixan rchë nkiyaʼ rqʼij Jehová y ri nkʼaj chik najin wä yekikʼoxaj. Chaq kʼateʼ, ri aqʼaʼ riʼ xuʼän jun mamaʼ slonel chriʼ pa cárcel. Ya riʼ xuʼän chë xejaqatäj jontir puertas chqä xeʼel ri cadenas y ri tzʼalän ri yaʼon chkiqʼaʼ chkaqän ri ye kʼo pa cárcel. Taq ri nchajin ri cárcel xbʼä akuchï ye kʼo wä Pablo chqä Silas y xtzʼët chë ri puertas yejaqäl, xquʼ chë jontir xeʼanmäj äl. Rma riʼ xbʼerkʼamaʼ pä jun espada rchë nukamsaj riʼ.

Pablo kuw xuʼij: «¡Ma takamsaj ta awiʼ, jontir yoj kʼo aweʼ!». Ri achï riʼ xbʼä akuchï kʼo wä Pablo chqä Silas y xxkeʼ chkiwäch. Ryä xkʼutuj reʼ chkë: «¿Achkë nkʼatzin nbʼän rchë yikolotäj?». Ryeʼ xkiʼij: «Rït chqä ri ye kʼo pan awachoch nkʼatzin ninmaj chrij Jesús». Pablo y Silas xkikʼüt chkiwäch chrij Rchʼaʼäl Jehová. Chrij riʼ, ri nchajin ri cárcel chqä jontir ri ye kʼo pa rachoch, xkiʼän bautizar kiʼ.