TJONÏK 09
Más junan xtuʼän awäch rkʼë Dios we xkachʼö rkʼë
¿Nanaʼ rït chë kʼo mul nkʼatzin atoʼik pan akʼaslemal? ¿Kʼo akʼutun qa chawäch ri majanä nawïl kiqʼalajsaxik? ¿Nkʼatzin nkʼuqbʼäx akʼuʼx? ¿Nawajoʼ yajeʼ más naqaj che rä Jehová? Ri yachʼö rkʼë Dios yaturtoʼ rkʼë jontir riʼ. Ye kʼa, ¿achkë rubʼanik kʼo chë yachʼö rkʼë Dios? ¿Yerukʼoxaj komä Dios jontir ri winäq taq yechʼö rkʼë? ¿Achkë rubʼanik natamaj chë Dios yaturkʼoxaj taq rït yachʼö rkʼë? Tqatzʼetaʼ.
1. ¿Achoq rkʼë ütz nqchʼö wä, y achkë ütz nqaʼij che rä taq nqchʼö rkʼë?
Jesús xuʼij chë xa xuʼ rkʼë ri Qatataʼ kʼo chkaj kʼo chë nqchʼö wä. Y kan ya riʼ xuʼän ryä; chaq taqïl xchʼö rkʼë Jehová. Kʼo jmul xuʼij: «Rïx ke reʼ kʼa rubʼanik kixchʼö rkʼë Dios: ‹Qatataʼ ri yït kʼo chlaʼ chkaj...›» (Mateo 6:9). Taq nqchʼö rkʼë Jehová, más junan nuʼän qawäch rkʼë.
Taq nqchʼö rkʼë Dios, röj ütz nqatzjoj xa bʼa achkë che rä. Ye kʼa, we nqajoʼ chë Dios nqrkʼoxaj, ma tqakʼutuj ta xa bʼa achkë jun che rä ri ma nqä ta chwäch ryä. Le Biblia nuʼij chë «ütz nqakʼutuj xa bʼa achkë che rä, we rukʼwan riʼ rkʼë ri ruraybʼal, ryä nqrkʼoxaj» (1 Juan 5:14). Jesús xuʼij achkë ütz nqaʼij taq nqchʼö rkʼë Dios (taskʼij ruwäch Mateo 6:9-13). Röj ütz nqatzjoj che rä Dios jontir ri najin nqaqʼaxaj, ye kʼa ma tqamestaj ta nqatyoxij che rä jontir ri rubʼanon pa qawiʼ chqä tqaʼij che rä chë kerutoʼ nkʼaj chik winäq.
2. ¿Achkë rubʼanik kʼo chë nqchʼö rkʼë Dios?
Le Biblia nuʼij chë tqabʼanaʼ reʼ: «Tiʼij che rä [Dios] jontir ri kʼo pan iwan» (Salmo 62:8). Rma riʼ jontir ri nqaʼij che rä Dios kʼo chë kan pa qan ntel wä pä. Röj ütz nqchʼö rkʼë Dios rkʼë kuw o eqal qachʼaʼäl, taq yoj paʼäl, taq yoj xkül o xa bʼa achkë na chik jun rubʼanik ri ma nuqasaj ta ruqʼij Jehová. Chqä xa bʼa achkë hora o xa bʼa akuchï yoj kʼo wä ütz nqchʼö rkʼë Dios.
3. ¿Achkë rubʼanik nuyaʼ pä Dios ri nqakʼutuj che rä?
Kan jalajöj rubʼanik nuʼän riʼ. Ryä nuksaj le Biblia, ri Ruchʼaʼäl, rchë yeruqʼalajsaj ri qakʼutunik. Ri ruskʼixik ruwäch ri Ruchʼaʼäl Dios «nuʼän ajnaʼoj che rä jun winäq ri majun ta runaʼoj» (Salmo 19:7; taskʼij ruwäch Santiago 1:5). Y, taq kʼo kʼayewal qlon, Jehová nuyaʼ uxlanen pa qan. Chqä kʼo mul yeruksaj ri rusamajelaʼ rchë nkiyaʼ qatoʼik taq nkʼatzin chqë.
TQATAMAJ MÁS CHRIJ RE NAʼOJ REʼ
Tqatzʼetaʼ achkë rubʼanik nqä chwäch Dios nqchʼö rkʼë y achkë rubʼanik nqrtoʼ ri chaq taqïl nqaʼän riʼ.
4. Ri nkʼatzin nqaʼän rchë Dios nqrkʼoxaj taq nqchʼö rkʼë
¿Achkë nkʼatzin nqaʼän rchë Dios nqrkʼoxaj taq nqchʼö rkʼë? Titzʼetaʼ ri VIDEO.
Jehová nrajoʼ chë xa xuʼ rkʼë ryä nqchʼö wä. Tiskʼij ruwäch Salmo 65:2 y kixtzjon chrij reʼ:
¿Yaturkʼoxaj komä Dios taq rït yachʼö rkʼë? ¿Achkë rma naʼij riʼ?
We nqajoʼ chë Dios nqrkʼoxaj taq nqchʼö rkʼë, kʼo chë nqatäj qaqʼij rchë nqaʼän ri nrajoʼ ryä. Tiskʼij ruwäch Miqueas 3:4 chqä 1 Pedro 3:12, y kixtzjon chrij reʼ:
¿Achkë rubʼanik nqatamaj chë Dios nqrkʼoxaj taq nqchʼö rkʼë?
Rkʼë jbʼaʼ kaʼiʼ molaj winäq nkikʼutuj che rä Dios chë kerutoʼ pä rchë yechʼakon chpan jun chʼaʼoj. Ye kʼa, ¿xtyaʼ pä komä Dios kitoʼik ri winäq riʼ?
5. Ri nqaʼij che rä Dios kʼo chë kan pa qan ntel wä pä
Ye kʼïy winäq xa xuʼ kʼutun chkiwäch nkikamluj ri nkiʼij che rä Dios. Ye kʼa, ¿nqä komä chwäch Dios ri ke riʼ rubʼanik nqchʼö rkʼë? Tiskʼij ruwäch Mateo 6:7 y kixtzjon chrij reʼ:
¿Achkë ütz nqaʼän rchë ma xa xuʼ ta xtqakamluj ri xtqaʼij che rä Dios taq xtqchʼö rkʼë?
¿Achkë naʼij we ronojel qʼij yachʼobʼon chrij jun utzil xawïl pan akʼaslemal y chrij riʼ natyoxij riʼ che rä Jehová? We jun semana xtaʼän riʼ, xtatzʼët chë kʼo 7 ri achoq chrij xatzjon wä rkʼë Jehová y ma xakamluj ta jun.
Jun utziläj tataʼaj nrajoʼ chë rukʼajol nuʼij che rä jontir ri kʼo pa ran. Jehová chqä nrajoʼ chë kan pa qan ttel wä pä jontir ri nqaʼij che rä.
6. Ri nqchʼö rkʼë Dios kan jun nimaläj spanïk
¿Achkë rubʼanik nuyaʼ qachqʼaʼ ri nqchʼö rkʼë Dios taq yeqaqʼaxaj kʼayewal pa qakʼaslemal? Titzʼetaʼ ri VIDEO.
Le Biblia nuʼij chë taq nqchʼö rkʼë Dios nqanaʼ uxlanen pa qan. Tiskʼij ruwäch Filipenses 4:6, 7 y kixtzjon chrij reʼ:
Tapeʼ taq nqchʼö rkʼë Dios ma yesolotäj ta jontir ri kʼayewal najin nqaqʼaxaj, ¿achkë rubʼanik nqrtoʼ ri nqaʼän riʼ?
¿Achkë nawajoʼ natzjoj rït che rä Dios taq xkachʼö rkʼë?
¿Ataman rït reʼ?
Ri tzij amén ntel chë tzij «kan ke riʼ wä» o «kantzij na wä». Ojer qa, taq ri winäq yechʼö wä rkʼë Dios, pa rukʼisbʼäl nkiʼij wä «amén» (1 Crónicas 16:36).
7. Tajamaʼ awäch rchë yachʼö rkʼë Dios
Kʼo mul, rma kan kʼïy qasamaj kʼo, nqamestaj nqchʼö rkʼë Dios. ¿Jaruʼ komä ruqʼij xjeʼ chwäch Jesús ri xchʼö rkʼë Dios? Tiskʼij ruwäch Mateo 14:23 chqä Marcos 1:35, y kixtzjon chrij reʼ:
¿Achkë xuʼän Jesús rchë xkowin xchʼö rkʼë Dios?
Y rït, ¿achkë nkʼatzin naʼän rchë yachʼö rkʼë Dios?
JOJUN WINÄQ NKIʼIJ REʼ: «Tapeʼ yachʼö rkʼë Dios, ryä ma yaturkʼoxaj ta».
¿Achkë naʼij rït?
RI XQATAMAJ QA
Taq kan pa qan ntel wä pä ri nqaʼij che rä Dios, más junan xtuʼän qawäch rkʼë. Chqä nuʼän chë njeʼ uxlanen pa qan y nuyaʼ qachqʼaʼ rchë nqkowin nqaʼän ri nrajoʼ Jehová.
Tqakamluj ri xqatzʼët qa
¿Achoq rkʼë ütz nqchʼö wä?
¿Achkë rubʼanik kʼo chë nqchʼö rkʼë Dios?
¿Achkë rubʼanik nqrtoʼ ri nqchʼö rkʼë Dios?
RCHË NATAMAJ MÁS
Tatamaj kiqʼalajsaxik jojun kʼutunïk nkiʼän ri winäq chrij ri yachʼö rkʼë Dios.
«7 kʼutunïk ri yebʼan chrij ri yachʼö rkʼë Dios» (Ri Chajinel, 1 de octubre, 2010)
Tatamaj achkë rma kan kʼo ruqʼij chë rït yachʼö rkʼë Dios y achkë ütz naʼän rchë xkeʼaksaj jaʼäl taq tzij taq xkachʼö rkʼë.
«¿Kan nk’atzin komä yich’ö rk’ë Dios?» (Reʼ xtawïl pa jw.org)
Tatzʼetaʼ achkë nuʼij le Biblia chrij ri achoq rkʼë ütz nqchʼö wä.
Tatzʼetaʼ re video reʼ y tatzʼetaʼ ajän chqä akuchï ütz nqchʼö wä rkʼë Dios.