NAʼOJ 100

Pablo chqä Timoteo

Eunice, Loida y Timoteo taq kʼa akʼal na

Timoteo ya riʼ wä jun kʼajol ri kʼo chpan ri congregación rchë Listra. Ryä griego wä rtataʼ y judía rteʼ. Ri rteʼ Eunice rbʼiʼ, y ratiʼt, Loida. Che kaʼiʼ xkikʼüt chrij Jehová chwäch Timoteo taq kʼa akʼal na.

Taq Pablo xbʼä Asia Menor pa rkaʼn mul, xqʼax äl Listra. Chriʼ, xtzʼët chë Timoteo kowan yerajoʼ ri ye kʼo pa congregación chqä chë kan nrajoʼ yertoʼ. Rma riʼ Pablo xuʼij che rä chë tbʼä äl rkʼë. Taq xqʼax ri tiempo, Pablo xtjoj Timoteo rchë kan pa rbʼeyal nukʼüt Rchʼaʼäl Dios.

Dios xkʼüt chkiwäch Pablo chqä Timoteo akuchï nkʼatzin yebʼä wä. Kʼo jun aqʼaʼ, Pablo xtzʼët jun achï aj Macedonia chpan jun visión ri xuʼij che rä chë tbʼä chkitoʼik. Rma riʼ Pablo, Timoteo, Silas chqä Lucas xebʼä chriʼ rchë xkitzjoj Rchʼaʼäl Dios chqä rchë xekiʼän congregaciones.

Chpan jun tinamït ri kʼo chriʼ, ri Tesalónica rbʼiʼ, ye kʼïy achiʼaʼ chqä ixoqiʼ xeʼok cristianos. Pero jojun judíos itzel xkinaʼ che rä Pablo chqä rchiʼil. Rma riʼ xekimöl itzel taq winäq y xekichirirej äl ri cristianos chwäch ri qʼatbʼäl tzij. Ri judíos kan kuw wä nkiʼij reʼ: «¡Re achiʼaʼ reʼ ye rkʼulel ri qʼatbʼäl tzij rchë Roma!». Pablo chqä Timoteo kan xxiʼin rij kikʼaslemal, rma riʼ chaqʼaʼ xkʼatzin xeʼanmäj äl Berea.

Ri winäq aj Berea kan jaʼäl xkikʼoxaj Rchʼaʼäl Dios, rma riʼ ye kʼïy griegos chqä judíos xeʼok cristianos. Pero jojun judíos xepë Tesalónica rchë xkiqʼät kisamaj Pablo chqä rchiʼil, rma riʼ Pablo xbʼä äl Atenas. Timoteo y Silas xekanaj qa Berea rchë xkitoʼ ri congregación. Taq xqʼax ri tiempo, Pablo xtäq chik äl jmul Timoteo chlaʼ Tesalónica rchë nutoʼ ri congregación rchë nuköchʼ ri poqonal ri najin nyaʼöx pa rwiʼ. Chrij riʼ, Pablo xtäq äl Timoteo rchë nbʼerkʼuqbʼaʼ kikʼuʼx kʼïy congregaciones.

Taq ri apóstol Pablo tzʼapin pa jun jay chqä yaʼon cadena chuqʼaʼ rkʼë jun soldado, ryä nuʼij che rä Timoteo chë ttzʼibʼaj ri xtuʼij apü che rä

Pablo xuʼij reʼ che rä Timoteo: «Ri nkajoʼ nkiyaʼ rqʼij Jehová xtyaʼöx poqonal pa kiwiʼ». Timoteo xyaʼöx pa cárcel chqä xyaʼöx poqonal pa rwiʼ xa rma nuyaʼ rqʼij Jehová. Pero ryä kan kiʼ rkʼuʼx, rma ke riʼ xkowin xkʼüt chë ronojel mul nunmaj rtzij Jehová.

Pablo xuʼij reʼ chkë ri filipenses: «Xtintäq äl Timoteo iwkʼë. Ryä xkixurtoʼ rchë ma niyaʼ ta qa Jehová chqä xtkʼüt chiwäch achkë rbʼanik nitzjoj Rchʼaʼäl». Pablo kan rkʼuqbʼan wä rkʼuʼx chrij Timoteo. Ryeʼ kan kʼïy jnaʼ jnan xkiyaʼ rqʼij Dios chqä xeʼok ütz taq amigos.

«Majun ta chik jun kʼo wkʼë achiʼel rnaʼoj ryä, rma ryä kan nchʼpü chiwij rïx. Rma ri nkʼaj chik xa yë ri nkajoʼ ryeʼ nkikanuj y ma yë ta ri nrajoʼ Jesucristo» (Filipenses 2:20, 21).